ອົງການກາແດງລາວ

CROIX ROUGE LAO

ປະທານອົງການກາແດງລາວລົງເຄື່ອນໄຫວຢ້ຽມຢາມຊຸກຍູ້ວຽກງານທີ່ແຂວງ ຈຳປາສັກ

ໃນວັນທີ 11 ມີນາ 2019 ທີ່ຜ່ານມາ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ເຄື່ອນໄຫວເຮັດວຽກຢູ່ທີ່ແຂວງ ຈຳປາສັກ. ການລົງຢ້ຽມຢາມໃນຄັ້ງນີ້ ເພື່ອຊຸກຍູ້ການຈັດຕັ້ງປະຕິບັດ ໃນຂົງເຂດວຽກງານກາແດງ, ການກໍ່ສ້າງພະນັກງານແລະວຽກງານອື່ນໃນໜຶ່ງປີຜ່ານມາ.
ໃນໂອກາດນີ້ ທ່ານ ກອງມະນີ ສຸລະທາທອນ ຮັກສາການຫົວໜ້າກາແດງແຂວງ ຈຳປາສັກ ໄດ້ຂຶ້ນລາຍງານສະພາບການຈັດຕັ້ງປະຕິບັດໃນໄລຍະຜ່ານມາແລະ ທິດທາງແຜນການໃນຕໍ່ຫນ້າແລະຕີລາຄາຂໍ້ຄົງຄ້າງຈຳນວນໜຶ່ງທີ່ຍັງບໍ່ທັນສາມາດປະຕິບັດໄດ້ ໂດຍສະເພາະງົບປະມານ ແລະ ການຊອກຫາແຫຼ່ງທຶນ.
ທ່ານ ຄຳຮຸ່ງ ເຮືອງວົງສີ ຍັງໄດ້ເນັ້ນເອົາໃຈໃສ່ບາງວຽກງານຕັ້ນຕໍໂດຍສະເພາະວຽກງານປຸກລະດົມຂົນຂວາຍຊອກຫາແຫຼ່ງທຶນຈາກສັງຄົມ, ການໂຄສະນາພາລະບົດບາດກາແດງ, ການຈັດຫາເລືອດໃຫ້ພຽງພໍກັບຄວາມຕ້ອງການ, ໂຄສະນາໃຫ້ຄວາມຮູ້ກ່ອນ ແລະ ຫຼັງການບໍລິຈາກເລືອດ ເພື່ອໃຫ້ສັງຄົມຮັບຮູ້, ເຂົ້າໃຈ ຫລາຍຂຶ້ນກວ່າເກົ່າ; ພ້ອມດຽວກັນນັ້ນ ທ່ານຍັງຮຽກຮ້ອງມາຍັງ ອ້າຍນ້ອງພະນັກງານກາແດງ ທຸກຂະແໜງການຈົ່ງເອົາໃຈໃສ່ໃນການປະຕິບັດໜ້າທີ່ວຽກງານກາແດງ ໃຫ້ມີປະສິດທິພາບ ໃຫ້ຫລາຍຂຶ້ນກວ່າເກົ່າ.