ອົງການກາແດງລາວ

CROIX ROUGE LAO

ກອງປະຊຸມກ່ຽວກັບວຽກງານກາແດງແລະກົດໝາຍຮ່ວມກັບສື່ມວນຊົນລາວ

ຂປລ. ໃນວັນທີ 26 ສິງຫາ 2020 ທີ່ໂຮງແຮມ ເສດຖາປຣັດ ນະຄອນຫລວງວຽງຈັນ, ໄດ້ມີກອງປະຊຸມ ກ່ຽວກັບວຽກງານກາແດງ ແລະ ກົດໝາຍວ່າດ້ວຍກາແດງ ໃຫ້ແກ່ບັນດາສື່ມວນຊົນລາວອ້ອມຂ້າງສູນກາງ, ໂດຍການເປັນປະທານຂອງ ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ, ມີ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ທັງເປັນປະທານສະມາຄົມນັກຂ່າວແຫ່ງ ສປປ ລາວ, ພ້ອມດ້ວຍບັນດາຫົວໜ້າ ອົງ ການສື່ມວນຊົນ ຈາກໜັງສືພີມ, ວິທະຍຸ, ໂທລະພາບ ອ້ອມຂ້າງສູນກາງ ແລະ ຂອງຂະແໜງການ ຈໍານວນໜຶ່ງເຂົ້າຮ່ວມ.

 

ໂອກາດນີ້, ທ່ານ ຄໍາຮຸ່ງ ເຮືອງວົງສີ ໄດ້ມີຄໍາເຫັນກ່າວໄຂ ກອງປະຊຸມວ່າ: ກອງປະຊຸມຄັ້ງນີ້, ຈັດຂຶ້ນໃນທ່າມກາງ ບັນຍາກາດທີ່ທົ່ວພັກ, ທົ່ວລັດ ແລະ ປວງຊົນລາວທັງຊາດ ພວມອອກແຮງ ແຂ່ງຂັນ ສ້າງຂະບວນການຕ່າງໆ ເພື່ອຂໍ່ານັບຮັບຕ້ອນວັນ ສໍາຄັນຕ່າງໆຂອງຊາດ ແລະ ຂອງພັກ ກໍຄື ວັນສ້າງຕັ້ງສື່ ມວນຊົນລາວຄົບຮອບ 70 ປີ (13 ສິງຫາ 1950-13 ສິງຫາ 2020) ດ້ວຍບັນຍາກາດຟົດຟື້ນ ແລະ ຂໍຖືໂອກາດສໍາຄັນນີ້ ສະແດງຄວາມຂອບໃຈຕໍ່ ບັນດາ ສື່ມວນຊົນທຸກພາກສ່ວນ ທີ່ໄດ້ເອົາໃຈໃສ່ປະກອບສ່ວນ ໂຄສະນາເຜີຍແຜ່ ຂໍ້ມູນຂ່າວສານວຽກງານກາແດງ ແລະ ການເຄື່ອນໄຫວ ຂອງອົງການກາແດງ ຢ່າງຕັ້ງ ໜ້າເພື່ອປຸກລະດົມສັງຄົມ ກໍຄື ຊັ້ນຄົນຕ່າງໆ ໃນການບໍລິຈາກເລືອດ, ຊ່ວຍເຫລືອທາງດ້ານວັດຖຸ, ເຫື່ອ ແຮງ ແລະ ຈິດໃຈ ເຂົ້າໃນການຊ່ວຍເຫລືອ ບັນເທົາທຸກ ວຽກງານມະນຸດສະທໍາ ໃນໄລຍະຜ່ານມາຢ່າງມີປະສິດທິຜົນ. ພ້ອມນີ້, ທ່ານປະທານອົງການ ກາແດງລາວ ຍັງໄດ້ຍົກໃຫ້ບົດບາດ ແລະ ຄວາມສໍາຄັນຂອງ ວຽກງານກາແດງ ທີ່ປະກອບມີໜ້າວຽກຕົ້ນຕໍ ຄື: ການຊ່ວຍເຫລືອບັນເທົາທຸກເບື້ອງຕົ້ນ, ການບໍລິ ຈາກເລືອດ ແລະ ສະໜອງເລືອດໃຫ້ພຽງພໍ, ການສົ່ງເສີມ ສຸຂະພາບຂັ້ນພື້ນຖານ, ການປະຖົມພະຍາ ບານ, ການກູ້ໄພສຸກເສີນ, ການໂຄສະນາຂົນຂວາຍແຫລ່ງທຶນ, ການສ້າງອາສາສະໝັກກາແດງ, ການສືບ

ທາວຫາຍາດພີ່ນ້ອງ ແລະ ວຽກງານການພົວພັນຮ່ວມມືກັບສາກົນ, ເຊິ່ງວຽກທັງໝົດນີ້ ລ້ວນແຕ່ໄດ້ປະຕິບັດຕາມ 7 ຫລັກການຂອງກາແດງສາກົນ ແລະ ການຄຸ້ມຄອງ ພາຍໃຕ້ ກົດໝາຍວ່າດ້ວຍກາແດງລາວ. ຢ່າງໃດກໍຕາມໃນຕໍ່ໜ້ານີ້, ສື່ມວນຊົນທຸກຂະແໜງການ ຍັງແມ່ນກໍາລັງແຮງສໍາຄັນ ເພື່ອຊ່ວຍໃຫ້ສັງຄົມ ໄດ້ຮັບຮູ້ເຂົ້າໃຈ ຕໍ່ວຽກງານກາແດງ ຢ່າງເລິກເຊິ່ງ ແລະ ກວ້າງຂວາງ ກໍຄື ການສືບຕໍ່ເຂົ້າຮ່ວມ ບໍລິ ຈາກເລືອດ ແລະ ປະກອບສ່ວນຊ່ວຍເຫລືອ ໃນດ້ານຕ່າງໆ ໃນວຽກງານມະນຸດ ສະທໍາຫລາຍຂຶ້ນ.

 

ວິດີໂອຂ່າວ