ອົງການກາແດງລາວ

CROIX ROUGE LAO

ປະຊາຊົນ 03 ເມືອງ ພາຍໃນແຂວງວຽງຈັນ ໄດ້ຮັບອຸປະກອນເຕືອນໄພຈາກອົງການກາແດງແຫ່ງຊາດລາວ

ໃນລະຫວ່າງວັນທີ 26 – 29 ພຶດສະພາ 2022 ຢູ່ທ່ີແຂວງວຽງຈັນ ໄດ້ຈັດພີທີມອບອຸປະກອນເຕືອນໄພລ່ວງໜ້າຈາກອົງການກາແດງລາວໃນໂຄງການ ຫຼຸດຜ່ອນຄວາມສ່ຽງໄພພິບັດ ເຊື່ອມສານວຽກງານສົ່ງເສີມສຸຂະພາບຊຸມຊົນຂຶ້ນ ທີ່ແຂວງ ວຽງຈັນ, ເຊິ່ງໃນຄັ້ງນີ້ເປັນໄລຍະທີ 04 ຂອງໂຄງການການທີ່ໄດ້ຈັດຕັ້ງປະຕິບັດພາຍໃນແຂວງ ວຽງຈັນ ເຊິ່ງໃນໄລຍະຜ່ານມາແມ່ນໄດ້ ຈັດຕັ້ງປະຕິບັດມາແຕ່ປີ 2016 ເປັນຕົ້ນມາ; ສຳລັບໄລຍະທີ1 2016-2017 ແມ່ນໄດ້ຈັດຕັ້ງປະຕິບັດຢູ່ 03 ເມືອງ 11 ບ້ານຄື: ເມືອງໂພນໂຮງ, ວັງວຽງ ແລະ ຊະນະຄາມ; ໄລຍະທີ2 ແມ່ນໄດ້ຈັດຕັ້ງປະຕິບັດພາຍໃນປີ 2018 ມີ 12 ບ້ານ, 03 ເມືອງເປົ້າໝາຍຄື: ເມືອງເຟືອງ, ເມືອງ ໝື່ນ ແລະ ເມືອງ ຊະນະຄາມ; ໄລຍະທີ 03 ເລີ່ມແຕ່ປີ 2019-2020 ແມ່ນໄດ້ຈັດຕັ້ງປະຕິບັດ ຢູ່ເມືອງທຸລະຄົມ ມີ 9 ບ້ານເປົ້າໝາຍ ແລະ ໄດ້ສ້າງຄວາມເຂັ້ມແຂງໃຫ້ແກ່ໜ່ວຍງານກູ້ໄພອົງການກາແດງແຂວງໄດ້ສະໜອງລົດນຳສົ່ງຄົນເຈັບ ຈຳນວນ 1 ຄັນ, ສ້າງບ່ອນຈອດລົດ ແລະ ທີ່ພັກຂອງອາສາສະໝັກກູ້ໄພກາແດງ ປະຈຳແຂວງ ວຽງຈັນ, ສະນັ້ນ; ເພື່ອເປັນສືບຕໍ່ປະຕິບັດໂຄງການ ໃນການສະໜອງອຸປະກອນເຕືອນໄພລ່ວງໜ້າ, ນ້ຳລິນແລະ ວິດຖ່າຍ ໃຫ້ແກ່ 03 ເມືອງ, 15 ບ້ານຂອງແຂວງວຽງຈັນ ໄດ້ແກ່: ເມືອງ ທຸລະຄົມ, ເມືອງ ເຟືອງ ແລະ ເມືອງແມດ ເພື່ອເປັນການສ້າງຂີດຄວາມສາມາດໃຫ້ແກ່ຊຸມຊົນຕໍ່ການກະກຽມຄວາມພ້ອມຮັບມືກັບໄພພິບັດໃນຊຸມຊົນ ຢ່າງມີປະສິດທິພາບ ພ້ອມທັງເປັນການຫຼຸດຜ່ອນຜົນກະທົບທີ່ເສຍຫາຍຕໍ່ຊີວິດ, ຊັບສິນ, ທີ່ຢູ່ອາໄສ ແລະ ພື້ນທີ່ທຳການຜະລິດ ຂອງປະຊາຊົນ ໃຫ້ໄດ້ຮັບການພັດທະນາ ແລະ ຟື້ນຟູເທື່ອລະກ້າວ ນອກຈາກນັ້ນຍັງເປັນການສົ່ງເສີມໃຫ້ຊຸມຊົນ ເຂົ້າເຖິງສຸຂະອານາໄມຂຶ້ນພື້ນຖານ.
