ອົງການກາແດງລາວ

CROIX ROUGE LAO

ບໍລິຄຳໄຊຈັດກິດຈະກຳສະເຫຼີມສະຫຼອງວັນກາແດງສາກົນ

ໃນຕອນເຊົ້າຂອງວັນທີ 10 ພຶດສະພາ 2022 ຄະນະບໍລິຫານງານຊາວໜຸ່ມແຂວງ ບໍລິຄໍາໄຊ ຮ່ວມກັນກັບອົງການກາແດງແຂວງ ໄດ້ຈັດກິດຈະກໍາບໍລິຈາກເລືອດ ຢູ່ສະໂມສອນໃຫຍ່ຂອງແຂວງ ເພື່ອເປັນການສະເຫຼີມສະຫຼອງ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 67 ປີ (14 ເມສາ 1955 – 14 ເມສາ 2022), ວັນກາແດງສາກົນ ແລະ ຊີກວົງເດືອນແດງສາກົນ ວັນທີ08 ພຶດສະພາ 1863 – 08 ພຶດສະພາ 2022) ໂດຍເຂົ້າຮ່ວມຂອງ ສະຫາຍ ປອ ກອງແກ້ວ ໄຊສົງຄາມ ກໍາມະການຄະນະບໍລິຫານງານສູນກາງພັກ, ເລຂາພັກແຂວງ, ເຈົ້າແຂວງ ບໍລິຄໍາໄຊ, ສະຫາຍ ທອງມະນີ ໂຄດປັນຍາ ກຳມະການພັກແຂວງ, ກຳມະການສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມແຂວງ ພ້ອມດ້ວຍຄະນະຊາວໜຸ່ມ ແລະ ອາສາສະໝັກ ບໍລິຈາກເລຶອດເຂົ້າຮ່ວມຢ່າງພ້ອມພຽງ ແລະ ຟົດຟຶ້ນ.
ໃນພິທີ ສະຫາຍ ນາງ ວັນເພັງ ໄຊສົງຄາມ ຫົວໜ້າອົງການກາແດງແຂວງ ໄດ້ຂຶ້ນກ່າວສະເໜີຄວາມສໍາຄັນ ແລະ ຄວາມຈໍາເປັນຂອງການບໍລິຈາກເລືອດ ໃນກິດຈະກໍາບໍລິຈາກເລືອດຊ່ວຍເຫຼືອສັງຄົມໃນຄັ້ງນີ້ ພາຍໃຕ້ຄໍາຂວັນ “ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມຜ່ານຜ່າ ເມື່ອໃດຊາດຕ້ອງການຊາວໜຸ່ມຂານອາສາ” ມີອາສາສະໝັກບໍລິຈາກເລືອດເຂົ້າຮ່ວມ 122 ສະຫາຍ ໄດ້ເລືອດ 53 ຖົງ.ພ້ອມກັນນັ້ນໄດ້ມີພາກສ່ວນຕ່າງໆອຸປະຖຳກິດຈະກຳບໍລິຈາກເລືອດຄັ້ງນີ້: ຮ້ານອາຫານກຸຫຼາບປາກຊັນຊຸກຍູ້ອາຫານໃຫ້ຜູ້ບໍລິຈາກເລືອດ ມູນຄ່າ 2 ລ້ານກີບ, ຮ້ານຂາຍຄຳຕຸກກີ່ 1 ລ້ານກີບ ແລະ ສະມາຄົມນັກທຸລະກິດໜຸ່ມແຂວງ 8 ແສນກີບ.
ກິດຈະກໍາ ສະຫາຍ ທອງມະນີ ໂຄດປັນຍາ ກໍາມະການພັກແຂວງ, ກໍາມະການສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມແຂວງ ພ້ອມດ້ວຍຄະນະ ໄດ້ໃຫ້ກຽດຂຶ້ນມອບໃບຍ້ອງຍໍໃຫ້ແກ່ຊາວໜຸ່ມອາສາສະໝັກບໍລິຈາກເລືອດ ແລະ ຜູ້ອຸປະຖຳໃນກິດຈະກໍາຄັ້ງນີ້ດ້ວຍ.