ອົງການກາແດງລາວ

CROIX ROUGE LAO

ຄອບ​ຄົວ​ທີ່​ປະ​ສົບ​ອັກ​ຄີ​ໄພ ໄດ້​ຮັບ​ການ​ຊ່ວຍ​ເຫຼືອ.

ໃນ​ວັນ​ທີ 17 ມິ​ຖຸ​ນາ 2021 ທ່ານ ດ​ຮ. ກາ​ວີ​ພອນ ສຸດ​ທິ ຫົວ​ໜ້າ​ກອງ​ຊ່ວຍ​ເຫຼືອ​ບັນ​ເທົາ​ທຸກ​ອົງ​ການ​ກາ​ແດງ​ລາວ ພ້ອມ​ດ້ວຍ ​ຄະນະ​ ໄດ້​ນຳ​ເອົາ​​​ເຄື່ອງ​ຊ່ວຍເຫຼືອ​ບັນເທົາ​ທຸກເບື້ອງ​ຕົ້ນ ມາ​ມອບ​ໃຫ້​ແກ່​ຄອບຄົວ​ທີ່​ປະສົບ​ເຄາະ​ຮ້າຍ​ຈາກ​​ໄພ​ພິ​ບັດໄຟ​ໄໝ້​ເຮືອນທີ່​ ບ້ານ​ ດ່ານ​ຄຳ ເມືອງ​ ສີ​ໂຄດ​ຕະ​ບອງ ນະ​ຄອນຫຼວງວຽງ​ຈັນ.
ອີງ​ຕາມ​ການ​ລາຍ​ງານ​​ໄດ້​ໃຫ້​ຮູ້​ວ່າ: ໃນເວລາ 09:10 ນາ​ທີ ຂອງ​ວັນ​ທີ 17 ມິ​ຖຸ​ນາ 2021 ຢູ່​ບ້ານ​ດັ່ງກ່າວ​ໄດ້ເກີດ​ມີ​​ເຫດ​ການໄຟ​ໄໝ້​ເຮືອນ​ຂອງ​ປະຊາຊົນ ​ຈຳນວນໜຶ່ງ​ຢູ່​ພາຍ​ໃນ​ບ້ານ, ​ເຊິ່ງໄດ້​ຮັບ​ຜົນເສຍ​ຫາຍ​ທັງ​ໝົດຈຳ​ນວນ 3 ຄອບຄົວ, ຈຳ​ນວນ​ພົນ 14 ຄົນ, ຍິງ 8 ຄົນ ຢູ່​ພາຍ​ໃນ​ ບ້ານ​ດ່ານ​ຄຳ ເມືອງ​ ສີ​ໂຄດ​ຕະ​ບອງ ນະ​ຄອນຫຼວງວຽງ​ຈັນ ເຊິ່ງ​ເປັນ​ເຮືອນ​ຂອງ​ຄອບ​ຄົວ​ຂອງ​ທ່ານ ບຸນ​ປອນ, ຄອບ​ຄົວ​ທ່ານ ສາຍ​ຄຳ ແລະ ຄອບ​ຄົວ​ຂອງ​ທ່ານ ນາງ ນ້ອຍ ເຊິ່ງ​ເປັນ​ເຮືອນ​ວິນ​ລາ ຊັ້ນ​ເທິງ​ເຮັດ​ດ້ວຍ​ໄມ້ ຊັ້ນ​ລຸ່ມກໍ່​ດ້ວຍ​ສີ​ມັງ ຈຶ່ງ​ໄດ້​ເຮັດ​ໃຫ້​ໄຟ​ໄຫມ້​ລາມ​ຢ່າງ​ໄວ​ວາ ແລະ ເສຍ​ຫາຍ​ຢ່າງຫຼວງຫຼາຍ; ເຄື່ອງ​ທີ່​ນຳ​ມາ​ຊ່ວຍ​ເຫຼືອ​ໃນ​ຄັ້ງ​ນີ້​ປະ​ກອບ​ມີ: ເຄື່ອງ​ໃຊ້​ພາຍ​ໃນ​ຄົວ​ເຮືອນ, ເຂົ້າ​ຈ້າວ, ນ້ຳ​ດື່ມ, ແຟັບ, ສະ​ບູ, ໝີ່, ປ໋ອງ​ປາ, ສາດ, ມຸ້ງ, ຜ້າ​ຫົ່ມ ແລະ ເຄື່ອງນ​ຸ່ງ​ປະ​ສົມ ​ລວມ​ມູນ​ຄ່າ 3.162.000 ກີບ, ເຊິ່ງມອບ​ໂດຍ​ທ່ານ ດ​ຣ. ກາ​ວີ​ພອນ ສຸດ​ທິ ຫົວ​ໜ້າ​ກອງ​ຊ່ວຍ​ເຫຼືອ​ບັນ​ເທົາ​ທຸກ​ອົງ​ການ​ກາ​ແດງ​ລາວ ​ແລະ ​ກ່າວ​ຮັບ​ໂດຍຄອບ​ຄົວ​ຜູ້​ປະ​ສົບ​ໄພ ໂດຍ​ມີ​ອຳ​ນາດ​ການ​ປົກ​ຄອງ​ບ້ານ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ ເຄື່ອງ​ຈຳ​ນວນ​ດັ່ງ​ກ່າວ​ແມ່ນ​ໄດ້​ຮັບ​ການ​ສະ​ໜັບ​ສະ​ໜູນ​ຈາກ ສັງ​ຄົມ,ສະ​ພາ​ກາ​ຊາດ​ໄທ,ຄະ​ນະ​ກຳ​ມະ​ການ​ກາ​ແດງ​ສາ​ກົນ,ສະ​ຫະ​ພັນ​ກາ​ແດງ​ແລະ​ຊີກວົງ​ເດືອນ​ແດງ​ສາ​ກົນ.