ອົງການກາແດງລາວ

CROIX ROUGE LAO

ປະທານອົງການກາແດງແຫ່ງຊາດລາວ ຖະແຫຼງຂ່າວ ການສະເຫລີມສະຫລອງວັນກາແດງ ແລະ ຊີກວົງເດືອນແດງສາກົນ 08 ພຶດສະພາ 2022.

ໃນວັນທີ 05 ພຶດສະພາ 2022; ທີ່ອົງການກາແດງແຫ່ງຊາດລາວ ທ່ານ ຮສ.ດຣ ພູທອນ ເມືອງປາກ, ປະທານອົງການກາແດງແຫ່ງຊາດລາວ ໄດ້ຖະແຫຼງຂ່າວ ກ່ຽວກັບວັນກາແດງສາກົນ 08 ພຶດສະພາ 2022; ທີ່ຫ້ອງປະຊຸມອົງການກາແດງແຫ່ງຊາດລາວ; ອົງການກາແດງສາກົນເປັນອົງການຫນຶ່ງທີ່ເຄືອນໄຫວວຽກງານມະນຸດສະທຳ ໃນການຊ່ວຍເຫລືອຜູ້ປະສົບໄພມາເປັນເວລາ 159ປີ; ເປັນເວລາຍາວນານໃນການເຮັດຫນ້າທີ່ຊ່ວຍເຫລືອຜູ້ທຸກຍາກໃນທົ່ວໂລກ ແລະ ບັນດາປະເທດຕ່າງໃນທົ່ວໂລກກໍ່ໄດ້ຖືເອົາວັນທີ່ 08 ພຶດສະພາ ຂອງທຸກໆປີ ແລະ ອົງການການແດງລາວປີນີ້ກໍ່ໄດ້ມີການຖະແຫລງຂ່າວໂດຍແມ່ນທ່ານ ຮສ.ດຣ ພູທອນ ເມືອງປາກ, ປະທານອົງການກາແດງແຫ່ງຊາດລາວ ເຊີ່ງມີບາງຕອນທ່ານໄດ້ກ່າວວ່າ:
I. ອົງການກາແດງສາກົນມີຄວາມເປັນມາຄືແນວໃດ? ເປັນຫຍັງຈື່ງມີກາແດງ ແລະ ຊີກວົງເດືອນແດງສາກົນ?
ໃນສະຕະວັດກວ່າທີ່ຜ່ານມາ (14 ມິຖຸນາ 1859 = 163 ປີ) ໄດ້ມີສົງຄາມລະຫວ່າງ ທະຫານຝຣັ່ງ ແລະ ໂອຕຣິດ ຢູ່ທີ່ສະໜາມຮົບ ໂຊນເຟຣິໂນ (Battle of Solferino) ທີ່ປະເທດອີຕາລີ ໃນປັດຈຸບັນ, ຊຶ່ງເຮັດໃຫ້ທະຫານມີການບາດເຈັບ ແລະ ເສຍຊີວິດເປັນ ຈຳນວນຫຼາຍ (40,000 ຄົນ) ໂດຍບໍ່ມີພາກສ່ວນໃດ ຮັບຜິດຊອບປິ່ນປົວເບິ່ງແຍງແຕ່ຢ່າງໃດເລີຍ.