ການຕັ້ງປະຕິບັດກິດຈະກຳຫຼັກຂອງໂຄງການໃນຄັ້ງນີ້ ແມ່ນແນໃສ່ 03 ເມືອງ 15 ບ້ານເປົ້າໝາຍ ພາຍໃນແຂວງວຽງຈັນ ເຊິ່ງໄດ້ເລີ່ມຈັດຕັ້ງປະຕິບັດພາຍໃນເດືອນ ພຶດສະພາ 2021 ຫາ ພຶດສະພາ 2022 ແມ່ນສຳເລັດໂຄງການ ເຊິ່ງໄດ້ມີການຈັດຝຶກອົບຮົມໃຫ້ຄວາມຮູ້, ວິທີວາງແຜນກະກຽມຄວາມພ້ອມຮັບມືກັບໄພພິບັດ ສຳລັບເມືອງທຸລະຄົມ ປະກອບມີບ້ານ ບຸ່ງພ້າວ, ບ້ານຈຸ້ມ, ບ້ານແຈ້ງ, ລິ່ງຊັນ ແລະ ບ້ານຫາດສ້ຽວ ແມ່ນໄດ້ມອບເຮືອຫາງຍາວຈຳນວນ 06 ລຳ; ສຳລັບເມືອງເຟືອງ ປະກອບມີ: ບ້ານ ເມືອງເຟືອງ, ສາມໝື່ນ, ຄອນເລືອງ, ຫ້ວຍເດື່ອ ແລະ ບ້ານ ນາອ່າງແມ່ນໄດ້ມອບເຮືອຫາງຍາວຈຳນວນ 04 ລຳ, ເຄື່ອງຈັກເຮືອຫາງຍາວ 13 ແຮງມ້າ ຈຳນວນ 05 ໜ່ວຍ, ຖົງປະຖົມພະຍາບານປະຈຳບ້ານ, ໂທລະໂຄ່ງ 20 ຫນ່ວຍ, ວິທະຍຸ, ເສື້ອຊູຊີບ 35 ຜືນ, ແອັມ 4 ໜ່ວຍ, ໄມໂຄໂຟນ 05 ອັນ, ເຊືອກ 05 ຊຸດ, ກົງເບັງ 10 ອັນ; ນອກຈາກນັ້ນ, ຍັງໄດ້ສະໜອງນ້ຳບາດານ ຈຳນວນ 02 ບໍ່ ແລະ ວິດຖ່າຍຈຳນວນ 99 ໜ່ວຍ ໃຫ້ແກ່ປະຊາຊົນ ບ້ານ ນາຄຳ, ຜາສັງ ແລະ ບ້ານປາກຮາງ; ສ່ວນເມືອງ ແມດ ແມ່ນໄດ້ສະໜອງ ນ້ຳບາດານ ຈຳນວນ 02 ບໍ່ ແລະ ວິດຖ່າຍຈຳນວນ 83 ໜ່ວຍ ໃຫ້ແກ່ປະຊາຊົນບ້ານ ເມືອງຄີ່ ແລະ ບ້ານນ້ຳແຜນ, ຍັງໄດ້ສະໜອງງົບປະມານເຂົ້າໃນການສ້າງຕັ້ງກອງທຶນບຳລຸງຮັກສາສ້ອມແປງອຸປະກອນ ແລະ ກອງທຶນຢາໝູນວຽນໃນເບື້ອງຕົ້ນໃຫ້ແກ່ບ້ານເປົ້າໝາຍໃນຄັ້ງນີ້ບ້ານລະ 1ລ້ານກີບ, ສາມາດສ້າງອາສາສະໝັກກາແດງຂັ້ນເມືອງ ແລະ ຂັ້ນບ້ານເພີ່ມອີກ ຈຳນວນ 40 ທ່ານ, ຍິງ 26 ທ່ານ, ລວມມູນຄ່າການຈັດຕັ້ງປະຕິບັດໂຄງການໃນຄັ້ງນີ້ 869.919.500ກີບ ເຊິ່ງໄດ້ການສະໜັບສະໜູນຈາກອົງການກາແດງສ.