ອົງການກາແດງລາວ

CROIX ROUGE LAO

ຍົກລະດັບຄວາມຮູ້ໃຫ້ອາສາສະໝັກຊາວໝຸ່ມກາແດງກ່ຽວກັບພະຍາດບໍ່ຕິດຕໍ່.

ໃນວັນທີ 18 ມິຖຸນາ 2021 ທີ່ຫ້ອງປະຊຸມສູນເລືອດແຫ່ງຊາດ ອົງການກາແດງລາວ ໄດ້ຈັດໄດ້ຍົກລະດັບຄວາມຮູ້ໃຫ້ອາສາສະຫມັກກາແດງການປ້ອງກັນພະຍາດບໍ່ຕິດຕໍ່ພາຍໃຕ້ຫົວຂໍ້ການໃຊ້ຊີວິດເພື່ອສຸຂະພາບດີສຳລັບຊາວໜຸ່ມ ຂຶ້ນ ໂດຍການເຂົ້າຮ່ວມຂອງທ່ານ ນາງ ໄອ່ຄຳ ສໍອິນໄຊ ຮອງຫົວໜ້າກອງໂຄສະນາ ແລະ ຂົນຂວາຍແຫຼ່ງທຶນ ອົງການກາແດງລາວ, ມີທ່ານ ຄຳພັດ ເພັດລາສີ ຮອງຫົວໜ້າກົມກິລາມວນຊົນ, ພາລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ, ຄູຝຶກຈາກສະຫະພັນກາແດງ ແລະ ຊີກວົງເດືອນແດງສາກົນ ປະຈຳບາງກອກ, ປະຈຳພາກພື້ນ(ກວາລາລຳເປີ, ມາເລເຊຍ ການຝຶກອົບຮົມຜ່ານທາງວີດີໂອອອນລາຍ) ແລະ ທີມຄູຝຶກຈາກອົງການກາແດງລາວ, ພະນັກງານ-ອາສາສະໝັກຈາກສູນກາງ,ແຂວງ ວຽງຈັນ ແລະ ແຂວງ ໄຊສົມບູນ ເຂົ້າຮ່ວມທັງໝົດ 22 ຄົນ, ຍິງ 11 ຄົນ.
ຈຸດປະສົງຂອງການຝຶກອົບຮົມໃນຄັ້ງນີ້ ກໍ່ເພື່ອສ້າງອາສາສະໝັກຊາວໜຸ່ມ ໃຫ້ກາຍເປັນຜູ້ນຳພາກິດຈະກຳ ທີ່ເປັນຕົວແບບດ້ານການນຳໃຊ້ຊີວິດ ເຮັດໃຫ້ມີສຸຂະພາບດີ ທີ່ຈະນຳປະສົບການແບ່ງປັນແບບເພື່ອນສອນເພື່ອນ ແລະ ເພື່ອເສີມສ້າງໃຫ້ພະນັກງານອົງການກາແດງລາວ, ກາແດງແຂວງເປົ້າໝາຍທີ່ເປັນຄູຝຶກ ແລະ ເພື່ອນຮ່ວມງານຈາກກະຊວງສຶກສາທິການ ແລະ ກິລາ ໃຫ້ຮັບຮູ້, ເຂົ້າໃຈ ແລະ ພັດທະນາທັກສະ ໃນການສົ່ງເສີມສຸຂະພາບ ທີ່ດີໃຫ້ກັບຊາວໜຸ່ມໃນຂົງເຂດທີ່ຮັບຜິດຊອບ; ນອກຈາກນັ້ນ, ນັກສຳມະນາກອນຍັງໄດ້ຮຽນຮູ້, ສຶກສາ ກ່ຽວກັບພະຍາດທີ່ບໍ່ຕິດຕໍ່ ເປັນຕົ້ນພະຍາດເບົາຫວານ, ມະເຮັງ, ພະຍາດຫົວໃຈ, ພະຍາດທາງເດີນຫາຍໃຈຊຳເຮື້ອ(ປອດອັກເສບ, ຫົວໃຈຕີບ, ພູມແພ້ ແລະ ອື່ນໆ), ຜົນຮ້າຍຂອງຢາສູບ, ການກິນອາຫານທີ່ບໍ່ມີປະໂຫຍດ – ມີທາດໄຂມັນຫຼາຍ, ບໍ່ອອກກຳລັງກາຍຢ່າງສະໝ່ຳສະເໝີ ແລະ ຜົນຮ້າຍຂອງການດື່ມທາດເຫຼົ້າ ເພື່ອໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈ ເພື່ອນຳເອົາຄວາມຮູ້ນີ້ໄປບອກສອນຕໍ່ ສູ່ຊຸມຊົນ, ໝູ່ຄູ່ ແລະ ຄົນໃນຄອບຄົວໃຫ້ມີການປ່ຽນແປງພຶດຕິກຳໃນທາງທີ່ດີຂຶ້ນ, ຊຸດຝຶກອົບຮົມໃນຄັ້ງນີ້ ໄດ້ຮັບການສະໜັບສະໜູນຈາກອົງການກາແດງອີຕາລີ ຊຶ່ງໄດ້ດຳເນີນເປັນເວລາ 1 ວັນ.
ພາບແລະຂ່າວໂດຍ:ສຸກສະຫວັນ ຈັນທະວົງ