ອົງການກາແດງລາວ

CROIX ROUGE LAO

ທະນາຄານ ມາຣູຮານ ເຈແປນລາວ ປະກອບສ່ວນທຶນຮອນໃນວຽກງານຕ້ານພະຍາດໂຄວິດ-19 ໃຫ້ແກ່ອົງການກາແດງລາວ.

ໃນວັນທີ 22 ພະຈິກ 2021 ທີ່ອົງການກາແດງລາວ ໄດ້ມີພິທີມອບຮັບເງິນ ເພື່ອນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນເຊື້ອພະຍາດໂຄວິດ-19 ຂອງອົງການກາແດງລາວ ຈາກທະນາຄານ ມາຣູຮານ ເຈແປນລາວ ມູນຄ່າ 5,000,000 ກີບ (ຫ້າລ້ານກີບຖ້ວນ) ເພື່ອໃຫ້ອົງການກາແດງລາວນຳໃຊ້ເຂົ້າໃນວຽກງານໂຄວິດ-19 ທີ່ອົງການກາແດງລາວ ຮັບຜິດຊອບຢູ່ ເປັນຕົ້ນແມ່ນຄ່າໃຊ້ຈ່າຍຄ່າອາຫານໃຫ້ແກ່ໂຮງໝໍພາກສະໝາມຫຼັກ 27 ແລະ ບັນດາກາແດງແຂວງຕ່າງໆ ທີ່ພວມປະຕິບັດໜ້າທີ່ໃນວຽກງານດັ່ງກ່າວນີ້,ເຊິ່ງໃຫ້ກຽດກ່າວມອບໂດຍ ທ່ານ ແອນໂທນີ່ ຊິນ (Mr. Anthony Chin) ຜູ້ອຳນວຍການໃຫຍ່ ທະນາຄານ ມາຣູຮານ ເຈແປນລາວ ແລະ ກ່າວຮັບໂດຍ ທ່ານ ຮສ.ດຣ. ພູທອນ ເມືອງປາກ ປະທານອົງການກາແດງລາວ; ພ້ອມດ້ວຍ ພະນັກງານທີ່ກ່ຽວຂ້ອງ ເຂົ້າຮ່ວມ.
ໃນພິທີດັ່ງກ່າວທ່ານ ຮສ.ດຣ. ພູທອນ ເມືອງປາກ ປະທານອົງການກາແດງລາວ ໄດ້ກ່າວສະແດງຄວາມຂອບໃຈຕໍ່ທາງທະນາຄານ ມາຣູຮານ ເຈແປນລາວ ທີ່ໄດ້ປະກອບສ່ວນວັດຖຸປັດໃຈຊ່ວຍເຫລືອໃນວຽກງານຕ້ານພະຍາດໂຄວິດ-19, ທ່ານຍັງໄດ້ໃຫ້ຮູ້ຕື່ມອີກວ່າໃນໄລຍະຜ່ານມາອົງການກາແດງລາວໄດ້; ປະກອບສ່ວນໃນວຽກງານ ໂຄສະນາເຜີຍແຜ່ມາດຕະການປ້ອງກັນການຕິດເຊື້ອ, ແຜ່ເຊື້ອ ຢູ່ໃນຊຸມຊົນ ແລະ ສູນຈຳກັດບໍລິເວນ, ການປະກອບສ່ວນໃນຄັ້ງນີ້ແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງສະພາບການໃນປັດຈຸບັນ ເຊິ່ງໄດ້ສະແດງເຖິງຄວາມມີສະຕິຕື່ນຕົວທາງດ້ານການເມືອງ, ຄວາມເສຍສະຫຼະ, ຄວາມເອື້ອເຟື້ອເພື່ອແຜ່, ຄວາມເປັນຫ່ວງເປັນໃຍ, ຄວາມເປັນແບບຢ່າງທີ່ດີ ແລະ ກາຍເປັນກຳລັງແຮງອັນໃຫຍ່ຫຼວງໃຫ້ແກ່ປະເທດຊາດ ແລະ ປະຊາຊົນ ໂດຍສະເພາະພະນັກງານ ແພດໝໍ, ອາສາສະໝັກ ແລະ ເຈົ້າໜ້າທີ່ທຸກຄົນທີ່ພວມປະຕິບັດໜ້າທີ່ຕ້ານການແຜ່ລະບາດຂອງເຊື້ອພະຍາດໂຄວິດ-19 ຢູ່ໃນທົ່ວປະເທດ, ທ່ານຍັງໄດ້ຮຽກຮ້ອງໃຫ້ພາກສ່ວນໃນທຸກສັງຄົມຈົ່ງເພີ່ມທະວີຄວາມມີສະຕິລະມັດລະວັງ ເປັນເຈົ້າການໃນການຈັດຕັ້ງປະຕິບັດບັນດາມາດຕະການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຢ່າງເຂັ້ມງວດ, ເວົ້າລວມເວົ້າສະເພາະ ສະເໜີໃຫ້ບັນດາພາກສ່ວນຕ່າງໆໃນສັງຄົມຈົ່ງຊ່ວຍປຸກລະດົມ ອະທິບາຍຊີ້ແຈງໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນໄດ້ຮັບຮູ້ ແລະ ຄວາມເຂົ້າໃຈຄວາມອັນຕະລາຍຂອງເຊື້ອພະຍາດໂຄວິດ-19, ພ້ອມທັງໃຫ້ຄຳໝັ້ນສັນຍາວ່າ ຈະນຳໃຊ້ເງິນທີ່ໄດ້ຮັບການຊ່ວຍເຫຼືອຊ່ວຍໃນຄັ້ງນີ້ ໃຫ້ຖືກກັບຈຸດປະສົງ ແລະ ເປົ້າໝາຍໃຫ້ເກີດປະໂຫຍດທີ່ສູງສຸດ.