ອົງການກາແດງລາວ

CROIX ROUGE LAO

ປະຊາຊົນ23ບ້ານເມືອງເຊໂປນແຂວງສະຫວັນນະເຂດໄດ້ຮັບເຂົ້າສານ.

ໃນວັນທີ 10ທັນວາ 2021 ນີ້ ຢູ່ທີ່ຫ້ອງວ່າການປົກຄອງແຂວງສະຫວັນນະເຂດ ໄດ້ຈັດພິທີມອບ-ຮັບເຄື່ອງຊ່ວຍ ເຫລືອ ປະເພດເຂົ້າສານ, ນ້ຳມັນພືດ ຈາກອົງການກາແດງລາວ ໃຫ້ຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມໃນເມືອງເຊໂປນແຂວງສະຫວັນນະເຂດ ປະກອບມີ23ບ້ານເປົ້າໝາຍລວມມູນຄ່າ 2,9 ຕື້ກວ່າກີບ ໂດຍການກ່າວມອບຂອງທ່ານ ຮສ.ດຣ ສິງ ເມໂນລາດ ຮອງປະທານອົງການກາແດງລາວ ແລະ ຮັບໂດຍ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ຜູ້ຊີ້ນຳວຽກງານກາແດງແຂວງ, ມີພາກສ່ວນກ່ຽວຂ້ອງຈາກພະແນກແຮງງານ ແລະ ສະຫວັດດີການສັງຄົມ, ອົງການກາແດງແຂວງເຂົ້າຮ່ວມ.
ເຄື່ອງທີ່ນຳມາມອບໃນຄັ້ງນີ້ປະກອບມີເຂົ້າສານທັງໝົດ 210,2ໂຕນ ,ນໍ້າມັນພືດ 16,6ໂຕ ເພື່ອມອບໃຫ້ຄອບຄົວທີ່ໄດ້ຮັບຜົນກະທົບຈາກພາຍຸລິນຟາ ແລະ ໂຊເດວ ໃນທ້າຍປີ2020ຜ່ານມາໃນຈໍານວນ 23ບ້ານເປົ້າໝາຍຂອງເມືອງເຊໂປນ ມີ 1.401 ຄອບຄົວ, ມີພົນລະເມືອງທັງໝົດ 8.546 ກວ່າຄົນ.
ໃນຕອນທ້າຍ ທ່ານຮອງເຈົ້າແຂວງກໍໄດ້ກ່າວສະແດງຄວາມຂອບໃຈຢ່າງສູງມາຍັງ ຄະນະນຳອົງການກາແດງລາວທີ່ໄດ້ລະດົມການຊ່ວຍເຫຼືອໃນຄັ້ງນີ້ພ້ອມທັງໃຫ້ຄຳໝັ້ນສັນຍາວ່າຈະພະຍາຍາມບິແບ່ງເຄື່ອງຈຳນວນດັ່ງກ່າວໃຫ້ເຖິງມືພໍ່ແມ່ປະຊາຊົນຜູ້ໄດ້ຮັບຜົນກະທົບຕາມເປົ້າໝາຍທີ່ໄດ້ກຳນົດໄວ້.ເຄື່ອງຈຳນວນດັ່ງກ່າວແມ່ນໄດ້ມາຈາກການຊ່ວຍເຫຼືອຂອງລັດຖະບານຍີ່ປຸ່ນ ແລະ ລັດຖະບານ ປະເທດລັດເຊຍ ໂດຍຜ່ານອົງການອາຫານໂລກ.