ອົງການກາແດງລາວ

CROIX ROUGE LAO

ກອງປະຊຸມລາຍງານການຈັດຕັ້ງປະຕິບັດໂຄງການຊ່ວຍເຫຼືອປະຊາຊົນ ເມືອງ ສະໜາມໄຊ

ໃນວັນທີ 13 ມີນາ 2019 ທີ່ຫ້ອງປະຊຸມສະພາປະຊາຊົນ ແຂວງ ອັດຕະປື, ໄດ້ຈັດກອງປະຊຸມ ແນະນຳໂຄງການຊ່ວຍເຫຼືອ ແລະ ຟື້ນຟູ ຜູ້ປະສົບໄພພິບັດນ້ຳຖ້ວມ ທີ່ ເມືອງ ສະໜາມໄຊ ແຂວງ ອັດຕະປື, ໂດຍການເປັນປະທານ ຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ມີທ່ານ ອຸ່ນຫຼ້າ ໄຊຍະສິດ ຄະນະປະຈຳພັກແຂວງ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ – ສັງຄົມ ແຂວງ ອັດຕະປື.
ໃນພິທີດັ່ງກ່າວ ທ່ານ ດຮ. ກາວີພອນ ສຸດທິ ຫົວໜ້າກອງຊ່ວຍເຫຼືອບັນເທົາທຸກ ກໍ່ໄດ້ຂຶ້ນກ່າວລາຍງານກ່ຽວກັບສະພາບການເຄື່ອນໄຫວການຊ່ວຍເຫຼືອຜູ້ປະສົບໄພນ້ຳຖ້ວມໃນໄລຍະຜ່ານມາ ນັບຕັ້ງແຕ່ວັນທີ 23ກໍລະກົດ2018 ຈົນເຖິງປັດຈຸບັນ ເຊິ່ງໄດ້ສຸມໃສ່ວຽກງານຕົ້ນຕໍຄື: ສ້າງທີ່ພັກອາໄສຊົ່ວຄາວ, ຫຼຸດຜ່ອນຄວາມສ່ຽງໄພພິບັດ, ສ້າງເຄື່ອງກອງນ້ຳ, ແຈກຢາຍເຄື່ອງນຸ່ງ, ເຂົ້າສານອາຫານແຫ້ງ, ສ້າງວິດຖ່າຍ, ຄົ້ນຫາຜູ້ສູນຫາຍ ແລະ ອື່ນໆ ຕາມສະພາບຄວາມເປັນຈິງ ເຊິ່ງໄດ້ຮັບການສະໜັບສະໜູນຈາກສັງຄົມ, ກາແດງປະເທດເພື່ອນມິດ, ສະຫະພັນກາແດງ ແລະ ຊີກວົງເດືອນແດງສາກົນ, ຄະນະກຳມະການກາແດງສາກົນ ແລະ ກາແດງປະເທດອື່ນໆ, ຫຼັງຈາກນັ້ນທ່ານກໍ່ໄດ້ນຳສະເໜີໂຄງການທີ່ຈະໄດ້ຈັດຕັ້ງປະຕິບັດໃນຕໍ່ໜ້າ ເພື່ອໃຫ້ການຊ່ວຍເຫຼືອປະຊາຊົນໃນໄລຍະຟື້ນຟູ ເພື່ອໃຫ້ເຂົາເຈົ້າມີຊີວິດການເປັນຢູ່ທີ່ດີຂຶ້ນກວ່າເກົ່າ, ນອກຈາກນັ້ນ ກໍ່ຍັງໄດ້ມີການແລກປ່ຽນຄຳຄິດເຫັນ ຈາກນາຍບ້ານ ແລະ ປະຊາຊົນທີ່ໄດ້ຮັບຜົນກະທົບ ເພື່ອນຳມາພິຈາລະນາ ແລະ ແກ້ໄຂຮ່ວມກັນໃນອານະຄົດ.