ທ່ານ ຮັງຣີ ດຸຍນັງ (Henry Dunant) ເປັນນັກທຸລະກິດ ຊາວສະວິດສ໌ ເກີດເມື່ອວັນທີ 08 ພຶດສະພາ ໄດ້ເດີນທາງໄປພົບເຫັນເຫດການດັ່ງກວ່າ ແລະ ເພີ່ນໄດ້ບັນທຶກເຫດການ ພັນລະນາເຖິງຄວາມທຸກທໍລະມານ ທີ່ຮ້າຍກາດດັ່ງກ່າວ ຊື່ງເອີ້ນຊື່ປຶ້ມວ່າ: ຄວາມຊົງຈຳແຫ່ງໂຊນເຟຣິໂນ (The Memory of Solferino) ແລະ ໄດ້ພິມເຜີຍແຜ່ໄປຍັງປະເທດຕ່າງໆໃນທົ່ວໂລກ. ຈາກການບັນທຶກ ຄວາມຊົງຈຳອັນນີ້ ໄດ້ເຮັດໃຫ້ເກີດມີວິໄສທັດດ້ານມະນຸດສະທຳ ແລະ ນຳໄປສູ່ການສ້າງຕັ້ງ “ ສະມາຄົມ ບັນເທົາທຸກແບບສະໝັກໃຈ ” ເພື່ອຊ່ວຍເບິ່ງແຍງ ປິ່ນປົວ ຜູ້ບາດເຈັບໃນສົງຄາມ ໂດຍບໍ່ມີ ການຈຳແນກໃດໆ ຕໍ່ຄູ່ສັດຕູຂອງສົງຄາມ ໃນທີ່ສຸດກໍ່ໄດ້ພັດທະນາໄປສູ່ການສ້າງຕັ້ງ ຄະນະ ກຳມະການກາແດງສາກົນ ຂຶ້ນ ໃນວັນທີ 23 ຕຸລາ 1863 International Committee of the Red Cross (ICRC)
ໃນໄລຍະ 01 ສະຕະວັດເຄິ່ງທີ່ຜ່ານມາ ນັບແຕ່ການລິເລີ່ມຂອງ ທ່ານ Henry Dunant ຜູ້ກໍ່ຕັ້ງ ສະມາຄົມບັນເທົາທຸກແບບສະໝັກໃຈ ຊື່ງໄດ້ນຳໄປສູ່ການສ້າງຕັ້ງ ຄະນະກຳມະການກາແດງສາກົນ, ໄດ້ມີການສ້າງຕັ້ງອົງການກາແດງແຫ່ງຊາດຂຶ້ນ ໃນ ບັນດາປະເທດຕ່າງໆ ແລະ ໃນວັນທີ 05 ພຶດສະພາ 1919 ສະຫະພັນກາແດງ ແລະ ຊີກວົງເດືອນແດງສາກົນ ກໍ່ໄດ້ຮັບການສ້າງຕັ້ງຂຶ້ນ (International Federation of Red Cross and Red Crescent -IFRC) ແລະ ມາຮອດປັດຈຸບັນທົ່ວໂລກໄດ້ມີ ສະພາກາແດງ ແລະ ຊີກວົງເດືອນແດງແຫ່ງຊາດ 192 ປະເທດ; ໂດຍນຳໃຊ້ກາກະບາດ ສີແດງ ເທິງພື້ນສີຂາວ ຫຼື ຊີກວົງເດືອນແດງ ເທິງພື້ນສີຂາວ ເປັນເຄື່ອງໝາຍເພື່ອປົກປ້ອງ ແລະ ການຊ່ວຍເຫຼືອບັນເທົາທຸກ ໃນເວລາທີ່ເກີດມີຂໍ້ຂັດແຍ່ງລະຫວ່າງປະເທດ ຫຼື ພາຍໃນປະເທດ ຊຶ່ງໄດ້ລະບຸໄວ້ໃນ “ ສົນທິສັນຍາເຊີແນວ 1949 ” ແລະ ອະນຸສັນຍາ ເພີ່ມເຕີມ 03 ສະບັບ ເພື່ອແກ້ໄຂບັນຫາ ໃນເວລາມີຂໍ້ຂັດແຍ່ງ ຫຼື ປະທະກັນ.
ສະຫະພັນກາແດງ ແລະ ຊີກວົງເດືອນເດືອນແດງສາກົນ (IFRC) ແມ່ນເຄືອຂ່າຍ ມະນຸດສະທຳ ທີ່ໃຫຍ່ທີ່ສຸດຂອງໂລກ ແລະ ໄດ້ມີຂະບວນການເຄື່ອນໄຫວຕາມ 07 ຫຼັກການພື້ນຖານຄື: ມະນຸດສະທຳ, ທ່ຽງທໍາ, ເປັນກາງ, ເປັນເອກະລາດ, ສະໝັກໃຈ, ເປັນເອກະພາບ ແລະ ມີນໍ້າໃຈສາກົນ.
