ອົງການກາແດງລາວ

CROIX ROUGE LAO

ກອງປະຊຸມປຶກສາຫາລືການຊ່ວຍເຫລືອຜູ້ປະສົບໄພນ້ຳຖວ້ມ ແຂວງໄຊຍະບູລີ.

ໃນວັນທີ 19 ພະຈິກ 2021 ທີ່ອົງການກາແດງລາວ ໄດ້ຈັດກອງປະຊຸມພົບປະທາງໄກ ໃນການຊ່ວຍເຫລືອດ້ານຫລັກການແລະວິທີຈັດຕັ້ງປະຕິບັດໃນການຊ່ວຍເຫລືອ ຜູ້ປະສົບໄພນ້ຳຖ້ວມ ໃນໄລຍະເດືອນມິຖຸນາ ທີ່ຜ່ານມາ ໃນ 4 ເມືອງໄດ້ແກ່: ເມືອງ ໄຊຍະບູລີ, ເມືອງ ເງິນ, ເມືອງໄຊສະຖານ ແລະ ເມືອງ ຊຽງຮ່ອນ ຈຳນວນ 40 ບ້ານ ເປົ້າໝາຍ 2,094 ຄົນ; 10,091 ຄົນ, ໃນແຂວງ ໄຊຍະບູລີ ຂຶ້ນ, ໂດຍການເປັນປະທານຂອງທ່ານ ຮສ.ດຮ. ພູທອນ ເມືອງປາກ ປະທານອົງການກາແດງລາວ, ມີຜູ້ຕາງໜ້າຈາກກະຊວງແຮງງານ ແລະ ສະຫວັດດີການສັງຄົມ, ຮອງເຈົ້າແຂວງ ແຂວງ ໄຊຍະບູລີ, ເຈົ້າເມືອງ- ຮອງເຈົ້າເມືອງທັງ 4 ເມືອງ, ຜູ້ຕາງໜ້າຈາກອົງການອາຫານໂລກ, ກາແຂວງໄຊຍະບູລີ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງການປະຊຸມພົບປະທາງໄກໃນຄັ້ງນີ້, ເພື່ອປຶກສາຫາລືຂັ້ນຕອນໃນການຈັດຕັ້ງປະຕິບັດໃນການຊ່ວຍລະຫວ່າງອົງການກາແດງລາວ, ກະຊວງ ແຮງງານ ແລະ ສະຫວັດດີການສັງຄົມ ແລະ ອົງການອາຫານໂລກ ໃນການດ້ານຫລັກການ ການຊ່ວຍເຫລືອອາຫານ ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ໃນເດືອນ ມິຖຸນາ 2021 ທີ່ຜ່ານມາ ຢູ່ແຂວງ ໄຊຍະບູລີ, ເພື່ອໃຫ້ມີຄວາມເຂົ້າໃຈໃນຂັ້ນຕອນ, ວິທີການຈັດຕັ້ງປະຕິບັດ ເພື່ອໃຫ້ຖືກຕາມຫຼັກການ ເງື່ອນໄຂ ໃນການແຈກຢາຍຕາມເງື່ອນໄຂທີ່ອົງການກາແດງລາວ, ກະຊວງແຮງງານ ແລະ ສະຫວັດດີການສັງຄົມ ແລະ ອົງການອາຫານໂລກທີ່ໄດ້ກຳນົດໄວ້, ນອກຈາກນັ້ນ, ກໍ່ຍັງໄດ້ມີການແລກປ່ຽນຄຳຄິດຄຳເຫັນ ເພື່ອໃຫ້ມີຄວາມສອດຄ່ອງໃນສະພາບການແຜ່ລະບາດຂອງພະຍາດໂຄວິດ-19, ການແຈກຢາຍອາຫານໃນຄັ້ງນີ້ ແມ່ນຈະໄດ້ເລີ່ມຈັດຕັ້ງປະຕິບັດແຕ່ວັນທີ 22 ພະຈິກ ຫາ 4 ທັນວາ 2021 ແມ່ນໃຫ້ສຳເລັດພາຍໃນແຂວງ ໄຊຍະບູລີ ຫຼັງຈາກນັ້ນ, ແມ່ນຈະໄດ້ສືບຕໍ່ມອບໃຫ້ແກ່ແຂວງ ສະຫວັນນະເຂດ ໃນໄລຍະຕໍ່ໄປ, ສຳລັບເຄື່ອງທີ່ຈະມອບໃຫ້ປະຊາຊົນໃນຄັ້ງນີ້ ປະກອບມີ: ເຂົ້າສານຈຳນວນ 266,20 ໂຕນ ແລະ ນ້ຳມັນພືດ 20,39 ໂຕນ ລວມມູນຄ່າ: 305,304,97 ໂດຣາ ຫຼື ເທົ່າກັບ 3,273,175,000 ກີບ ເຊິ່ງໄດ້ຮັບການສະໜັບສະໜູນຈາກອົງການອາຫານໂລກ.
ໃນຕອນທ້າຍ, ທ່ານ ເພັດພິໄຊ ສູນວິໄລ ຮອງເຈົ້າແຂວງ ແຂວງ ໄຊຍະບູລີ ກໍ່ໄດ້ກ່າວສະແດງຄວາມຂອບໃຈຕໍ່ ອົງການກາແດງລາວ, ກະຊວງແຮງງານ ແລະ ສະຫວັດດີການສັງຄົມ ແລະ ອົງການອາຫານໂລກ ທີ່ໄດ້ປະກອບສ່ວນໃນການຊ່ວຍເຫຼືອປະຊາຊົນຊາວແຂວງໄຊຍະບູລີ ທີ່ປະສົບໄພພິບັດນ້ຳຖ້ວມໃນຄັ້ງນີ້, ທ່ານຍັງຍັງໃຫ້ຄຳໝັ້ນສັນຍາວ່າ ຈະຈັດຕັ້ງປະຕິບັດຫຼັກການ ພ້ອມທັງຮັບປະກັນ ການແຈກຢາຍໃຫ້ວ່ອງໄວ ທັນເຫດການ ແລະ ຮອດມືຂອງປະຊາຊົນຢ່າງແນ່ນອນ ເພື່ອໃຫ້ມີປະສິດທິພາບ ປະສິດທິຜົນ ຕາມທີ່ໄດ້ປຶກສາຫາລືກັນ.