ອົງການກາແດງລາວ

CROIX ROUGE LAO

ປະທານອົງການກາແດງລາວພົບປະໂອລົມພະນັກງານກອງສົ່ງເສີມສຸຂະພາບຊຸມຊົນ.

ໃນວັນທີ 2 ມີຖຸນາ 2021ນີ້ ທ່ານ ຮສ ດຣ.ພູທອນ ເມືອງປາກ ປະທານອົງການກາແດງລາວ ໄດ້ພົບປະໂອລົມພະນັກງານກອງສົ່ງເສີມສຸຂະພາບຊຸມຊົນ ອົງການກາແດງລາວ
ໂອກາດນີ້ ທ່ານໄດ້ຟັງການຈັດຕັ້ງປະຕິບັດການເຄື່ອນໄຫວວຽກງານຂອງກອງສົ່ງເສີມສຸພາບຊຸມຊົນທ່ານ ດຣ. ບຸນມາ ໄຊຍະສຸກ ຫົວໜ້າກອງສົ່ງເສີມສຸຂະພາບຊຸມຊົນ ກໍໄດ້ຂຶ້ນລາຍງານພາລະບົດບາດສະພາບການຈັດຕັ້ງປະຕິບັດຂອບເຂດວຽກງານຂອງຕົນ ໂດຍສະເພາະກອງສົ່ງເສີມສຸຂະພາບຊຸມຊົນປະກອບດ້ວຍພະນັກງານທັງໝົດ 11ຄົນ,ຍິງ 6 ຄົນ ກອງສົ່ງເສີມສຸຂະພາບຊຸມຊົນແມ່ນກອງວິຊາການໜຶ່ງທີສັງກັດໃນໂຄງປະກອບການຈັດຕັ້ງຂອງອົງການກາແດງລາວເປັນເສນາທິການໃຫ້ແກ່ປະທານອົງການກາແດງລາວ ໃນວຽກງານປົກປັກຮັກສາສົ່ງເສີມສຸຂະພາບຂັ້ນພື້ນຖານ,ການປະຖົມພະຍາບານ,ຈັດຫານ້ຳສະອາດ ແລະອະນາໄມສິ່ງແວດລ້ອມ, ໂພຊະນາການ,ໂຄສະນາສຸຂະສຶກສາ, ເຮສໄອວີ/ພະຍາດເອດ ແລະ ສຸຂະພາບສຸກເສີນ ເຊິ່ງປະກອບດ້ວຍ ພະແນກສົ່ງເສີມສຸຂະພາບຊຸມຊົນ, ພະແນກສຸຂະພາບສຸກເສີນ, ພະແນກບໍລິຫານ-ແຜນການ
ພ້ອມນັ້ນ ທ່ານຫົວໜ້າກອງສົ່ງເສີມສຸຂະພາບຊຸມຊົນ ຍັງໄດ້ລາຍງານສະພາບການເຄື່ອນໄຫວໂດຍຫຍໍ້ໃຫ້ທ່ານປະທານອົງການກາແດງລາວໄດ້ຮັບຊາບວ່າ ຕະຫຼອດໄລຍະຜ່ານມາ ໄດ້ເຄື່ອນໄຫວຕາມພາລະບົດບາດຂອງຕົນຢ່າງຕັ້ງໜ້າພ້ອມທັງໄດ້ປະກອບສ່ວນຊ່ວຍເຫຼືອສັງຄົມ
ໂອກາດນີ້ ທ່ານ ປະທານອົງການກາແດງລາວກໍໄດ້ສະແດງຄວາມຊົມເຊີຍຕໍ່ມາກຜົນການເຄື່ອນໄຫວຕະຫຼອດໄລຍະຜ່ານມາ ເຊິ່ງເຫັນວ່າ ມີຫຼາຍວຽກງານທີ່ພົ້ນເດັ່ນເຊິ່ງສະແດງອອກໃນການຊ່ວຍເຫຼືອກອບກູ້ເອົາຄົນເຈັບທາງຖະໜົນ,ການສະໜອງນ້ຳສະອາດ, ວຽກງານການປະຖົມພະຍາບານ ແລະ ການປະກອບສ່ວນ ໃນການຮັບມືກັບການສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19
ພ້ອມນັ້ນທ່ານຍັງໄດ້ເນັ້ນໜັກໃຫ້ ເອົາໃຈເພີ່ມທະວີສ້າງຄວາມສາມັກຄີພາຍໃນແລະພາຍນອກ, ເອົາໃຈໃສ່ປະສານງານກັບບັນດາຄູ່ຮ່ວມງານຕາມສາຍວຽກທີ່ຕົນຮັບຜິດຊອບ, ເອົາໃຈໃສ່ປັບປຸງແບບແຜນວິທີເຮັດວຽກ ແລະພ້ອມກັນຈັດຕັ້ງປະຕິບັດ.