II. ວັນກາແດງ ແລະ ຊີກວົງເດືອນແດງສາກົນ ມີຄວາມໝາຍແນວໃດ?
ວັນທີ 08 ພຶດສະພາ = ວັນກາແດງ ແລະ ຊີກວົງເດືອນແດງສາກົນ ກົງກັບວັນເກີດຂອງ ທ່ານ ທ່ານ ຮັງຣີ ດຸຍນັງ (Henry Dunant) ຜູ້ກໍ່ຕັ້ງອົງການກາແດງສາກົນ, ເພິ່ນເກີດເມື່ອ ວັນທີ 08 ພຶດສະພາ 1828 ທີ່ເມືອງເຈເນວາ ປະເທດສະວິດສ໌, ເພີ່ນໄດ້ຮັບລາງວັນ Nobel ສັນຕິພາບ ຜູ້ທຳອິດ ຂອງໂລກ;
ພາຍຫຼັງສົງຄາມໂລກຄັ້ງທີ02, ໃນປີ 1946 ໄດ້ມີການສະເໜີຢູ່ທີ່ກອງປະຊຸມໃຫຍ່ ຂອງສະຫະພັນກາແດງ ຄັ້ງທີ 14 ທີ່ໂຕກຽວ ປະເທດຢີ່ປຸ່ນ ເພື່ອຮັບຮອງເອົາວັນກາແດງ ສາກົນ, ໂດຍມີຈຸດປະສົງໃຫ້ອົງການກາແດງແຫ່ງຊາດໃນທົ່ວໂລກ ໄດ້ຈັດພິທີສະເຫຼີມ ສະຫຼອງ ໃນວັນດຽວກັນ. 02 ປີ ຕໍ່ມາ ພາຍຫຼັງໄດ້ມີການຮັບຮອງຂອງຄະນະກຳມະການ, ວັນກາແດງສາກົນໄດ້ຖືກສະເຫຼີມສະຫຼອງເປັນ ຄັ້ງທຳອິດ ທົ່ວໂລກ ໃນວັນທີ 08 ພຶດສະພາ 1948 ແລະ ຕໍ່ມາ ປີ1984 ຈຶ່ງປ່ຽນຊື່ວ່າ “ ວັນກາແດງ ແລະ ຊີກວົງເດືອນແດງສາກົນ ”;
ຈາກນັ້ນມາ, ວັນທີ 08 ພຶດສະພາ ຂອງທຸກປີ ຖືວ່າແມ່ນວັນກາແດງ ແລະ ຊີກວົງເດືອນແດງສາກົນ, ເປັນວັນສະເຫຼີມສະຫຼອງຫຼັກການ ຄຸນຄ່າ ປະຫວັດສາດ ແລະ ຜົນສະທ້ອນ ຂອງຂະບວນການກາແດງ ແລະ ຊີກວົງເດືອນແດງສາກົນ, ເປັນວັນສາກົນ ເພື່ອສະເຫຼີມສະຫຼອງຄວາມເປັນເອກະພາບ ແລະ ຄວາມສາມັກຄີ ຂອງຂະບວນການກາແດງ ແລະ ຊີກວົງເດືອນແດງສາກົນ ໃນວຽກງານມະນຸດສະທຳ; ແຕ່ລະປີຈະໄດ້ມີຫົວຂໍ້ສຳຄັນ ຫຼື ຄຳຂວັນປຸກລະດົມນໍ້າໃຈຂອງນັກເຄື່ອນໄຫວມະນຸດສະທຳ.
