ອົງການກາແດງລາວ

CROIX ROUGE LAO

ປະທານອົງການກາແດງລາວພົບປະພະນັກງານສູນເລືອດແຫ່ງຊາດ

ໃນຕອນບ່າຍຂອງວັນທີ 2 ມີຖຸນາ 2021 ນີ້ ທ່ານ ຮສ ດຣ. ພູທອນ ເມືອງປາກ ປະທານອົງການກາແດງລາວ ໄດ້ເຄື່ອນໄຫວພົບປະໂອລົມອ້າຍນ້ອງພະນັກງານສູນເລືອດແຫ່ງຊາດ ໃນໂອກາດທີ່ມາຮັບໜ້າທີ່ໃໝ່.
ໃນໂອກາດນີ້ທ່ານ ດຣ. ຈັນທາລາ ສຸກສາຄອນ ຫົວໜ້າສູນເລືອດແຫ່ງຊາດ ໄດ້ກ່າວຕ້ອນຮັບທ່ານປະທານກາແດງຄົນໃໝ່ດ້ວຍຄວາມພາກພູມໃຈ,ຈາກນັ້ນທ່ານໄດ້ລາຍງານສະພາບການໃນການຈັດຕັ້ງປະຕິບັດການເຄື່ອນໄຫວວຽກງານການຮັບ-ບໍລິຈາກເລືອດໃນປີຜ່ານມາ ,ສູນເລືອດແຫ່ງຊາດມີພະນັກງານທັງໝົດ 61 ຄົນ, ຍິງ 36 ຄົນ ເຄື່ອນໄຫວການຮັບ-ບໍລິຈາກເລືອດ ແລະ ສະໜອງເລືອດປອດໄພໃຫ້ແກ່ຄົນເຈັບ ຕະຫຼອດ ປີ 2020 ຜ່ານມາ ສູນເລືອດແຫ່ງຊາດສາມາດບັນລຸຄາດໝາຍສູ້ຊົນ 25.300 ຖົງ ບັນລຸ 27.061 ຖົງ ເຊິ່ງເຫັນວ່າເປັນຂີດໝາຍອັນສຳຄັນໃນການສືບຕໍ່ໃນການຮັບບໍລິຈາກເລືອດໃນປີ 2021 ເຖິງວ່າການປຸກລະດົມຮັບ-ບໍລິຈາກເລືອດຈະບັນລຸເປົ້າໝາຍກໍຕາມແຕ່ທຽບໃສ່ການຊົມໃຊ້ເລືອດຕົວຈິງແມ່ນຍັງມີທ່າອ່ຽງສູງ ເຊິ່ງເຫັນໄດ້ວ່າປີ 2020 ຜ່ານມາມີຄົນເຈັບທີ່ຊົມໃຊ້ເລືອດຢູ່ຂັ້ນສູນກາງທັງໝົດ 36.865 ຖົງ ເຫັນວ່າບໍ່ພຽງພໍ.
ທ່ານຫົວໜ້າສູນເລືອດຍັງໃຫ້ຮູ້ຕື່ມວ່າ ຍ້ອນລັດຖະບານໃຫ້ຄວາມສຳຄັນ ແລະ ມີງົບປະມານຈຳນວນໜຶ່ງມອບໃຫ້ວຽກງານເລືອດ, ໄດ້ຮັບຄວາມຮ່ວມມື ແລະ ເອົາໃຈໃສ່ຈາກການຈັດຕັ້ງຂັ້ນຕ່າງໆເປັນຢ່າງດີ, ແຜນຮັບບໍລິຈາກເລືອດແມ່ນຖືກຈັດຕັ້ງປະຕິບັດເປັນສ່ວນໃຫຍ່, ໄດ້ຮັບການສະໜັບສະໜູນຈາກເພື່ອນມິດສາກົນ, ຜູ້ບໍລິຈາກເລືອດເກົ່າສືບຕໍ່ບໍລິຈາກເລືອດກວມເອົາ 60%, ມີເລືອດແກ້ໄຂໃຫ້ຄົນເຈັບ, ຜູ້ບໍລິຈາກເລືອດ ແລະ ຜູ້ມີສ່ວນຮ່ວມໄດ້ຮັບນະໂຍບາຍເມື່ອມີຄວາມຈຳເປັນ, ໄດ້ຮັບການເອົາໃຈໃສ່ຈາກຜູ້ປະສານງານຕາມສະຖານທີ່ຕ່າງໆ ແລະ ພະນັກງານວິຊາການ
ຈາກນັ້້ນ ທ່ານປະທານອົງການກາແດງລາວກໍໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນທີ່ສາມາດປະຕິບັດໄດ້ ພ້ອມທັງເນັ້ນໜັກໃຫ້ເອົາໃຈໃສ່ເປັນຕົ້ນແມ່ນສ້າງຄວາມສາມັກຄີຮັກແພງເຊິ່ງກັນ ແລະ ກັນ, ປະສານສົມທົບວຽກງານກັບບັນດາຄູ່ຮ່ວມງານໃຫ້ຫຼາຍຂຶ້ນ, ຄົ້ນຄວ້າອານຸກຳມະການການສົ່ງເສີມການບໍລິຈາກເລືອດ, ຄົ້ນຄວ້າຄືນກົນໄກການຍ້ອງຍໍຕໍ່ຜູ້ບໍລິຈາກເລືອດ, ຄົ້ນຄວ້າງົບປະມານສະໜອງແກ່ວຽກງານເລືອດໃຫ້ໝັ້ນຄົງ ແລະ ເໝາະສົມທີ່ສຸດ,ວາງແຜນວິທີເຮັດວຽກໃຫ້ເປັນລະບົບ, ການລະດົມຂົນຂວາຍແຫຼ່ງທຶນມາທົດແທນຈາກສາກົນ ແລະ ອື່ນໆ