ອົງການກາແດງລາວ

CROIX ROUGE LAO

ທ່ານປະທານອົງການກາແດງລາວຕ້ອນຮັບແຂກຍີ່ປຸ່ນ

ຕອນເຊົ້າຂອງວັນທີ 11 ກັນຍາ 2019 ທີ່ຫ້ອງຮັບແຂກອົງການກາແດງລາວ ໄດ້ຈັດພິທີຕ້ອນຮັບ ຄະນະຜູ້ແທນ ມູນນິທິກູ້ໄພຍີ່ປຸ່ນທີ່ເດີນທາງມາຊ່ວຍຝຶກອົບຮົມ ວຽກງານກູ້ໄພໃຫ້ແກ່ພະນັກງານ; ອາສາສະໝັກກູ້ໄພອົງການກາແດງລາວຊຶ່ງຈະຈັດຂຶ້ນໃນວັນທີ 12-13 ກັນຍາ2019ນີ້ທີ່ນະຄອນຫຼວງວຽງຈັນ. ພິທີດັ່ງກ່າວ ທາງຝ່່າຍແຂກນຳໂດຍທ່ານ: ເຄັນຈິ ອິຊາຢາມະ( Kenji ISAYAMA) ປະທານມູນນິທິໄດ້ກ່າວສະເໜີຈຸດປະສົງໃນການມາພົບໃນຄັ້ງນີ້ ແລະ ທ່ານຄຳຮຸ່ງເຮືອງວົງສີ ປະທານອົງການກາແດງລາວ ໄດ້ລາຍງານຫຍໍ້ສະພາບການຂອງ ສາທາລະນະລັດປະຊາທິປະໄຕປະຊາຊົນລາວ ຜ່ານສົງຄາມທຳລາຍ ມີລະເບີດຕົກຄ້າງຫຼາຍ. ຍາກຕໍ່ການພັດທະນາສ້າງສາປະເທດຊາດໃນຂະນະດຽວກັນ ປະເທດລາວເປັນປະເທດທີ່ສວຍງາມ ແລະ ເປັນໜ້າປະທັບໃຈ.ບໍ່ວ່າຈະເປັນນ້ຳໃຈຂອງຄົນລາວ ; ຮີດຄອງປະເພນີ; ທຳມະຊາດທີ່ສວຍສົດງົດງາມ; ຮ່ອງຮອຍທາງປະຫວັດສາດ…ທ່ານຍັງເນັ້ນໃຫ້ເຫັນສາຍພົວພັນລະຫວ່າງ ລາວ – ຍີ່ປຸ່ນ ແຕ່ອາດີດຈົນເຖິງປະຈຸບັນນັບມື້ນັບຂະຫຍາຍຕົວຢ່າແໜ້ນແຟ້ນ; ຜ່ານມາສະພາກາແດງຍີ່ປຸ່ນກໍ່ໄດ້ໃຫ້ການຊ່ວຍເຫຼືອແກ່ອົງການກາແດງລາວຕະຫຼອດ 20 ປີຜ່ານມາໂດຍສະເພາະວຽກງານເລືອດ ແລະ ທ່ານໄດ້ນຳສະເໜີປະວັດຄວາມເປັນມາ; ພາລະບົດບາດ ແລະ 09 ໜ້າວຽກທີ່ອົງການກາແດງລາວພວມຈັດຕັ້ງປະຕິບັດ ໃນນັ້ນ ວຽກງານ ກູ້ໄພ ຂອງອົງການກາແດງລາວແມ່ນວຽກງານໜຶ່ງທີ່ສຳຄັນ ແລະ ມີຄວາມຈຳເປັນເພື່ອໃຫ້ການບໍລິການປະຊາຊົນບັນດາເຜົ່າ ເວລາປະສົບໄພພິບັດ; ອຸປະຕິເຫດທາງຖະໜົນ…ໃຫ້ຫຼຸດຜ່ອນການເຈັບປວດ; ພິການ; ເສຍຊີວິດ ແຕ່ການເຄື່ອນໄຫວວຽກງານນີ້ ແມ່ນຍັງມີຄວາມຫຍຸ້ງຍາກສັບສົນຢູ່ ບໍ່ວ່າຈະເປັນ ຈຳນວນພົນ;ຄວາມຮູ້ຄວາມສາມາດ;ທັກສະ;ອຸປະກອນ ແລະ ພາຫະນະຮັບໃຊ້;ສະຖານທີ່ພັກເຊົາຍັງມີຄວາມຈຳເປັນອັນຮີບດ່ວນ ໃນອານາຄົດ ທາງມູນນິທິກູ້ໄພຍີ່ປຸ່ນ ແລະ ອົງການກາແດງລາວຍັງຈະຕ້ອງຮ່ວມມືກັນ ແລະ ສ້າງບົດບັນທຶກຊ່ວຍຈຳນຳກັນອີກ ແລະຕອນທ້າຍທ່ານປະທານອົງການກາແດງລາວຍັງມອບຂອງທີ່ລະນຶກໃຫ້ແກ່ມູນນິທິກູ້ໄພຍີ່ປຸ່ນ,ພິທີດັ່ງກ່າວເຕັມໄປດ້ວຍໄມຕີຈິດມິດຕະພາບອັນອົບອຸ່ນ.