ປຈີນ; ໃນນັ້ນ, ມີເງິນສົມທົບຂອງປະຊາຊົນ ຈຳນວນ 157.350.000 ກີບ; ລວມງົບປະມານທັງໝົດ 1.027.269.500 ກີບ; ເຊິ່ງໃຫ້ກຽດກ່າວມອບໂດຍທ່ານ ຣສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ໃຫ້ກຽດກ່າວຮັບໂດຍ ທ່ານເຈົ້າເມືອງ, ຮອງເຈົ້າເມືອງ ພາຍໃນ 03 ເມືອງ, ໂດຍມີອຳນາດການປົກຄອງ ພ້ອມດ້ວຍພໍ່ແມ່ປະຊາຊົນ ເຂົ້າຮ່ວມເປັນສັກຂີພະຍານ, ພິເສດໃນໂອກາດທີ່ທ່ານປະທານອົງການກາແດງແຫ່ງຊາດລາວ ໄດ້ເດີນທາງມາເຮັດວຽກພາຍໃນແຂວງ ວຽງຈັນໃນຄັ້ງນີ້, ທ່ານຍັງໄດ້ນຳເຄື່ອງຊ່ວຍເຫຼືອບັນເທົາທຸກມາມອບໃຫ້ແກ່ ຄອບຄົວທຸກຍາກໃນ 5 ບ້ານເປົ້າໝາຍຂອງໂຄງການຂອງເມືອງເຟືອງໄດ້ແກ່ ບ້ານເມືອງເຟືອງ, ສາມໝື່ນ, ຄອນເລືອງ, ຫ້ວຍເດື່ອ ແລະ ບ້ານ ນາອ່າງ ,ຈຳນວນ 69 ຄອບຄົວ ,ຈຳນວນພົນ 277ຄົນ, ຍິງ 118ຄົນ , ເຊິ່ງມີເຄື່ອງນຸ່ງຮົ່ມປະສົມ ແລະ ເກີບ ລວມມູນຄ່າທັງຫມົດ 26,400,000 ກີບ ເຊິ່ງໄດ້ການສະໜັບສະໜູນຈາກກາແດງ ສ.ເກົາຫຼີ.
ໃນໂອກາດດັ່ງກ່າວນີ້, ທ່ານ ຣສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ກໍ່ໄດ້ກ່າວເຖິງຈຸດປະສົງ ແລະ ເປົ້າໝາຍໃນການໃຫ້ການຊ່ວຍເຫຼືອພໍ່ແມ່ປະຊົນ 15 ບ້ານ, ພາຍໃນ 03 ເມືອງຂອງແຂວງວຽງຈັນ, ທ່ານຍັງໄດ້ທັງເນັ້ນໃຫ້ພະນັກງານ ແລະ ອາສາສະໝັກບ້ານຈົ່ງຕັ້ງໜ້າເອົາໃຈໃສ່ ປະຕິບັດໜ້າທີ່ຕາມການມອບໝາຍ, ອົງການປົກຄອງທ້ອງຖິ່ນແຕ່ລະຂັ້ນຕ້ອງເປັນເຈົ້າການໃນການຕິດຕາມ-ຊຸກຍູ້ ຮັກສາວັດຖຸອຸປະກອນນຳໃຊ້ຢ່າງປະສິດທິພາບ ແລະ ຍືນຍົງ, ປຸກລະດົມສັງຄົມໃຫ້ປະກອບສ່ວນໃນວຽກງານກາແດງໃຫ້ນັບມື້ນັບເພີ່ມຂຶ້ນ.