III. ຫົວຂໍ້ສຳຄັນ ຫຼື ຄຳຂວັນປຸກລະດົມນໍ້າໃຈນັກເຄື່ອນໄຫວມະນຸດສະທຳ ປີ 2022 ແມ່ນຫຍັງ?
ສຳລັບປີນີ້ ຄະນະກຳມະການກາແດງ ແລະ ຊີກວົງເດືອນແດງສາກົນ ໄດ້ຍົກເອົາ ການສະແດງຮູບພາບຄວາມເມດຕາຕໍ່ເພື່ອນມະນຸດ ແລະ ປຸກລະດົມ ໃຫ້ກຳລັງໃຈ ໃຫ້ທຸກຄົນໃນທົ່ວໂລກ ມີນໍ້າໃຈເມດຕາ ຕໍ່ເພື່ອນມະນຸດດ້ວຍກັນ ໂດຍມີຫົວຂໍ້ວ່າ:
“ ພວກເຮົາທຸກຄົນມີຄວາມເມດຕາເພື່ອນມະນຸດດ້ວຍກັນ ”
“ We are all Humankind ”
ພວກເຮົາຮັບຮູ້ວ່າ ໂລກນີ້ມີຄວາມເຄັ່ງຕຶງ ແລະ ເປັນໜ້າຢ້ານກົວໃນປະຈຸບັນນີ້, ໃນຊຸມປີຜ່ານມານີ້ ໄດ້ມີວິກິດການຫຼາຍຢ່າງທີ່ບໍ່ໄດ້ລະເວັ້ນຜູ້ໃດເລີຍ ແລະ ໄດ້ກະທົບ ກະເທືອນ ຕໍ່ປະຊາຊົນ ຜູ້ທີ່ຢູ່ໃນກຸ່ມສ່ຽງທີ່ສຸດ ແລະ ທຸກຍາກທີ່ສຸດ ຈາກການແຜ່ລະບາດ ຂອງພະຍາດໂຄວິດ-19 ລວມເຖິງວິກິດການດິນຟ້າອາກາດ, ພາວະສຸກເສີນດ້ານມະນຸດ ສະທຳ ແລະ ຄວາມຂັດແຍ່ງທີ່ເພີ່ມຂຶ້ນ.
ແຕ່ເຖິງຢ່າງໃດກໍ່ຕາມ, ຍັງມີຄວາມຫວັງ ແລະ ຄວາມເປັນມະນຸດຫຼາຍຢ່າງ ທີ່ຈະພົບເຫັນ ໃນຮູບແບບຂອງການກະທຳຂອງຄວາມເມດຕາ;
ການກະທຳຂອງຄວາມເມດຕາແມ່ນຢູ່ອ້ອມຮອບພວກເຮົາ ບໍ່ວ່າມັນຈະນ້ອຍ ຫຼື ໃຫຍ່ ມັນຈະເຮັດໃຫ້ມີການຫັນປ່ຽນຢ່າງຫຼວງຫຼາຍໃນຊີວິດຂອງປະຊາຊົນ, ພວກເຮົາເຊື່ອໝັ້ນວ່າ ການກະທຳຂອງຄວາມເມດຕາ ມີອຳນາດເປັນປະກາຍໄຟຕົ້ນສະບັບເກີດຂຶ້ນ, ເພີ່ມທະວີ ຂຶ້ນ, ແຜ່ກະຈາຍຜ່ານຊຸມຊົນ, ຜ່ານບັນດາປະເທດຕ່າງໆ ແລະ ໄປທົ່ວໂລກ;
ພວກເຮົາເຊື່ອໝັ້ນຕໍ່ພະລັງຂອງຄວາມເມດຕາ, ສະນັ້ນ ວັນກາແດງ ແລະ ຊີກວົງ ເດືອນແດງສາກົນປີນີ້ ພວກເຮົາຈຶ່ງສະເຫຼີມສະຫຼອງການກະທຳທຸກປະເພດຂອງຄວາມ ເມດຕາ ແລະ ສະແດງໃຫ້ເຫັນວິທີການຮ່ວມມືກັນ, ມັນຈະມີຜົນກະທົບທົ່ວໂລກຢ່າງແທ້ຈິງ.
