ອົງການກາແດງລາວ

CROIX ROUGE LAO

ບໍລິສັດ ຊີພີ ລາວ ຈຳກັດ ປະກອບສ່ວນຊ່ວຍເຫຼືອໃຫ້ແກ່ອົງການກາແດງລາວ.

ໃນວັນທີ 24 ພະຈິກ 2021 ທີ່ອົງການກາແດງລາວ ໄດ້ມີພິທີມອບ-ຮັບ ເຄື່ອງຊ່ວຍເຫຼືອຈາກ ບໍລິສັດ ຊີພີ ລາວ ຈຳກັດ ໃຫ້ກຽດກ່າວມອບໂດຍທ່ານ ບຸນສົ່ງ ມູນແກ້ວ ຜູ້ຈັດການທົ່ວໄປ ບຸກຄົນແລະທຸລະການ ບໍລິສັດ ຊີພີ ລາວ ຈຳກັດ ແລະ ໃຫ້ກຽດກ່າວຮັບໂດຍທ່ານ ຮສ. ດຮ ພູທອນ ເມືອງປາກ ປະທານອົງການກາແດງລາວ. ເພື່ອປະກອບສ່ວນເຂົ້າໃນການຈັດຕັ້ງປະຕິບັດວຽກງານຂອງອົງການກາແດງລາວ ໃນວຽກງານຕ້ານພະຍາດໂຄວິດ-19 ຂອງອົງການກາແດງລາວ, ສຳລັບເຄື່ອງທີ່ນຳມາຊ່ວຍເຫຼືອໃນຄັ້ງນີ້ປະກອບມີ: ໄຂ່ໄກ່ 30 ເເຕະ, ນໍ້າດື່ມ 50 ແພັກ, ລວມມູນຄ່າ 1.500.000ກີບ.
ທ່ານ ຮສ.ດຣ. ພູທອນ ເມືອງປາກ ປະທານອົງການກາແດງລາວ ໄດ້ກ່າວສະແດງຄວາມຂອບໃຈຕໍ່ ບໍລິສັດ ຊີພີ ລາວ ຈຳກັດ ທີ່ໄດ້ນຳເອົາເຄື່ອງຊ່ວຍເຫລືອໃນວຽກງານຕ້ານພະຍາດໂຄວິດ-19 ມາມອບໃຫ້ໃນຄັ້ງນີ້, ເຊິ່ງເຄື່ອງຈຳນວນດັ່ງກ່າວ ແມ່ນຈະໄດ້ນຳໄປຊ່ວຍເຫລືອຜູ້ປະສົບໄພໂຄວິດ-19 ຢູ່ສູນຈໍາກັດບໍລິເວນ ແລະ ໂຮງໝໍສະໜາມຫຼັກ 27 ທີ່ອົງການກາແດງລາວຮັບຜິດຊອບຢູ່, ເຊິ່ງມີຄວາມຕ້ອງການເຄື່ອງຈຳນວນດັ່ງກ່າວນີ້ເປັນຈຳນວນຫຼາຍ ເພາະວ່າໃນປັດຈຸບັນ ອີງຕາມສະຖານະການໂຄວິດ-19 ທີ່ພວມລະບາດຢູ່ ສປປປລາວ ແມ່ນມີລັກສະນະເພີ່ມຂຶ້ນໃນແຕ່ລະມື້ ແລະ ມີຄວາມຕ້ອງການເຄື່ອງອຸປະໂພກ – ບໍລິໂພກ ແລະ ທຶນຮອນ ເພື່ອນຳໃຊ້ເຂົ້າຮັບໃຊ້ໃນວຽກງານຕ້ານ ແລະ ສະກັດກັ້ນເຊື້ອພະຍາດດັ່ງກ່າວນີ້.