ອົງການກາແດງລາວ

CROIX ROUGE LAO

ພະນັກງານແຂວງຜົ້ງສາລີເຊື່ອມຊຶມວຽກງານກາແດງ

ໃນຕອນເຊົ້າຂອງວັນທີ 2 ພຶດສະພາ 2019 ນີ້ ຢູ່ທີ່ສະໂມສອນແຂວງຜົ້ງສາລີ ກາແດງແຂວງຜົ້ງສາລີຈັດພິທີເຜີຍແຜ່ພາລະບົດບາດຂອງກາແດງ ແລະ ກົດໝາຍອົງການກາແດງລາວ ໂດຍການເປັນປະທານຂອງທ່ານ ທ່ານ ທອງສີ ເສົາສຸລິວົງ ຮອງເຈົ້າແຂວງຜົ້ງສາລີ ທອງພະຈັນ ສອນນະສິນ ຮອງປະທານອົງການກາແດງລາວ, ທັງເປັນປະທານອົງການກາແດງແຂວງຜົ້ງສາລີ, ມີບັນດາທ່ານຫົວໜ້າພະແນກການ, ຮອງພະແນກ ແລະ ພະນັກງານພາຍໃນແຂວງເຂົ້າຮ່ວມທັງໝົດ 157 ຄົນ.


ການເຜີຍແຜ່ໃນຄັ້ງນີ້ປະກອບມີ: ອົງປະກອບຂອງຂະບວນການກາແດງສາກົນ, 7 ຫຼັກການພື້ນຖານຂອງຂະບວນການກາແດງ, ເຄື່ອງໝາຍມະນຸດສະທຳ; ປະຫວັດຄວາມເປັນມາ, ພາລະບົດບາດ ສິດ ແລະ ໜ້າທີ່, ການເຕີບໃຫຍ່ຂະຫຍາຍຕົວຂອງອົງການກາແດງລາວ; ຕີລາຄາການເຄື່ອນໄຫວວຽກງານກາແດງໃນແຕ່ລະໄລຍະ; ກົດໝາຍວ່າດ້ວຍວຽກງານກາແດງລາວ ເຊິ່ງນຳສະເໜີໂດຍ ທ່ານ ອາຈານ ພອນຄຳ ແກ້ວວິໄລ ຫົວໜ້າກອງໂຄສະນາ ແລະ ຂົນຂວາຍການກຸສົນ ອົງການກາແດງລາວ, ໃນນັ້ນ ທ່ານ ຮອງເຈົ້າແຂວງໄດ້ເນັ້ນໜັກໃຫ້ທຸກຂະແໜງການອ້ອມຂ້າງໃຫ້ເອົາໃຈໃສ່ 3 ບັນຫາຕົ້ນຕໍຄື: ວຽກງານສະໜອງເລືອດປອດໄພ ໃຫ້ເອົາໃຈໃສ່ປະກອບສ່ວນຊ່ວຍເຫຼືອໃນການໂຄສະນາປຸກລະດົມ, ປູກຈິດສຳນຶກ, ໃຫ້ຄວາມຮູ້ແກ່ສັງຄົມມີສ່ວນຮ່ວມໃນການບໍລິຈາກເລືອດໃຫ້ຫຼາຍຂຶ້ນ; ວຽກງານໂຄສະນາຊອກຫາແຫຼ່ງທຶນ ຕ້ອງເອົາໃຈໃສ່ຢ່າງຕັ້ງໜ້າໃຫ້ຄວາມສຳຄັນໃນການປະກອບສ່ວນ ຊອກຫາວິທີການປຸກລະດົມດ້ວຍຫຼາຍຮູບແບບ, ພ້ອມທັງມີການສະຫຼຸບຕີລາຄາ, ວຽກງານພົວພັນຕ່າງປະເທດ ໃຫ້ຂະແໜງການດັ່ງກ່າວພົວພັນຮ່ວມມືກັບບັນດາປະເທດທີ່ມີຊາຍແດນຮ່ວມກັບ ເພື່ອຂໍການຊ່ວຍເຫຼືອທັງອຳນວຍຄວາມສະດວກແກ່ຂະແໜງການດັ່ງກ່າວ. ສືບຕໍ່ເອົາໃຈໃສ່ ຮັບຮູ້ເຂົ້າໃຈ, ເຊື່ອມຊຶມເອກະສານດັ່ງກ່າວຢ່າງເລິກເຊິ່ງ ແລະ ເອື້ອອຳນວຍ ແລະ ໃຫ້ຄວາມຮ່ວມໄມ້ຮ່ວມມືໃນການເຄື່ອນໄຫວວຽກງານກາແດງໂດຍສະເພາະ 9 ໜ້າວຽກຕົ້ນຕໍຄື: ການຊ່ວຍເຫຼືອບັນເທົາທຸກເບື້ອງຕົ້ນ, ການບໍລິຈາກເລືອດ-ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາ ແລະ ຂົນຂວາຍແຫຼ່ງທຶນ, ການສ້າງອາສາສະໝັກກາແດງ, ການສືບທາວຫາຍາດພີ່ນ້ອງ ແລະ ການພົວພັນຮ່ວມມືສາກົນ ເພື່ອເຮັດໃຫ້ແຂວງຜົ້ງສາລີເປັນແຂວງມະນຸດສະທຳ, ເມດຕາທຳ ແລະ ເປັນທີ່ເພິ່ງພໍໃຈຂອງປະຊາຊົນບັນດາເຜົ່າ.