ອົງການກາແດງລາວ

CROIX ROUGE LAO

ກາແດງອົບຮົມສ້າງຊາວໜຸ່ມໃຫ້ກາຍເປັນຜູ້ສ້າງຂະບວນການ ໂຮງຮຽນປອດໄພ

ໃນວັນທີ 17-21 ກັນຍາ 2019 ອົງການກາແດງລາວໄດ້ຝຶກອົບຮົມຊາວໜຸ່ມໃຫ້ການເປັນຜູ້ນຳພາສ້າງຂະບວນການໃໂຮງຮຽນປອດໄພດ້ານໄພພິບັດ ແລະ ໄພອັນຕະລາຍ ຂື້ນທີ່ເມືອງຄຳເກີດ ແຂວງບໍລິຄຳໄຊ ໂດຍການເປັນປະທານຂອງທ່ານ ນາງ ວັນເພັງ ໄຊສົງຄາມ ຮອງຫົວໜ້າຫ້ອງການກາແດງແຂວງບໍລິຄຳໄຊ ແລະ ເປັນກຽດເຂົ້າຮ່ວມໂດຍ ທ່ານ ນາງ ໄອ່ຄຳ ສໍອິນໄຊ ຮອງຫົວໜ້າກອງໂຄສະນາ ແລະ ຂົນຂວາຍການກຸສົນ, ມີທີມງານຄູຝຶກທີ່ມາຈາກອົງການກາແດງລາວສູນກາງ; ກາແດງເມືອງ, ຫ້ອງວ່າການເມືອງ,ຊາວໜຸ່ມເມືອງ ແລະ ຍັງມີຄູ ແລະ ນັກຮຽນ ຈາກ 03 ໂຮງຮຽນມັດທະຍົມເປົ້າໝາຍໃນເມືອງຄຳເກີດ ຄື:ມສ ສາມັນຊົນເຜົ່າ,ມສ ນະຄອນໄຊ ແລະ ມສ ໂພນມີໄຊ. ມີຜູ້ເຂົ້າຮ່ວມທັງໝົດ 30 ທ່ານ, ຍິງ15 ທ່ານ.
ຈຸດປະສົງ ເພື່ອເປັນຮຽນຮູ້ ກ່ຽວກັບ ການຫຼຸດຜ່ອນຄວາມສ່ຽງໄພພິບັດ ແລະ ຄວາມປອດໄພໃນໂຮງຮຽນໃຫ້ແກ່ນັກຮຽນຄູ-ອາຈານ; ເພີ່ມທະວີການມີສ່ວນຮ່ວມ ໃນການສ້າງໃຫ້ໂຮງຮຽນປອດໄພ ແລະ ຂະຫຍາຍອາສາສະໝັກຊາວໜຸ່ມກາແດງໃຫ້ເພີ່ມຂຶ້ນໃນວຽກງານການສຶກສາ ແບບເພື່ອສອນເພື່ອນ.
ຊຸດຝຶກອບຮົມດັ່ງກ່າວໄດ້ຮັບທຶນສະໜັບສະໜູນຈາກສະຫະພັນກາແດງ ແລະ ຊີກວົງເດືອນແດງສາກົນ.
ກາແດງລາວຍັງຈະຝຶກອົບຮົມໃຫ້ຊາວໜຸ່ມໃນເມືອງຄຳເກີດໃນວັນທີ 23-28 ກັນຍາ 2019.