ອົງການກາແດງລາວ

CROIX ROUGE LAO

ປະທານອົງການກາແດງແຫ່ງຊາດລາວ ເຄື່ອນໄຫວຢ້ຽມຢາມຊຸກຍູ້ວຽກງານແຂວງຄຳມ່ວນ

ໃນວັນທີ 29 ມີນາ 2022 ນີ້. ທ່ານ ຮສ. ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມຊຸກຍູ້ວຽກງານທີ່ແຂວງຄຳມ່ວນ,ໃນໂອກາດດຽວກັນນີ້;ທ່ານໄດ້ເຂົ້າຢ້ຽມພົບປະ ທ່ານ. ວັນໄຊ ພອງສະຫວັນ ເຈົ້າແຂວງ ແຂວງຄຳມ່ວນ, ໃນໂອກາດທີ່ໄດ້ລົງເຄື່ອນໄຫວເຮັດວຽກຢູ່ພາຍໃນແຂວງຄຳມ່ວນ, ໃນໂອກາດດັ່ງກ່າວນີ້; ທ່ານປະທານອົງການກາແດງແຫ່ງຊາດລາວ ກໍ່ໄດ້ລາຍງານກ່ຽວກັບຈຸດປະສົງ ໃນການລົງມາເຄື່ອນໄຫວເຮັດວຽກໃນຄັ້ງນີ້, ແມ່ນເພື່ອພົບປະໂອ້ລົມ ແລະ ຊຸກຍູ້ ວຽກງານໃນຂົງເຂດວຽກງານກາແດງ ແຂວງຄຳມ່ວນ ແລະ ຍັງໄດ້ເດີນທາງໄປມອບອຸປະກອນຫຼຸດຜ່ອນຄວາມສ່ຽງໄພພິບັດໃຫ້ແກ່ປະຊາຊົນ ຈຳນວນ 04 ບ້ານ ຂອງເມືອງ ບົວລະພາ ໄດ້ແກ່: ບ້ານສະອາງ, ບ້ານຂະຍູ້, ບ້ານຜານົບ ແລະ ບ້ານ ຫຍ່າຫວານ; ເປັນຕົ້ນ ແມ່ນໄດ້ມອບ ເຮືອ, ເສື້ອຊູຊີບ, ໂທລະໂຄ່ງ ແລະ ອື່ນໆ, ພ້ອມດຽວກັນນັ້ນ; ກໍ່ຍັງໄດ້ແຈ້ງ ພາລະບົດບາດ ແລະ ໜ້າທີ່ຄວາມຮັບຜິດຊອບຂອງອົງການກາແດງແຫ່ງຊາດລາວ, ມີຫນ້າທີ່ຊ່ວຍເຫລືອບັນເທົາທຸກໃຫ້ແກ່ປະຊາຊົນຜູ້ທຸກຍາກໃນເຂດຫ່າງໄກສອກຫລີກ, ການເຄື່ອນໄຫວແມ່ນປະຕິບັດຕາມ9ໜ້າວຽກ ຕາມກົດຫມາຍທີ່ໄດ້ກຳນົດໄວ້ເຊັ່ນ:ວຽກລະດົມບໍລິຈາກເລືອດ, ຊ່ວຍເຫຼືອບັນເທົາທຸກແກ່ປະຊາຊົນຜູ້ທຸກຍາກຂາດເຂີນ, ການລະດົມຂົນຂວາຍແຫຼ່ງທຶນ ແລະ ວຽກງານການກູ້ຊີບ-ກູ້ໄພສຸກເສີນແລະວຽກອື່ນໆ, ເພື່ອຊ່ວຍເຫລືອປະຊາຊົນຜູ້ທຸກຍາກພາຍໃນແຂວງ; ທ່ານຍັງໄດ້ຮຽກຮ້ອງມາຍັງທ່ານເຈົ້າແຂວງ ແຂວງຄຳມ່ວນ ຊ່ວຍຊີ້ນຳ ແລະ ຊຸກຍູ້ວຽກງານຂອງອົງການກາແດງຄຳມ່ວນເປັນຕົ້ນ ແມ່ນທາງດ້ານການຈັດຕັ້ງ ເພື່ອໃຫ້ມີຄວາມເຂັ້ມແຂງ ລວມທັງດ້ານງົບປະມານ ແລະ ອື່ນໆ.ພ້ອມນັ້ນກໍຍັງໄດ້ເຊີນທ່ານເຈົ້າແຂວງເປັນປະທານກິດຕິມາສັກຂອງອົງການກາແດງແຂວງ.
ຈາກນັ້ນປະທານອົງການກາແດງແຫ່ງຊາດລາວ, ກໍ່ໄດ້ເຂົ້າພົບປະອ້າຍນ້ອງພະນັກງານອົງການກາແດງແຂວງຄຳມ່ວນ ເພື່ອຮັບຟັງການລາຍຂອງພະນັກງານຜູ້ຮັບຜິດຊອບ ໃນວຽກງານໂຄວິດ -19 ເປັນຕົ້ນແມ່ນການແຈກຢາຍອາຫານ, ໂຄສະນາສຸຂະສຶກສາເພື່ອປ້ອງກັນພະຍາດໂຄວິດ-19, ພົ່ນຢາຂ້າເຊື້ອຕາມຊຸມຊົນ ແລະ ກິດຈະກຳອື່ນໆ, ເພື່ອໃຫ້ມີຄວາມສອດຄ່ອງທາງດ້ານງົບປະມານ, ເພື່ອຈະໄດ້ຄົ້ນຄວ້າຊອຫາແຫຼ່ງທຶນເຂົ້າມາມີສ່ວນຮ່ວມໃນວຽກງານນີ້ຕື່ມອີກ.