ອົງການກາແດງລາວ

CROIX ROUGE LAO

ປະທານອົງການກາແດງລາວຮຽກຮ້ອງທຸກພາກສ່ວນເປັນເຈົ້າການໃນວຽກງານກາແດງ

ໃນວັນທີ 5 ກໍລະກົດ 2021 ນີ້ ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວພ້ອມດ້ວຍຄະນະໄດ້ສືບຕໍ່່ເຄື່ອນໄຫວຊຸກຍູ້ຢຽ້ມຢາມວຽກງານກາແດງທີ່ແຂວງຫຼວງນ້ຳທາ ໂດຍໄດ້ເຂົ້າພົບທ່ານ ຄຳໄຫຼ ສີປະເສີດ ເຈົ້າແຂວງຫຼວງນ້ຳທາ ເພື່ອລາຍງານ ການເຄື່ອນໄຫວວຽກງານກາແດງໃຫ້ການນຳແຂວງໄດ້ຮັບຊາບເປັນຕົ້ນແມ່ນຫນ້າວຽກສຳຄັນທີ່ກົດຫມາຍກຳນົດໄວ້ແລະຮັບຮອງເຊັ່ນ:ການຊ່ວຍເຫຼືອບັນເທົາທຸກເບື້ອງຕົ້ນ, ການປຸກລະດົມຂົນຂວາຍບໍລິຈາກເລືອດ-ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການກູ້ໄພສຸກເສີນ, ການໂຄສະນາ-ຂົນຂວາຍແຫຼ່ງທຶນ, ການສ້າງສະມາຊິກແລະອາສາສະໝັກກາແດງ,ການສືບທາວຫາຍາດພີ່ນ້ອງ ແລະ ການຮ່ວມມືສາກົນ ບັນດາວຽກງານເຫຼົ່ານີ່ແມ່ນໄດ້ປະກອບສ່ວນເຂົ້າໃນວຽກງານຕ່າງໆຂອງລັດຖະບານ ສຳລັບກາແດງແຂວງຫຼວງນ້ຳທາແມ່ນໄດ້ສຸມໃສ່ການຊ່ວຍເຫຼືອບັນເທົາທຸກສຸກເສີນໃຫ້ກັບສັງຄົມເປັນຕົ້ນແມ່ນຊ່ວຍເຫຼືອບັນເທົາທຸກໃຫ້ກັບຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມ,ໄພໄໝ້ເຮືອນ, ການປຸກລະດົມຂົນຂວາຍບໍລິຈາກເລືອດ-ສະໜອງເລືອດປອດໄພພາຍໃນແຂວງ ສຳລັບປີນີ້້ໄດ້ຄາດໝາຍສູ້ຊົນທີ່ສູນເລືອດແຫ່ງຊາດແບ່ງໃຫ້ທັງໝົດ 1700 ຖົງ ມາຮອດ6ເດືອນຕົ້ນປີ 2021 ນີ້ສູນເລືອດກາແດງແຂວງສາມາດປະຕິບັດໄດ້ 686 ຖົງເທົ່າກັບ 40,35% ເຊິ່ງໄດ້ຈັດຕັ້ງການປຸກລະດົມກັບບັນດາຂະແໜງການອ້ອມຂ້າງແຂວງ,ໂຮງຮຽນ,ທະຫານ,ຕຳຫຼວດ; ໂຄສະນາ-ຂົນຂວາຍແຫຼ່ງທຶນ ສົ່ງເສີມສຸຂະພາບຂັ້ນພື້ນຖານໃຫ້ແກ່ພໍ່ແມ່ປະຊາຊົນບັນດາເຜົ່າ ເຊິ່ງໄດ້ສະໜອງນ້ຳລິນ,ວິດຖ່າຍ ແລະ ອື່ນໆໃຫ້ກັບບັນດາບ້ານເປົ້າໝາຍຂອງໂຄງການ.
ທ່ານປະທານອົງການກາແດງລາວຍັງໄດ້ເຊີນໃຫ້ທ່ານເຈົ້າແຂວງໃຫ້ກຽດເປັນປະທານກິຕິມາສັກໃຫ້ກັບກາແດງແຂວງ, ຮຽກຮ້ອງໃຫ້ການນຳແຂວງຊ່ວຍຊຸກຍູ້ວຽກງານກາແດງ, ເປັນກະບອກສຽງໃຫ້ກັບກາແດງເພື່ອໃຫ້ບົດບາດຄວາມສຳຄັນຂອງກາແດງຂະຫຍາຍອອກສູ່ສັງຄົມໃຫ້ທົ່ວເຖິງ, ຊ່ວຍຊຸກຍູ້ລະດົມຂົນຂວາຍແຫຼ່ງທຶນຈາກສັງຄົມ,ສ້າງຄວາມເຂັ້ມແຂງໃຫ້ກັບກາແດງທາງດ້ານການຈັດຕັ້ງ ເພື່ອເຮັດໃຫ້ອ້າຍນ້ອງພະນັກງານໄດ້ມີຄວາມອຸ່ນອຽນທຸ່ນທ່ຽງ ພ້ອມນັ້ນຍັງໄດ້ສະເໜີໃຫ້ການນຳແຂວງຊ່ວຍປຸກລະດົມສັງຄົມໃນການປະກອບສ່ວນວັດຖຸສິ່ງຂອງໃນການສ້າງສູນກູ້ໄພໃນຕໍ່່ໜ້າ ແລະ ການປະສານງານກັບບັນດາຂະແໜງການອ້ອມຂ້າງແຂວງ
ໃນຕອນທ້າຍ ທ່ານເຈົ້າແຂວງຍັງໄດ້ກ່າວສະແດງການຕ້ອນຮັບຢ່າງອົບອຸ່ນ ແລະ ສະແດງຄວາມຍິນດີກັບທ່ານປະທານອົງການກາແດງລາວ ແລະ ໄດ້ສະແດງຄວາມຂອບໃຈມາຍັງທ່ານປະທານອົງການກາແດງລາວທີ່ໄດ້ໄກ້ສິດຕິດແທດຊຸກຍູ້ວຽກງານ, ຊີ້ນຳນຳພາ ຢູ່ຂັ້ນແຂວງ ແລະ ໄດ້ສະແດງຄວາມຍິນດີກັບທ່ານປະທານອົງການກາແດງລາວທີ່ໄດ້ມາຮັບໜ້າທີ່ໃໝ່ເປັນປະທານອົງການກາແດງລາວ ແລະ ໄດ້ຕົກລົງເປັນປະທານກິຕິມາສັກໃຫ້ກັບອົງການກາແດງແຂວງ, ສຳລັບການຈັດຕັ້ງແມ່ນຈະໄດ້ສຸມໃສ່ໄກ້ສິດຕິດແທດເພື່ອເຮັດວຽກຮ່ວມກັບກາແດງ, ສຳລັບການສ້າງສູນກູ້ໄພແມ່ນຈະສູ້ຊົນລະດົມທຶນຮອນ, ພາຫະນະ ຈາກສາກົນ, ນັກທຸລະກິດທັງພາຍໃນ ແລະ ຕ່າງປະເທດເພື່ອສ້າງສູນກູ້ໄພໃຫ້ປະກົດຜົນເປັນຈິງ, ສ່ວນວຽກງານການປະສານງານຈະໄດ້ພ້ອມກັນເອົາໃຈໃສ່ໃນການປະສານສົມທົບກັບບັນດາຂະແໜງການອ້ອມຂ້າງແຂວງໃຫ້ໄດ້ດີຂຶ້ນ.