ອົງການກາແດງລາວ

CROIX ROUGE LAO

ມອບ-ຮັບ ອາຄານສູນເລືອດຫຼັງໃໝແຂວງອັດຕະປື

ໃນວັນທີ 5 ມີນາ 2021 ນີ້ສູນເລືອດກາແດງແຂວງອັດຕະປື ໄດ້ຈັດພີທີມອບຮັບອາຄານສູນເລືອດຫລັງໃຫມ່ພາຍຫລັງໄດ້ເລີ່ມລົງມືກໍ່ສ້າງມາແຕ່ວັນທີ 14 ກັນຍາປີ 2020 ເປັນຕົ້ນມາ ແລະ ໄດ້ສຳເລັດເປັນທີ່ຮຽບຮ້ອຍ ໂດຍໃຊ້ເວລາການກໍ່ສ້າງເປັນເວລາ 5 ເດືອນກວ່າຈຶ່ງສໍາເລັດ, ໂດຍແມ່ນບໍລິສັດ ອູ່ທອງກໍ່ສ້າງ ຈຳກັດ ໃນມູນຄ່າ 700 ລ້ານກວ່າກີບ ໂດຍໄດ້ຮັບທຶນຊ່ວຍເຫຼືອລ້າຈາກລັດຖະບານປະເທດເຢຍລະມັນຜ່ານສະ​ພາກາແດງເຢຍລະມັນ ,ອາຄານຫລັງນີ້ແມ່ນຕັ້ງຢູ່ໂຮງໝໍແຂວງອັດຕະປື ເປັນອາຄານຊັ້ນດຽວ,ມຸ້ງດ້ວຍກະເບື້ອງ ແລະ ໂຄງສ້າງອາຄານເຮັດດ້ວຍເບຕົງເສີມເຫຼັກ, ປະກອບດ້ວຍຫ້ອງວິເຄາະ, ຫ້ອງເກັບຮັກສາເລືອດ ,ຫ້ອງປະຊຸມວິຊາການ, ຫ້ອງແພດຍາມ, ຫ້ອງຮັບບໍລິຈາກເລືອດ, ຫ້ອງສ້າງມ້ຽນເຄື່ອງບໍລິຈາກເລືອດ, ຫ້ອງລ້າງເຄື່ອງ ແລະ ຫ້ອງນໍ້າ.

ພິທີມອບ-ຮັບເປັນກຽດເຂົ້າຮ່ວມຂອງ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື, ມີ ທ່ານ ດຣ ຕິມ ເບຣ ຜູ້ຕາງໜ້າສະພາກາແດງເຢຍລະມັນ ປະຈຳ ສປປ ລາວ,ພ້ອມດ້ວຍບັນດາທ່ານແຂກຈາກພາກສ່ວນທີ່ກ່ຽວຂ້ອງເຂົ້າຮ່ວມ . ສູນເລືອດແຫ່ງໃໝ່ນີ້ຈະເປັນທ່າແຮງໃນການສ້າງຄວາມເຂັ້ມແຂງ ແລະ ສະດວກສະບາຍຂຶ້ນຂອງຄົນເຈັບໃນການຊົມໃຊ້ເລືອດ ແລະ ປີ 2021-2025 ສູນເລືອດແຂວງອັດຕະປືແມ່ນຈະສູ້ຊົນໃຫ້ໄດ້ 4.500 ຖົງ. ໃນປະຈຸບັນເລືອດຍັງບໍ່ທັນພຽງພໍ ກັບຄວາມຮຽກຮ້ອງຕ້ອງການຂອງການຊົມໃຊ້ເລືອດ, ສະນັ້ນຈຶ່ງຮຽກຮ້ອງມາຍັງສັງຄົມໃນຂອບເຂດທົ່ວແຂວງອັດຕະປືຈົ່ງໄດ້ພ້ອມກັນປະກອບສ່ວນເຂົ້າໃນວຽກງານການບໍລິຈາກເລືອດ.ໃນໂອກາດດັ່ງກ່າວທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ຂຶ້ນກ່າວມອບສູນເລືອດແຫ່ງດັ່ງກ່າວໃຫ້ແຂວງອັດຕະປື ພ້ອມທັງໄດ້ເນັ້ນໜັກໃຫ້ສູນເລືອດແຂວງຕ້ອງເອົາໃຈໃສລະດົມ ຂົນຂວາຍຮັບບໍລິຈາກເລືອດຈາກຫຼາຍພາກສ່ວນໃຫ້ບັນລຸຄາດໝາຍສູ້ຊົນ ແລະ ໃຫ້ປະສົບຜົນສຳເລັດນອກນັ້ນສະພາກາແດງເຢຍລະມັນຍັງໄດ້ປະກອບສ່ວນອຸປະກອນຄອມພິວເຕີ ມູນຄ່າ 9 ລ້ານກວ່າກີບໃຫ້ສູນເລືອດແຂວງອັດຕະປື