ອົງການກາແດງລາວ

CROIX ROUGE LAO

ກອງປະຊຸມວຽກງານກູ້ໄພອົງການກາແດງລາວ2020-2021

ໃນວັນທີ 29-30 ພະຈິກ 2021 ນີ້ ໜ່ວຍກູ້ໄພ 1625 ອົງການກາແດງລາວໄດ້ຈັດພິທີສະຫຼູບວຽກງານຂຶ້ນແບບທາງໄກ່ຮ່ວມກັບສູນກູ້ໄພບັນດາແຂວງ ໂດຍການເປັນປະທານຂອງທ່ານ ຮສ.ດຣ. ສິງ ເມໂນລາດ ຮອງປະທານອົງການກາແດງລາວ, ມີບັນດາທ່ານຄະນະຮັບຜິດຊອບວຽກງານກູ້ໄພຈາກອົງການກາແດງລາວ ແລະ ກາແດງແຂວງແລະ ມີແຂວງຫຼວງນ້ຳທາ, ອຸດົມໄຊ ແລະ ແຂວງຈຳປາສັກເຂົ້າຮ່ວມສັງເກດການ.
ໃນກອງປະຊຸມທ່ານ ພອນໄຊ ສີວິໄລ ຫົວໜ້າພະແນກສຸກເສີນ ກອງສົ່ງເສີມສຸຂະພາບຊຸມຊົນ ອົງການກາແດງລາວ ໄດ້ຜ່ານບົດສະຫຼູບໃນໄລຍະ 02 ປີ 2020-2021 ຜ່ານມາຂອງວຽກງານກູ້ໄພອົງການກາແດງລາວໃນຂອບເຂດທົ່ວປະເທດວ່າ: ໜ່ວຍກູ້ໄພ 1625 ອົງການກາແດງລາວປະກອບມີ 06 ສາຂາແຂວງຄື: ນະຄອນຫຼວງວຽງຈັນ, ວຽງຈັນ, ຫຼວງພະບາງ, ໄຊຍະບູລີ, ບໍ່ແກ້ວ ແລະ ແຂວງຄຳມ່ວນ ປະກອບດ້ວຍພະນັກງານຮັບຜິດຊອບທັງໝົດ 27 ຄົນ, ຍິງ 06 ຄົນ; ມີອາສາສະໝັກທັງໝົດ 166 ຄົນ, ຍິງ 60 ຄົນ; ມີລົດກູ້ໄພທັງໝົດ 12 ຄັນ; ຕະຫຼອດໄລຍະ02 ປີໄດ້ໃຫ້ການຊ່ວຍເຫລືອປະຊາຊົນທີ່ໄດ້ແຈ້ງເບີສຸກເສີນ 1625 ຜ່ານມາ ,ໃນນີ້ໄດ້ຮັບອຸປະຕິເຫດແລະຜູ້ບາດເຈັບທັງໝົດ 3.798 ກໍລະນີ; ມີຜູ້ບາດເຈັບ 995 ຄົນ, ຍິງ 494 ຄົນ; ບາດເຈັບເລັກນ້ອຍ 611 ຄົນ, ເຈັບປານກາງ 559 ຄົນ,ເຈັບສາຫັດ 97 ຄົນ, ນໍາສົ່ງຄົນເຈັບສຸກເສີນ 129 ຄົນ; ມ້ຽນສົບຜູ້ເສຍຊີວິດ 21 ສົບ ແລະ ອື່ນໆ ນອກນັ້ນອາສາສະໝັກຍັງໄດ້ປະກອບສ່ວນເຂົ້າໃນວຽກງານສະກັດກັ້ນ ແລະ ປ້ອງກັນພະຍາດໂຄວິດ-19 ໃນການແຈກຢາຍອາຫານ, ນ້ຳດື່ມ, ໂຄສະນາວິທີປ້ອງກັນ, ສີດ-ພົ່ນຢາຂ້າເຊື້ອຕາມສະຖານທີ່ຕ່າງໆ, ຊ່ວຍອຳນວຍຄວາມສະດວກຢູ່ສະຖານທີ່ສັກວັກຊິນ, ຮັບຜູ້ຕິດເຊື້ອໄປຫາສູນປິ່ນປົວ, ຮັບກຸ່ມສ່ຽງໄປສູນຈຳກັດບໍລິເວນ ແລະ ໄດ້ມ້ຽນສົບຜູ້ເສຍຊີວິດຈາກພະຍາດໂຄວິດ-19,
ວຽກງານນີ້ເປັນງານທີ່ສຳຄັນຫລາຍສະນັ້ນທຸກພາກສ່ວນຈົ່ງເປັນເຈົ້າການໃນການເຄື່ອນໄຫວປະກອບສ່ວນທາງດ້ານວັດຖຸແລະຈິດໃຈ ເພື່ອເຮັດໃຫ້ວຽກງານດັ່ງກ່າວມີຄວາມກ້າວຫນ້າແລະເຂັ້ມແຂງຂຶ້ນເລືື້ອຍໆ
ກອງປະຊຸມໃນຄັ້ງນີ້ແມ່ນໄດ້ດຳເດີນໄປເປັນເວລາ 2 ວັນຈຶ່ງສິນສຸດ ໂດຍໄດ້ຮັບການສະໜັບສະໜູນທຶນຈາກຄະນະກຳມະການກາແດງສາກົນ.