ອົງການກາແດງລາວ

CROIX ROUGE LAO

ບ້ານ ຕຸ້ມແຍ ແລະ ບ້ານ ທ່າຄຳເລື່ອມໄດ້ຮັບການຊ່ວຍເຫຼືອ

ໃນວັນທີ 23 ກັນຍາ 2019 ອົງການກາແດງລາວ ນຳໂດຍທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ພ້ອມດ້ວຍຄະນະ ໄດ້ນຳເຄື່ອງຊ່ວຍເຫຼືອບັນເທົາທຸກ ໄປມອບໃຫ້ແກ່ປະຊາຊົນຜູ້ທີ່ຮັບຜົນກະທົບຈາກໄພພິບັດນຳ້ຖ້ວມ ບ້ານ ຕຸ້ມແຍ 124 ຄອບຄົວ ແລະ ບ້ານ ທ່າຄຳເລື່ອມ 144 ຄອບຄົວ ເມືອງ ຊົນນະບູລີ ແຂວງ ສະຫວັນນະເຂດ, ເຄື່ອງທີ່ນຳມາຊ່ວຍເຫຼືອໃນຄັ້ງນີ້ ປະກອບມີ: ເຂົ້າໜຽວ, ໝີ່ສຳເລັດຮູບ, ປາກະປ໋ອງ, ນຳ້ດື່ມ, ນຳ້ມັນພືດ, ເກືອ, ກັບໄຟແຊັກ, ທຽນໄຂ, ສະບູ, ຢາສີຟັນ, ຜ້າອານະໄມ ແລະ ຢາປົວພະຍາດ. ກ່າວມອບໂດຍທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ແລະ ກ່າວຮັບໂດຍທ່ານນາຍບ້ານທັງສອງບ້ານ ໂດຍຊ້ອງໜ້າປະຊາຊົນພາຍໃນບ້ານດັ່ງກ່າວ, ລວມມູນຄ່າການຊ່ວຍເຫຼືອທັງໝົດ 65,660,000 ກີບ, ເຄື່ອງຈຳນວນດັ່ງກ່າວນີ້ ແມ່ນໄດ້ຮັບການສະໜັບສະໜູນຈາກ ບໍລິສັດ ລົງທຶນພັດທະນາລາວ; ບໍລິສັດ ນະຄອນຊັບ ຈໍາກັດຜູ້ດຽວ; ບໍລິສັດ ຊາວອີສເອເຊຍ ທາວເວີ ຈຳກັດ (Southeast Asia Tower Company Limited) ແລະ ບໍລິສັດ ກໍ່ສ້າງ-ລົງທຶນ ແລະ ຖືຮຸ້ນແຂວງຢຸນນານ ຈໍາກັດ ໃນຕອນທ້າຍທ່ານ ຄຳຮຸ່ງ ເຮືອງວົງສີ ກໍ່ໄດ້ໃຫ້ກຽດໂອ້ລົມ ໃຫ້ກຳລັງໃຈພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບ ຈົ່ງຜ່ານຜ່າວິກິດໄພນຳ້ຖ້ວມໃນຄັ້ງນີ້ໃຫ້ຜ່ານໄປດ້ວຍດີ ຕັ້ງໜ້າສ້າງສາພັດທະນາຊີວິດການເປັນຢູ່ໃຫ້ດີຂຶ້ນກວ່າເກົ່າ.