“ ຈົ່ງສະແດງໃຫ້ໂລກຮູ້ວ່າ ພວກເຮົາທຸກຄົນສາມາດເປັນຜູ້ມີຄວາມເມດຕາເພື່ອນມະນຸດດ້ວຍກັນ ”
IV. ຄຳຮຽກຮ້ອງຂອງອົງການກາແດງ ແລະ ຊີກວົງເດືອນແດງສາກົນ
ຄືບັນດາທ່ານໄດ້ຮັບຊາບໃນ 02 ປີຜ່ານມານີ້ ຜົນກະທົບຈາກການລະບາດຂອງ ພະຍາດໂຄວິດ-19ໃນທົ່ວໂລກ ໄດ້ສະແດງເຖິງຄວາມອ່ອນແອຂອງໂລກທັງໝົດ ຕໍ່ກັບ ການລະບາດຂອງພະຍາດ, ມີຜູ້ຕິດເຊື້ອຫຼາຍກວ່າ 513,218,272 ຄົນ, ເສຍຊີວິດ 6,260,241 ຄົນ. ການພັດທະນາທາງດ້ານເສດຖະກິດ-ສັງຄົມ ມີການທົດຖອຍລົງ; ພາວະ ສຸກເສີນຈາກດິນຟ້າອາກາດ ແລະ ອັນຕະລາຍຕ່າງໆ ທີ່ຊຸມຊົນປະເຊີນກັບຄວາມ ສ່ຽງໄພພິບັດ ແລະ ການຂາດແຄນຍັງສືບຕໍ່ທ້າທາຍ.
ສະນັ້ນ; ຄວາມຫວັງທີ່ຖືກຕັ້ງຂຶ້ນ ກໍ່ແມ່ນພວກເຮົາທຸກຄົນ ສາມາດເປັນຜູ້ມີນໍ້າໃຈ ເມດຕາຕໍ່ເພື່ອນມະນຸດດ້ວຍກັນ ຈະໜ້ອຍ ຫຼື ຫຼາຍ, ນ້ອຍ ຫຼື ໃຫຍ່ ລ້ວນແລ້ວແຕ່ມີ ຄວາມໝາຍຄວາມສຳຄັນ, ແຜ່ເມດຕາຈາກຄົນໜຶ່ງທີ່ມີເງື່ອນໄຂ ໄປສູ່ອີກຄົນໜຶ່ງທີ ດ້ອຍໂອກາດ ໃນຊຸມຊົນ ທັງຕົວເມືອງ ແລະ ຊົນນະບົດ;
ອົງການກາແດງແຫ່ງຊາດລາວ ສ້າງຕັ້ງຂຶ້ນ ໃນວັນທີ 01 ມັງກອນ 1955, ຖືກຮັບຮູ້ຈາກ ຄະນະກຳມະການກາແດງສາກົນ ໃນວັນທີ 23 ພຶດສະພາ 1957 ແລະ ເຂົ້າເປັນສະມາຊິກຂອງສະຫະພັນກາແດງ ແລະ ຊີກວົງເດືອນແດງສາກົນ (IFCR) ໃນວັນທີ 25 ຕຸລາ 1957 ໂດຍກອງປະຊຸມໃຫຍ່ ຄັ້ງທີ 24 ຂອງບັນດາອົງການກາແດງ ແລະ ຊີກວົງເດືອນແດງສາກົນ ຢູ່ນິວແດນລີ ປະເທດອິນເດຍ. ອົງການກາແດງແຫ່ງຊາດລາວ ເປັນ ອົງການຈັດຕັ້ງທາງສັງຄົມ ຂອງ ສປປ ລາວ ທີ່ເຄື່ອນໄຫວວຽກງານມະນຸດສະທຳ ຢ່າງເປັນເອກະລາດ ຢູ່ພາຍໃຕ້ລັດຖະທຳມະນູນ, ກົດໝາຍ ແລະ 07 ຫຼັກການພື້ນຖານ ຂອງຂະບວນການກາແດງ ແລະ ຊີກວົງເດືອນແດງສາກົນ; ໂດຍມີປະທານປະເທດ ເປັນປະທານກິດຕິມະສັກ, ມີຖານະເທົ່າກັບອົງການຈັດຕັ້ງລັດ ແລະ ອົງການຈັດຕັ້ງ ສັງຄົມອື່ນ; ມີພາລະບົດບາດໃນການຈັດຕັ້ງວຽກງານມະນຸດສະທຳ, ປະຕິບັດຫຼັກການ ຊ່ວຍເຫຼືອຊຶ່ງກັນ ແລະ ກັນ, ສ້າງສະພາບແວດລ້ອມທີ່ມີຄວາມສົມດູນ, ກົມກຽວກັນ, ສາມັກຄີປອງດອງໃນສັງຄົມ ແລະ ມີການເຂົ້າຮ່ວມຂອງສັງຄົມ. ຊຶ່ງລວມມີ 09 ວຽກງານສຳຄັນ ເປັນຕົ້ນ:
1) ການຊ່ວຍເຫຼືອບັນເທົາທຸກເບື້ອງຕົ້ນ;
2) ການປຸກລະດົມຂົນຂວາຍບໍລິຈາກເລືອດ ແລະ ສະໜອງເລືອດທີ່ປອດໄພ;
3) ການສົ່ງເສີມສຸຂະພາບຂັ້ນພື້ນຖານ;
4) ການປະຖົມພະຍາບານ;
5) ການກູ້ໄພສຸກເສີນ;
6) ການໂຄສະນາຂົນຂວາຍແຫຼ່ງທຶນ;
7) ການສ້າງສະມາຊິກ ແລະ ອາສາສະໝັກກາແດງ;
😎 ການສືບທາວຫາຍາດພີ່ນ້ອງ;
9) ການພົວພັນ ແລະ ການຮ່ວມມືສາກົນ.
ອົງການກາແດງແຫ່ງຊາດລາວ ພ້ອມແລ້ວທີ່ຈະເຮັດວຽກງານມະນຸດສະທຳ ຕາມ ພາລະບົດບາດຂອງຕົນ ເພື່ອສ້າງ ແລະ ສົງເສີມຄຸນຄ່າດ້ານມະນຸດສະທຳ ໂດຍບໍ່ຈຳແນກ ການປະຕິບັດຢູ່ສັງຄົມລາວ, ເປັນຂົວຕໍ່ນຳເອົາຄວາມເມດຕາ, ນໍ້າໃຈ ຈາກຜູ້ໃຈບຸນທັງຫຼາຍ ສົ່ງໄປຮອດໄປເຖິງຜູ້ທີ່ຂາດແຄນ, ອ່ອນນ້ອຍ, ດ້ອຍໂອກາດ;
ເນື່ອງໃນວັນກາແດງ ແລະ ຊີກວົງເດືອນແດງສາກົນນີ້, ຂໍສະແດງຄວາມຍ້ອງຍໍ ຊົມເຊີຍຕໍ່ພະນັກງານ, ສະມາຊິກ, ອາສາສະໝັກກາແດງທັງຫຼາຍ ທີ່ໄດ້ປະຕິບັດໜ້າທີ່ວຽກງານດ້ວຍຄວາມຮັບຜິດຊອບ, ດ້ວຍຄວາມເສຍສະຫຼະ ຊຶ່ງພວກເຂົາເຈົ້າເຫຼົ່ານັ້ນ ເຮັດວຽກຢູ່ໃນແຖວໜ້າຂອງວິກິດການ, ຢູ່ໃນສະຖານະການທີ່ຫຍຸ້ງຍາກ ແລະ ມີຄວາມສ່ຽງ ຕໍ່ຄວາມປອດໄພຂອງຕົນເອງ;
ຂໍສະແດງຄວາມຮູ້ບຸນຄຸນຢ່າງສູງຕໍ່ບຸກຄົນ, ນິຕິບຸກຄົນ ທັງລາວ ແລະ ຕ່າງປະເທດ ທີ່ໄດ້ມີນໍ້າໃຈ ເມດຕາ ສະຫຼະວັດຖຸປັດໄຈ ປະກອບສ່ວນຊຸກຍູ້ສົ່ງເສີມວຽກງານມະນຸດ ສະທຳ ຂອງອົງການກາແດງແຫ່ງຊາດລາວ.
ຂໍອວຍພອນມາຍັງຜູ້ນຳພັກ-ລັດຖະບານ, ບັນດາທ່ານ ແລະ ປະຊາຊົນທຸກຖ້ວນໜ້າ ຈົ່ງມີສຸຂະພາບແຂງແຮງ ແລະ ມີຄວາມຜາສຸກ.
“ ຂໍຂອບໃຈ ”