ອົງການກາແດງລາວ

CROIX ROUGE LAO

ມອບລົດອຳບູລັງໃຫ້ແກ່ກາແດງແຂວງ

ໃນຕອນບ່າຍຂອງວັນທີວັນທີ 25 ມີນາ 2022 ທີ່ອົງການກາແດງແຫ່ງຊາດລາວ ໄດ້ມີພິທີມອບຮັບລົດອຳບຸລັງ ໃຫ້ອົງການການກາແດງຈຳນວນ 4 ຄັນເພື່ອນຳເຂົ້າໃນວຽກງານກູ້ຊີບ-ກູ້ໄພ ເຊິ່ງປະກອບມີແຂວງ ອັດຕະປື, ສາລະວັນ, ຫຼວງພະບາງ ແລະ ແຂວງ ບໍ່ແກ້ວ, ໂດຍການເຂົ້າຮ່ວມຂອງທ່ານ ຮສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ, ມີບັນດາຫົວໜ້າອົງການກາແດງແຂວງ ທັງ 4 ແຂວງ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ການມອບລົດອຳບູລັງ ສຸກເສີນໃນຄັ້ງນີ້, ກໍ່ແມ່ນເພື່ອແນ່ໃສ່ຊ່ວຍເຫຼືອຄົນເຈັບໃຫ້ທັນກັບເວລາ, ຫຼຸດຜ່ອນການບາດເຈັບ, ພິການ ແລະ ເສຍຊີວິດ ໃນເວລາເກີດອຸປະເຫດ ແລະ ທັງເປັນການປະກອບສ່ວນໃນການຊ່ວຍເຫຼືອສັງຄົມ, ອີງຕາມສະຖິຕິໃນ 3 ເດືອນຕົ້ນປີ 2022 ນີ້ (ມັງກອນ,ກຸມພາ,ມີນາ) ທີ່ທາງໜ່ວຍງານໄພ 1625 ອົງການກາແດງແຫ່ງຊາດລາວໃນທົ່ວປະເທດ(ຫລວງພະບາງ, ບໍ່ແກ້ວ, ໄຊຍະບູລີ,ວຽງຈັນ, ນະຄອນຫຼວງວຽງຈັນ ແລະ ຄຳມ່ວນ) ໄດ້ເຄື່ອນໄຫວອຸປະຕິເຫດທັງໝົດ 640 ຄັ້ງ, ມີຜູ້ໄດ້ຮັບບາດເຈັບ 690 ຄົນ, ຍິງ 253 ຄົນ, ເສຍຊີວິດ 68 ຄົນ, ຍິງ 16 ຄົນ, ສະແດງໃຫ້ເຫັນວ່າມີໂຕເລກທີ່ສູງພໍສົມຄວນ, ສະນັ້ນ,ຕາມກົດຫມາຍຂອງອົງການກາແດງມາດຕາທີ 13 ວ່າດ້ວຍວຽກງານການກູ້ໄພສຸກເສີນ ແລະ ອິງໃສ່ແຜນຍຸດຖະສາດອົງການກາແດງແຫ່ງຊາດລາວລາວໃນປີ 2022 – 2030 ວ່າດ້ວຍການກູ້ໄພສຸກເສີນ ແມ່ນການຊ່ວຍເຫຼືອອັນຮີບດ່ວນ ເພື່ອກອບກູ້ເອົາຜູ້ເຄາະຮ້າຍ ຈາກໄພທຳມະຊາດແລະ ມະນຸດສ້າງຂຶ້ນ ເຊັ່ນ: ອຸປະຕິເຫດທາງຖະໜົນ, ທາງອາກາດ, ທາງນ້ຳ, ທາງອຸທົກກະໄພ, ອັກຄີໄພ, ວາຕະໄພ, ດິນເຈື່ອນ, ຕຶກຖະຫຼົ່ມ, ແຜ່ນດິນໄຫວ ແລະ ພະຍາດລະບາດ; ສະນັ້ນ, ຈຶ່ງເຫັນໄດ້ຄວາມສຳຄັນໃນວຽກງານຊ່ວຍເຫລືອສຸກເສີນ ແມ່ນມີຄວາມຈຳເປັນຢູ່ແຂວງ ຢູ່ເມືອງ ທີ່ຫ່າງໄກສອກຫຼີກ, ເຊິ່ງຈະໄດ້ມອບໃຫ້ກາແດງແຂວງ ອັດຕະປື, ສາລະວັນ, ຫຼວງພະບາງ ແລະ ແຂວງ ບໍ່ແກ້ວ ເພື່ອຮັບໃຊ້ໃນເວລາເກີດອຸປະຕິເຫດ ແລະ ໄພສຸກເສີນຕ່າງໆ. ເຊິ່ງບາງແຂວງກໍ່ໄດ້ມີບົດຮຽນປະສົບປະການ ແລະ ມີພາຫະນະຮັບໃຊ້ມາແລ້ວ ແຕ່ກໍ່ຍງັບໍ່ທັນພຽງພໍ, ບາງແຂວງ ກໍ່ຈະໄດ້ເປັນຄັ້ງທຳອິດທີ່ຈະໄດ້ນຳໄປເປີດໜ່ວຍກູ້ໄພຊ່ວຍເຫຼືອສຸກເສີນໃນແຂວງ ຂອງຕົນ ກໍ່ຄືແຂວງ ສາລະວັນ ແລະ ແຂວງ ອັດຕະປື, ລົດທີ່ນຳມາມອບໃນຄັ້ງນີ້ຈຳນວນ 04 ຄັນ ເຊິ່ງໄດ້ຮັບການສະໜັບສະໜູນຈາກ ມູນນິທິອາສາຄົນທີ່ງົດງາມ ສ.ເກົາຫຼີ, ລວມມູນຄ່າ 150.000 ໂດຣາສະຫະລັດ. ລົດດັ່ງກ່າວເປັນປະເພດລົດຕູ້ ຍີ່ຫໍ້ ຮຸນໄດ໋ ພ້ອມດ້ວຍອຸປະການການແພດຄົບວົງຈອນ.
ໃນພິທີໃຫ້ກຽດກ່າວມອບໂດຍ ທ່ານ ຮສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ, ໃຫ້ກຽດຕາງໜ້າກ່າວຮັບໂດຍ ດຣ. ວຽງສະຫວັນ ກະເສີມສຸກ ຫົວໜ້າອົງການກາແດງ ແຂວງຫຼວງພະບາງ, ເຊິ່ງທ່ານກໍ່ໄດ້ສະແດງຄວາມຮູ້ບຸນຄຸນຕໍ່ຄະນະນຳອົງການກາແດງແຫ່ງລາວ ທີ່ໄດ້ຂົນຂວາຍຫາພາຫະນະມາຮັບໃຊ້ໃນວຽກງານກູ້ໄພສຸກເສີນ ເພື່ອໃຫ້ການບໍລິການຊ່ວຍເຫຼືອສັງຄົມ ແລະ ລົດທີ່ໄດ້ຮັບໃນຄັ້ງນີ້ ພວກຂ້າພະເຈົ້າພ້ອມຈະນຳໃຊ້ໃຫ້ເກິດປະໂຫຍດສູງສຸດໃນການຊ່ວຍເຫລືອປະຊາຊົນທີ່ປະສົບໄພ.
ໃນຕອນທ້າຍ, ທ່ານ ຮສ.ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ກ່າວວ່າ: ວຽກງານກູ້ຊີບກູ້ໄພແມ່ນໜຶ່ງ ໃນ 9 ໜ້າວຽກຈຸດສຸມຂອງອົງການກາແດງລາວ ທີ່ຈະຕ້ອງໄດ້ປະກອບສ່ວນໃນວຽກງານນີ້ໃຫ້ເພີ່ມຂຶ້ນ ເພື່ອໃຫ້ມີຄວາມທັນສະໄໝ, ວ່ອງໄວ ແລະ ບໍລິການປະຊາຊົນໃຫ້ທັນເວລາ ໂດຍບໍ່ຮຽກຮ້ອງສິ່ງຕອບແທນ, ໃນອະນາຄົດທາງອົງການກາແດງແຫ່ງຊາດລາວຂອງພວກເຮົາແມ່ນຈະໄດ້ຂະຫຍາຍຕາໜ່າງ ໜ່ວຍກູ້ຊີບກູ້ໄພ 1625 ອົງການກາແດງລາວລົງໄປສູ່ບັນດາແຂວງຕ່າງໆທີ່ມີຄວາມພ້ອມ ເພື່ອໃຫ້ການຊ່ວຍເຫຼືອປະຊາຊົນ.