ອົງການກາແດງລາວ

CROIX ROUGE LAO

ມອບຮັບໜ້າທີ່ປະທານອົງການກາແດງລາວຜູ້ເກົ່າແລະຜູ້ໃໝ່

ພິທີດັ່ງກ່າວໄດ້ຈັດຂຶ້ນໃນວັນທີ 14 ພຶດສະພາ 2021 ທີ່ຫ້ອງປະຊຸມອົງການກາແດງລາວ ໂດຍການເຂົ້າຮ່ວມຂອງທ່ານ ນາງ ໃບຄໍາ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍພາກສ່ວນກ່ຽວຂ້ອງ. ໃນພິທີ ຕາງໜ້າຈາກຄະນະຈັດຕັ້ງສູນກາງພັກໄດ້ຂຶ້ນຜ່ານດໍາລັດຂອງນາຍົກລັດຖະມົນຕີ ສະບັບເລກທີ 265 /ນຍ, ລົງວັນທີ 1ເມສາ 2021 ທີ່ໄດ້ອະນຸມັດໃຫ້ ທ່ານຄໍາຮຸ່ງ ເຮືອງວົງສີ ປະທານອົງການກາແດງລາວ ຜູ້ເກົ່າ ອອກພັກການ ຮັບອູດໜູນບໍານານ ແລະ ຜ່ານດຳລັດຂອງນາຍົກລັດຖະມົນຕີເລກທີ 287/ນຍ ລົງວັນທີ 2ເມສາ 2021 ວ່າດ້ວຍການແຕ່ງຕັ້ງ ທ່ານ ຮສ ດຣ. ພູທອນ ເມືອງປາກ ເປັນປະທານອົງການກາແດງລາວ ຜູ້ໃໝ່.
ໃນພິທີ ທ່ານ ຄຳຮຸ່ງ ເຮືອງວົງສີ ປະທານອົງການກາແດງ ຜູ້ເກົ່າກໍໄດ້ຂຶ້ນສະຫຼຸບຜົນງານການຈັດຕັ້ງປະຕິບັດ,ຊີ້ນຳ,ນຳພາຕະຫຼອດໄລຍະ5ປີຜ່ານມາ ພ້ອມທັງກ່າວມອບໜ້າທີ່, ຈາກນັ້ນ, ທ່ານ ຮສ ດຣ. ພູທອນ ເມືອງປາກ ປະທານອົງການກາແດງ ຜູ້ໃໝ່ກໍໄດ້ຂຶ້ນ ກ່າວສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານການຈັດຕັ້ງຂອງປະທານອົງການກາແດງຜູ້ເກົ່າໃນໄລຍະຜ່ານມາເຊິ່ງມີຫລາຍວຽກທີ່ພົ້ນເດັ່ນແລະສຳເລັດໃນການຈັດຕັ້ງປະຕີບັດແລະບົດຮຽນໃນການຈັດຕັ້ງປະຕິບັດແລະຂະຫຍາຍມູນເຊື້ອແລະ ນຳໄປຈັດຕັ້ງປະຕິບັດໃຫ້ເກີດດອກອອກຜົນ ພ້ອມທັງກ່າວຮັບໜ້າທີ່ເປັນປະທານອົງການກາແດງລາວ ພ້ອມນັ້ນ ປະທານຜູ້ເກົ່າ ແລະ ຜູ້ໃໝ່ ກໍໄດ້ພ້ອມກັນລົງລາຍເຊັນມອບຮັບໜ້າທີ່ກັນຢ່າງເປັນທາງການ.
ເພື່ອເປັນການໜັກແໜ້ນຂຶ້ນ ທ່ານ ໃບຄຳ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກໍໄດ້ກ່າວສະແດງຄວາມຊົມເຊີຍຕໍ່ປະທານອົງການກາແດງຜູ້ເກົ່າ ເຊິ່ງເຫັນວ່າໄດ້ສຳເລັດໜ້າທີ່ວຽກງານອັນສຳຄັນຫຼາຍດ້ານ ເປັນຕົ້ນແມ່ນ ໄດ້ສຳເລັດກົດໝາຍວ່າດ້ວຍວຽກງານກາແດງລາວ, ການປັບປຸງດ້ານການເມືອງແນວຄິດຂອງຖັນແຖວພະນັກງານໃນຂົງເຂດຂອງຕົນ ແລະ ອື່ນໆ ນອກນັ້ນ ຜູ້ມາຮັບໜ້າທີ່ໃໝ່ກໍຂໍໃຫ້ສືບຕໍ່ປະຕິບັດໜ້າທີຕາມການມອບໝາຍຂອງຂັ້ນເທິງ ທີ່ໄວ້ເນື້ອເຊື່ອໃຈໃຫ້ມາດຳລົງຕຳແໜ່ງດັ່ງກ່າວຈາກບົດຮຽນປະທານຜູ້ເກົ່າອັນໃດດີກໍສາມາດນຳໄປຜັນຂະຫຍາຍໃຫ້ໝູ່ຄະນະໄດ້ພ້ອມກັນປະຕິບັດຢ່າງແຂງແຮງແລະເກີດດອກອອກຜົນ.