ອົງການກາແດງລາວ

CROIX ROUGE LAO

ປະກາດແຕ່ງຕັ້ງຫົວໜ້າອົງການກາແດງແຂວງໄຊສົມບູນຜູ້ໃໝ່

ໃນວັນທີ 23ມີນາ 2022 ນີ້ ຢູ່ທີ່ ຫ້ອງປະຊຸມໃຫຍ່ຫ້ອງວ່າການປົກຄອງແຂວງໄຊສົມບູນ ໄດ້ຈັດພິທີ ແຕ່ງຕັ້ງຫົວໜ້າອົງການກາແດງແຂວງໄຊສົມບູນ ຄົນໃໝ່ ໂດຍເປັນກຽດເຂົ້າຮ່ວມຂອງທ່ານ ພົຕ ວົງສອນ ອິນປານພິມ ຮອງເລຂາພັກແຂວງໄຊສົມບູນ,ທ່ານ ຮສ ດຣ ສິງ ເມໂນລາດຮອງປະທານອົງການກາແດງແຫ່ງຊາດລາວ,ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານ ບຸນຖະໜອມ ສິດທິນໍລາດ ຮອງຫົວໜ້າພະແນກຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງວ່າດ້ວຍການອະນຸມັດໃຫ້ລັດຖະກອນພັກການ-ຮັບອຸດໜູນບຳນານ ສະບັບເລກທີ 0085/ຈຂ.ຊບ,ລົງວັນທີ25/01/2022 , ເຈົ້າແຂວງໄຊສົມບູນຕົກລົງເຫັນດີໃຫ້ທ່ານ ດຣ ຄຳປານ ເພັດວົງສາ ຫົວອົງການກາແດງແຂວງໄຊສົມບູນ ຜູ້ເກົ່າ ເຂົ້າຮັບອຸດໜູນບຳນານ ເຊິ່ງອິງຕາມກົດໝາຍວ່າດ້ວຍພະນັກງານ-ລັດຖະກອນສະບັບເລກທີ74/ສພຊ,ລົງວັນທີ 18 ທັນວາ 2015 ແລະ ຜ່ານຂໍ້ຕົກລົງວ່າດ້ວຍການແຕ່ຕັ່ງຫົວໜ້າອົງການກາແດງແຂວງໄຊສົມບູນຜູ້ໃໝ່, ສະບັບເລກທີ 0137/ຈຂ.ຊບ, ລົງວັນທີ08/02/2022 ວ່າດ້ວຍເຈົ້າແຂວງໄຊ ຕົກລົງແຕ່ຕັ້ງທ່ານ ດຣ ບົວເກດ ວົງປະເສີດ ເປັນຫົວຫົວອົງການກາແດງແຂວງໄຊສົມບູນ ຜູ້ໃໝ່
ພ້ອມທັງມອບ-ຮັບໜ້າທີ່ ລະຫວ່າງຫົວໜ້າອົງການການແດງແຂວງໄຊສົມບູນຜູ້ເກົ່າແລະຜູ້ໃໝ່
ຈາກນັ້ນ ທ່ານ ຮອງເລຂາພັກແຂວງຍັງໄດ້ສະແດງຄວາມຊົມເຊີຍຕໍ່ຜົນສຳເລັດທີ່ຍາດມາໄດ້ໃນໄລຍະຜ່ານມາແລະສືບຕໍ່ໃຫ້ເອົາໃຈໃສ່ເປັນຕົ້ນແມ່ນ ເອົາໃຈໃສ່ວຽກງານໂຄສະນາ,ເຜີຍແຜ່ກົດໝາຍວ່າດ້ວຍວຽກງານກາແດງ ແລະ ນິຕິກຳຕ່າງໆທີ່ກ່ຽວຂ້ອງເພື່ອໃຫ້ສັງຄົມເຂົ້າໃຈຕໍ່ຫຼັກການພື້ນຖານຂອງຂະບວນການກາແດງ ແລະ ສົ່ງເສີມຄຸນຄ່າດ້ານມະນຸດສະທຳ;ປັບປຸງແບບແຜນວິທີເຮັດວຽກ,ສ້າງແຜນພັດທະນາວຽກງານກາແດງແຂວງໃຫ້ສອດຄ່ອງກັບແຜນພັດທະນາ5ປີ ແລະແຜນຍຸດທະສາດ10ປີແຕ່ປີ 2021-2030ຂອງອົງການກາແດງແຫ່ງຊາດລາວຕິດພັນກັບດຳລັດ 414/ລບແລະ ແຜນພັດທະນາເສດຖະກິດຂອງແຂວງໄຊສົມບູນ; ປັບປຸງກົນໄກການປະສານງານຕາມສາຍຕັ້ງ,ສາຍຂວາງ;ເອົາໃຈໃສ່ປຸກລະດົມຂົນຂວາຍວຽກງານເລືອດໃຫ້ຫຼາຍຂຶ້ນເພື່ອໃຫ້ຮັບປະກັນຄວາມພຽງພໍຊົມໃຊ້ຕໍ່ຜູ້ທີ່ມີຄວາມຕ້ອງການຊົມໃຊເລືອດ ຮັບປະກັນສະໜອງເລືອດພຽງພໍ ແລະ ປອດໄພ.