ອົງການກາແດງລາວ

CROIX ROUGE LAO

ພິທີມອບ – ຮັບເຮືອນ ແລະ ເຄື່ອງຊ່ວຍເຫຼືອບັນເທົາທຸກໃຫ້ຄອບຄົວປ່ຽວພອຍໃຫ້ບ້ານກົກມ່ວງ,ບ້ານຫ້ວຍລະ,ບ້ານພະບາດໃຫຍ່ ແລະ ບ້ານປ່າຫວາຍ ເມືອງສິງ ແຂວງຫຼວງນໍ້າທາ

ໃນຕອນເຊົ້າຂອງວັນທີ 2 ມີນາ 2022 ນີ້ຢູ່ທີ່ບ້ານດັ່ງກ່າວ
ເປັນກຽດເຂົ້າຮ່ວມຂອງທ່ານ ຊຽງວັນ ສົມລັດທອງ ກຳມະການປະຈຳພັກເມືອງ ຮອງເຈົ້າເມືອງໆສິງ ຜູ້ຊີ້ນຳວຽກງານຂົງເຂດວັດທະນະທຳ – ສັງຄົມ,ທ່ານ ດຣ ສົມສຸກ ສົມສະຫວັດ ຫົວໜ້າອົງການກາແດງແຂວງຫຼວງນໍ້າທາ,ທ່ານ ໄມ່ຍອດແສງ ສິງຈັນທາ ຫົວໜ້າອົງການກາແດງເມືອງສິງ,ມີເລຂາຄະນະພັກຮາກຖານກຸ່ມບ້ານ,ອົງການປົກຄອງບ້ານ,ເຖົ້າແກ່ແນວໂຮມ ແລະ ຄອບຄົວທຸກຍາກເຂົ້າຮ່ວມ.
ການປຸກສ້າງເຮືອນໃຫ້ຜູ້ທຸກຍາກຂາດເຂີນ,ອານາຖາ,ປ່ຽວພອຍ,ດ້ອຍໂອກາດ,ກໍາພ້າ,ກໍາພອຍ,ຄົນພິການ ແລະ ຜູ້ຢູ່ເຂດຫ່າງໄກສອກຫຼີກໃນຄັ້ງນີ້ມີເຮືອນ 5 ຫຼັງ,ອຸປະກອນຮັບໃຊ້ຄົວເຮືອນ ແລະ ເຄື່ອງນຸ່ງຫົ່ມ 28 ຖົງໃຫຍ່ ລວມມູນຄ່າທັງໝົດ 25,101,000 ກີບ ( ຊາວຫ້າລ້ານໜື່ງແສນໜື່ງພັນກີບ ) ແລະ ມອບໃຫ້ປະຊາຊົນຜູ້ທີ່ທຸກຍາກຂາດເຂີນໃຫ້ກຽດມອບໂດຍທ່ານ ຊຽງວັນ ສົມລັດທອງ ແລະ ທ່ານ ດຣ ສົມສຸກ ສົມສະຫວັດ ຮັບໂດຍພໍ່ແມ່ປະຊາຊົນຄອບຄົວທຸກຍາກ ໂດຍຊ່ອງໜ້າຜູ້ເຂົ້າຮ່ວມ ເພື່ອເປັນສັກຂີພະຍານ.
ທຶນແມ່ນໄດ້ຮັບການຊ່ວຍເຫຼືອຈາກອົງການກາແດງ ແລະ ຊາວບ້ານປະກອບສ່ວນຊ່ວຍເຫຼືອ
ພ້ອມນັ້ນທ່ານ ຊຽງວັນ ສົມລັດທອງ ກຳມະການປະຈຳພັກເມືອງ ຮອງເຈົ້າເມືອງໆສິງ ຜູ້ຊີ້ນຳວຽກງານຂົງເຂດວັດທະນະທຳ – ສັງຄົມ ກ່າວສະແດງຄວາມຂອບໃຈມາຍັງອົງການກາແດງແຂວງ,ເມືອງ ແລະ ພໍ່ແມ່ປະຊາຊົນທີ່ເຫັນໄດ້ຄວາມສໍາຄັນເຫັນອົກເຫັນໃຈຊ່ວຍເຫຼືອຄອບຄົວຜູ້ທີ່ທຸກຍາກຂາດເຂີນອານາຖາບໍ່ມີບ່ອນຢູ່ອາໄສ ຂໍໃຫ້ຜູ້ປະກອບສ່ວນຊ່ວຍເຫຼືອທຸກທ່ານຈົ່ງມີແຕ່ຄວາມສຸກກາຍສະບາຍໃຈ ພ້ອມທັງຮຽກຮ້ອງໃຫ້ຄອບຄົວທຸກຍາກທຸກທ່ານຈົ່ງນໍາໃຊ້ເຮືອນທີ່ໄດ້ຮັບການຊ່ວຍເຫຼືອຈາກອົງການກາແດງແຂວງ,ເມືອງ ແລະ ປະກອບສວ່ນຊ່ວຍເຫຼືອຈາກພໍ່ແມ່ປະຊາຊົນ ຈົ່ງປົກປັກຮັກສາ ແລະ ໄວ້ໃຫ້ໄດ້ໃຊ້ຍາວນານ.
ຈຸດປະສົງໃນການປຸກສ້າງເຮືອນໃຫ້ຜູ້ທຸກຍາກຂາດເຂີນໃນຄັ້ງນີ້ກໍ່ເພື່ອເຮັດໃຫ້ເຂົາເຈົ້າມີບ່ອນທີ່ຢູ່ອາໄສ ເຮັດໃຫ້ມີກຳລັງໃຈໃນການສ້າງເສດຖະກິດເຂົ້າສູ່ຄອບຄົວ ແລະ ເຮັດໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.