ອົງການກາແດງລາວ

CROIX ROUGE LAO

ຈັດກິດຈະກຳຮັບບໍລິຈາກເລືອດເພື່ອສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 67ປີ.

ໃນວັນທີ 15 ກໍລະກົດ 2022, ຢູ່ທີ່ສູນການຄ້າລາວໄອເຕັກຊັ້ນ 4, ອົງການກາແດງແຫ່ງຊາດລາວ ຮ່ວມກັບ ສູນກາງສະຫະພັນແມ່ຍິງລາວ ໄດ້ຈັດກິດຈະກຳຮັບບໍລິຈາກເລືອດຂຶ້ນ ເພື່ອສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 67 ປີ(20/07/1955 – 20/07/2022)ຂຶ້ນ ພາຍໃຕ້ຄຳຂວັນ: ‘‘67 ປີ ມີໄຊ ຜູ້ຮັບດີໃຈ ຜູ້ໃຫ້ມີຄວາມສຸກ’’ ໂດຍການເຂົ້າຮ່ວມຂອງທ່ານ ຣສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານນາງ ສິລິກິດ ບຸບຜາ ຮອງປະທານສູນກາງສະຫະພັນແມ່ຍິງລາວ, ມີຕາງຫນ້າການຈັດຕັ້ງຈາກພະແນກການຕ່າງໆ, ຄະນະສະຫະພັນແມ່ຍິງລາວອອ້ມຂ້າງສູນກາງ – ນະຄອນຫຼວງ, ພະນັກງານລັດຖະກອນ ແລະ ມວນຊົນທົ່ວໄປເຂົ້າຮ່ວມໃນການບໍລິຈາກເລືອດ.
ວັນທີ 20 ກໍລະກົດ ແມ່ນວັນສ້າງຕັ້ງສະຫະພັນແມ່ຍິງລາວ ໃນແຕ່ລະປີສູນກາງສະຫະພັນແມ່ຍິງລາວໄດ້ມີການສະເຫຼີມສະຫຼອງວັນດັ່ງກ່າວ ເພື່ອລະນຶກເຖິງມູນເຊື້ອຂອງແມ່ຍິງລາວ ທີ່ໄດ້ຄຽງບ່າຄຽງໄລ່ກັບອ້າຍນ້ອງເພດດຊາຍໃນການຕໍ່ສູ້ປົດປ່ອຍຊາດໃນເມື່ອກ່ອນ ແລະ ປົກປັກຮັກສາພັກທະນາປະເທດຊາດໃນປັດຈຸບັນ, ການປະກອບສ່ວນຈັດກິດຈະກຳຮັບບໍລິຈາກເລືອດໃນຄັ້ງນີ້ ກໍ່ເພື່ອເປັນການຫຼຸດຜ່ອນການຕາຍຂອງແມ່ ແລະ ເດັກ, ເຊິ່ງເຫັນວ່າຢູ່ ສປປ ລາວ ພວກເຮົາ ອັດຕາການເສຍຊີວິດຂອງແມ່ຍິງຖືພາເກີດລູກຍັງມີໂຕເລກສູງພໍສົມຄວນ ເປັນຕົ້ນ ແມ່ນອາການເລືອດໄຫຼ ແລະ ຈຳເປັນຕ້ອງໄດ້ໃສ່ເລືອດ, ນອກນັ້ນຍັງມີ ອາການຈາກພະຍາດໄຂ້ເລືອດອອກອີກ ເຊິ່ງປັດຈຸບັນແມ່ນຢູ່ໃນໄລຍະຝົນ ພະຍາດໄຂ້ເລືອດອອກພວມລະບາດ, ສະນັ້ນ ການໃຫ້ການຊ່ວຍເຫລືອໃຫ້ແກ່ຄົນເຈັບທີ່ຂາດເລືອດ ໃນປີ 2021 ທີ່ຜ່ານມາ ອົງການກາແດງແຫ່ງຊາດລາວ ຮ່ວມກັບ ສູນກາງສະຫະພັນແມ່ຍິງ ກໍ່ໄດ້ຈັດກິດຈະກຳບໍລິຈາກເລືອດຂຶ້ນເຊິ່ງມີຜູ້ເຂົ້າຮ່ວມບໍລິຈາກເລືອດຫລາຍກວ່າ 1000ຄົນ ແລະ ໄດ້ຮັບເລືອດຕົວຈິງ 266 ຖົງ, ສຳລັບປີ 2022 ນີ້ແມ່ນມີຜູ້ປະກອບສ່ວນບໍລິຈາກເລືອດ 289 ຖົງ.