ອົງການກາແດງລາວ

CROIX ROUGE LAO

ປະທານອົງການກາແດງແຫ່ງຊາດ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມສະພາກາແດງ ແລະ ຊີກວົງເດືອນແດງສາກົນ ຄັ້ງທີ່ 23, ທີ່ເຊີແນວ ປະເທດສະວິດຊເຊີແລນ.

ໃນລະຫ່ວາງ ວັນທີ 18-23 ມິຖຸນາ2022,ທ່ານ ຮສ.ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ເຂົ້າຮ່ວມກອງປະຊຸມສະພາກາແດງແລະຊິກວົງເດືອນແດງສາກົນຄັ້ງທີ່23 ທີ່ເຊີແນວ ປະເທດສະວິດເຊີແລນກອງປະຊຸມດັ່ງກ່າວ ແມ່ນໄດ້ຈັດຂຶ້ນທຸກໆສອງປີ, ໃນກອງປະຊຸມໄດ້ເຊີນເອົາບັນດາຄະນະນຳຂອງປະເທດສະມາຊິກກາແດງ ແລະ ຊີກວົງເດືອນ 192 ປະເທດໃນທົ່ວໂລກ ເຂົ້າຮ່ວມ ຈຸດປະສົງເພື່ອປຶກສາຫາລື ແລະ ກຳນົດບັນດາບູລະມາສິດຂອງການດໍາເນີນວຽກງານກາແດງ ແລະ ຊີກວົງເດືອນແດງສາກົນກໍ່ຄືວຽກງານມະນຸດສະທຳໃນ 02 ປີຕໍ່ໜ້າ, ໃນກອງປະຊຸມໄດ້ຮັບຮອງເອົາຫລາຍນະໂຍບາຍເປັນຕົ້ນ: ການສ້າງຄວາມເຂັ້ມແຂງໃຫ້ແກ່ອົງການ, ການຮັບມືຕໍ່ວຽກງານປ່ຽນແປງທາງດິນຟ້າອາກາດ ແລະ ສິ່ງແວດລ້ອມ, ການສ້າງຄວາມເຂັ້ມແຂງດ້ານວຽກງານອາສາສະໝັກ, ພ້ອມກັນນັ້ນໃນກອງປະຊຸມ ຍັງໄດ້ປ່ອນບັດຂັດເລືອກຕັ້ງເອົາປະທານ, ຮອງປະທານ ສະຫະພັນກາແດງ ແລະ ຊີກວົງເດືອນແດງ ແລະ ຄະນະກຳມະທິການຕ່າງໆ ເຊິ່ງປີນີ້ແມ່ນ ທ່ານ Francesco Rocca ໄດ້ຖືກເລືອກໃຫ້ສືບຕໍ່ດຳລົງຕຳແຫນ່ງເປັນປະທານສະຫະພັນກາແດງ ແລະ ຊີກວົງເດືອນແດງສາກົນ ສະໄໝທີ່ສອງ, ພິເສດກາແດງປະເທດຈາກອາຊີຕາເວັນອອກສ່ຽງໃຕ້ກໍ່ຄືກາແດງຊີກວົງເດືອນ ມາເລເຊຍ ໄດ້ຮັບເລືອກເຂົ້າເປັນຫນຶ່ງໃນສະມາຊິກຂອງຄະນະກຳມາທິການບໍລິຫານ ເຊິ່ງຄະນະດັ່ງກ່າວຈະມີວາລະການເຮັດວຽກເປັນໄລຍະເວລາ 04 ປີ.
ໃນໂອກາດນີ້ ປະທານອົງການກາແດງແຫ່ງຊາດລາວ ໄດ້ຖືໂອກາດເຂົ້າພົບປະທານ, ເລຂາທິການໃຫ່ຍສະຫະພັນກາແດງ ແລະ ຊີກວົງເດືອນແດງສາກົນ ນັບທັງການພົບປະສອງຝ່າຍກັບບັນດາກາແດງເພື່ອນມິດຕ່າງໆເຊັ່ນ: ກາແດງຫວຽດນາມ, ຈີນ, ໄທ, ສະວິດຊ, ສິງກະໂປ, ມາເລເຊຍ, ຟີລິບປິນ, ສ.ເກົາຫລີ, ເພື່ອຍາດແຍ່ງການສະໜັບສະໜູນ, ຊ່ວຍເຫລືອທັງເປັນການເພີ່ມທະວີການຮ່ວມມືສາຍພົວພັນໃຫ້ແຫນ້ນແຟ້ນ ແລະ ໃນການພັດທະນາອົງການກາແດງແຫ່ງຊາດລາວໃຫ້ສາມາດບັນລຸໄດ້ຕາມແຜນຍຸດຖະສາດທີ່ກຳນົດໄວ້ໃນຍຸດທະສາດທີກຳນົດໄວ້ແຕ່ນີ້2021-2030.ໃຫ້ປະກົດຜົນເປັນຈິງ.