ອົງການກາແດງລາວ

CROIX ROUGE LAO

ພິທີເຊັນບົດບັນທຶກຄວາມເຂົ້າໃຈ ລະຫວ່າງອົງການກາແດງແຫ່ງຊາດລາວ ແລະ ອົງການກາແດງສະວິດສ໌

ໃນວັນທີ 25 ເມສາ 2022, ຢູ່ຫ້ອງປະຊຸມສະຖາບັນເລືອດແຫ່ງຊາດອົງການກາແດງແຫ່ງຊາດລາວ ໄດ້ມີພິທີເຊັນບົດບັນທຶກຄວາມເຂົ້າໃຈການຈັດຕັ້ງປະຕິບັດໂຄງການ “ໂຄງການສະໜັບສະໜູນການພັດທະນາວຽກງານປຸກລະດົມບໍລິຈາກເລືອດ ແລະ ສະໜອງເລືອດທີ່ປອດໄພ” ລະຫວ່າງອົງການກາແດງແຫ່ງຊາດລາວ ແລະ ອົງການກາແດງສະວິດສ໌ ປະຈຳ ສປປ ລາວ, ໂດຍການເປັນປະທານຂອງທ່ານ ຮສ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດລາວ, ມີທ່ານ ຊັງມາກ ໂຕເມ ຜູ້ຕາງໜ້າອົງການກາແດງສະວິດສ໌ ປະຈຳ ສປປ ລາວ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ໂຄງການດັ່ງກ່າວແມ່ນການຮ່ວມມື ສະໜັບສະໜູນດ້ານວິຊາການ ແລະ ງົບປະມານ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນຍຸດທະສາດຂອງອົງການກາແດງແຫ່ງຊາດລາວ ກໍ່ຄືແຜນຈັດຕັ້ງປະຕິບັດວຽກງານປຸກລະດົມຂົນຂວາຍ ບໍລິຈາກເລືອດ ແລະ ສະໜອງເລືອດທີ່ປອດໄພ ໂດຍໃຫ້ການສະໜັບສະໜູນ ໃຫ້ມີການຮັບບໍລິຈາກເລືອດໃຫ້ຫຼາຍຂຶ້ນ, ຂະບວນການທີ່ເຮັດໃຫ້ເລືອດມີຄວາມປອດໄພ ແລະ ມີຄຸນນະພາບ ແນໃສ່ໃຫ້ສາມາດຕອບສະໜອງເລືອດທີ່ພຽງພໍ ແລະ ປອດໄພໃຫ້ຄົນເຈັບທີ່ຕ້ອງການໃຫ້ນັບມື້ນັບດີຂຶ້ນ, ຊຶ່ງຈະໄດ້ເລີ່ມຈັດຕັ້ງປະຕິບັດນັບແຕ່ມື້ລົງລາຍເຊັນບົດບັນທຶກຄວາມເຂົ້າໃຈເປັນຕົ້ນໄປ ແລະ ໂຄງການຈະສິ້ນສຸດໃນວັນທີ 31 ທັນວາ 2024, ໂດຍແມ່ນທຶນສະໜັບສະໜູນຂອງອົງການກາແດງສະວິດ໌ລວມເປັນມູນຄ່າທັງໝົດ 714.540 ຝຼັງສະວິດສ໌ ຫຼື ປະທານ 8.5 ຕື້ກີບ.
ທ່ານ ດຮ. ຈັນທະລາ ສຸກສາຄອນ, ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດ ໄດ້ແຈ້ງໃຫ້ຮູ້ຕື່ມອີກວ່າ: ໂຄງການສະໜັບສະໜູນການພັດທະນາວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພ ແມ່ນມີຈຸດປະສົງແນໃສ່ ເພີ່ມທະວີການເຂົ້າເຖິງການບໍລິຈາກເລືອດ ແລະ ປັບປຸງຄຸນນະພາບຂອງການບໍລິຈາກເລືອດ ເພື່ອໃຫ້ສັງຄົມປະກອບສ່ວນໃນວຽກງານການບໍລິຈາກເລືອດໃຫ້ຫຼາຍຂຶ້ນເພື່ອໃຫ້ບັນລຸຕາມຄາດໝາຍ 100%, ໂດຍສະເພາະເລັ່ງໃສ່ກຸ່ມເປົ້າໝາຍທີ່ສາມາດບໍລິຈາກເລືອດໄດ້, ນອກຈາກນັ້ນ, ກໍ່ຍັງເປັນການສ້າງຄວາມເຂັ້ມແຂງໃຫ້ແກ່ອົງການກາແດງແຫ່ງຊາດລາວ ໃນການຄຸ້ມຄອງບໍລິຫານວຽກງານເລືອດໃຫ້ມີຄວາມຍືນຍົງ.
ທ່ານ ຮສ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດລາວ ກໍ່ໄດ້ກ່າວສະແດງຄວາມຂອບໃຈ ມາຍັງອົງການກາແດງສະວິດສ໌ ຕໍ່ການຂົນຂວາຍ ແລະ ສະໜັບສະໜູນດ້ານງົບປະມານ ໃຫ້ແກ່ອົງການກາແດງແຫ່ງຊາດລາວ ຕະຫຼອດມາ, ຊຶ່ງເຫັນໄດ້ເຖິງຄວາມມີນ້ຳໃຈມະນຸດສະທຳ ແລະ ເຊື່ອໝັ້ນວ່າ ໂຄງການດັ່ງກ່າວ ຈະຊ່ວຍພັດທະນາວຽກງານການປຸກລະດົມບໍລິຈາກເລືອດ ແລະ ສະໜອງເລືອດທີ່ປອດໄພ ຂອງສະຖາບັນເລືອດແຫ່ງຊາດ ໃຫ້ສາມາດຕອບສະໜອງເລືອດໃຫ້ແກ່ຄົນເຈັບ ໃຫ້ພຽງພໍ, ປອດໄພ ແລະ ທັນກັບເວລາ, ເພື່ອເປັນພັດທະນາການຮ່ວມມື ລະຫວ່າງອົງການກາແດງແຫ່ງຊາດລາວ ແລະ ອົງການກາແດງສະວິດສ໌ ໃຫ້ມີຄວາມເຂັ້ມແຂງ ແລະ ເສີມຂະຫຍາຍການພົວພັນຮ່ວມມືໃຫ້ແໜ້ນແຟ້ນຂຶ້ນກວ່າເກົ່າ.
ພິທີລົງນາມການຊ່ວຍເຫລືອຕາງໜ້າອົງການກາແດງແຫ່ງຊາດລາວໂດຍ ທ່ານ ຮສ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດລາວແລະ ທ່ານ ຊັງມາກ ໂຕເມ ຜູ້ຕາງໜ້າອົງການກາແດງສະວິດສ໌ ປະຈຳ ສປປ ລາວ ເພື່ອເປັນບ່ອນອີງໃນການຈັດຕັ້ງປະຕິບັດໂຄງການດັ່ງກ່າວໃຫ້ມີຜົນສຳເລັດຕາມແຜນທີ່ໄດ້ກຳນົດໄວ້.