ອົງການກາແດງລາວ

CROIX ROUGE LAO

ທ່ານພູວົງ ພະມີສິດ ພ້ອມດ້ວຍພະນັກງານປະກອບສ່ວນບໍລິຈາກເລືອດຊ່ວຍເຫຼືອສັງຄົມ.

ໃນວັນທີ 16 ກໍລະກົດ 2022, ທີ່ສຳນັກງານໃຫຍ່ຮ້ານຄຳພູວົງ ໄດ້ຈັດກິດຈະກຳບໍລິຈາກເລືອດຮ່ວມກັບອົງການກາແດງແຫ່ງຊາດລາວຂຶ້ນ, ໂດຍການເຂົາ້ຮ່ວມຂອງທ່ານ ຮສ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດ, ທ່ານ ພູວົງ ພະມີສິດ ປະທານຮ້ານຂາຍຄຳພູວົງ ພ້ອມດ້ວຍພະນັກງານເຂົ້າຮ່ວມ.
ຈຸດປະສົງ ການຈັດກິດຈະກຳຮັບບໍລິຈາກເລືອດໃນຄັ້ງນີ້, ກໍ່ເພື່ອເປັນປະກອບສ່ວນຊ່ວຍເຫຼືອສັງຄົມ ແລະ ທັງເປັນການໃຫ້ເລືອດມີແຮໄວ້ໃຊ້ໃຫ້ແກ່ຄົນເຈັບປິ່ນປົວພະຍາດຕ່າງໆເຊັ່ນ: ພະຍາດຂາດເລືອດ, ໄຂ່ຫຼັງຊຸດໂຊມ, ການຜ່າຕັດ, ອຸປະຕິເຫດ, ການຖືພາ ແລະ ການເກີດລູກຜິດປົກກະຕິ, ມະເຮັງເມັດເລືອດຂາວ ແລະ ພະຍາດອື່ນໆ; ສິ່ງທີ່ສຳຄັນທີ່ສຸດໃນປະຈຸບັນ ກໍ່ຄືພະຍາດໄຂ້ເລືອດອອກ ພວມແຜ່ລະບາດຢູ່ໃນ ສ ປປລາວ ສະນັ້ນ, ຈຶ່ງຕ້ອງໄດ້ມີຄວາມຈຳເປັນທີ່ສຸດໃນການປຸກລະດົມຂົນຂວາຍບໍລິຈາກເລືອດເພື່ອໃຫ້ເລືອດມີແຮໄວ້ໃຊ້ ຢ່າງເປັນປົກກະຕິ, ທັນເວລາ ແລະ ປອດໄພ; ການລົງເຄື່ອນໄຫວຮັບບໍລິຈາກເລືອດໃນຄັ້ງນີ້ໄດ້ເລືອດຕົວຈິງທັງໝົດ 51ຖົງ.