ອົງການກາແດງລາວ

CROIX ROUGE LAO

ລັດຖະບານປະດັບຫລຽນໄຊແຮງງານຊັ້ນ I ໃຫ້ສູນກາງຊາວໜຸ່ມປະຊາຊົນປະຕິວັດລາວ ສູນກາງຊາວຫນຸ່ມ

ວັນທີ 17 ທັນວາ 2021, ທີ່ສູນກາງຊາວໜຸ່ມປະຊາຊົນປະຕິວັດລາວ ໄດ້ມີພິທີປະດັບຫລຽນໄຊແຮງງານຊັ້ນ I ໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວ ໃນການເຂົ້າຮ່ວມວຽກງານບໍລິຈາກເລືອດແລະ ເຊັນບົດບັນທຶກການຮ່ວມມືປີ 2022 – 2025. ເພື່ອຍົກສູງບົດບາດຫນ້າທີ່ວຽກງານທັງສອງໃນຕໍ່ໜ້າ.
ພິທີດັ່ງເປັນກຽດເຂົ້າຮ່ວມຂອງທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກ, ເລຂາຄະນະບໍລິຫານຊາວໜຸ່ມປະຊາຊົນປະຕິວັດລາວ, ທ່ານ ຮສ.ດຮ. ພູທອນ ເມືອງປາກ ປະທານອົງການກາແດງລາວ, ມີບັນດາຫົວໜ້າຫ້ອງການ, ຫົວໜ້າພະແນກພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຕີລາຄາຜົນສຳເລັດການຈັດຕັ້ງປະຕິບັດການຮ່ວມມື ໃນໄລຍະຜ່ານມາ ທີ່ສະແດງໃຫ້ເຫັນເຖິງດ້ານດີ, ຂໍ້ຄົງຄ້າງ, ບົດຮຽນ ທີ່ຖອດຖອນໄດ້ແມ່ນ ຄະນະນຳທັງສອງຝ່າຍແມ່ນໄດ້ນຳພາຢ່າງໃກ້ຊິດ ແລະ ອຳນວຍຄວາມສະດວກໃນການເຄື່ອນໄຫວວຽກງານ ແລະ ກິດຈະກຳຕ່າງໆທີ່ໄດ້ຈັດຂຶ້ນຢ່າງມີຜົນສຳເລັດ, ໄດ້ຮັບການເອົາໃຈໃສ່ເປັນຢ່າງດີ ທັງພາກລັດ-ເອກະຊົນ ແລະ ອົງການຈັດຕັ້ງສາກົນຕ່າງໆ ກໍ່ໄດ້ໃຫ້ການຮ່ວມມືໃນການສະໜັບສະໜູນຊຸກຍູ້ບັນດາກິດຈະກຳໃຫ້ມີບັນຍາກາດຟົດຟື້ນ, ເຖິງແມ່ນວ່າກິດຈະກຳແຕ່ລະຄັ້ງ ຈະຖືກດຳເນີນໄປດ້ວຍດີເປັນຕົ້ນແມ່ນວຽກງານບໍລິຈາກເລືອດສາມາດບັນລຸຕາມເປົ້າໝາຍ, ການຈັດກິດຈະກຳແມ່ນເຮັດໄດ້ດີໃນຂັ້ນສູນກາງ ສ່ວນບັນດາທ້ອງຖິ່ນແມ່ນບໍ່ທັນໄດ້ທົ່ວເຖິງ, ງົບປະມານຊຸກຍູ້ໃຫ້ແກ່ການເຄື່ອນໄຫວວຽກງານຍັງບໍ່ທັນຕອບສະຫນອງໄດ້ກັບບັນດາໜ້າວຽກຕົວຈິງ ນັ້ນກໍ່ຍ້ອນສະພາບການແຜ່ລະບາດຂອງເຊື້ອພະຍາດໂຄວິດ-19, ສຳລັບແຜນການຮ່ວມມືໃນໄລຍະຕໍ່ໜ້າ ໂດຍອີງໃສ່ບັນດາໜ້າວຽກໃນບົດບັນທຶກການຮ່ວມມືເປັນຫຼັກ ໃນການຈັດຕັ້ງປະຕິບັດ, ນອກຈາກນັ້ນ ຄະນະນຳທັງສອງຝ່າຍຍັງໄດ້ໃຫ້ການສະໜັບສະໜູນ ແລະ ອຳນວຍຄວາມສະດວກໃນການເຂົ້າຮ່ວມເຄື່ອນໄຫວກິດຈະກຳຕ່າງໆໃນລະດັບພາກພື້ນ ແລະ ສາກົນ, ແລກປ່ຽນຂໍ້ມູນຂ່າວສານດ້ານວິຊາການ, ການລະດົມທຶນ ຍາດແຍ່ງເອົາການຊ່ວຍເຫລືອດ້ານຕ່າງໆເພື່ອເປັນການຍົກຖານະບົດບາດຂອງທັງສອງຝ່າຍ, ໄດ້ມີການປະສານພົວພັນໃນການນຳໃຊ້ເລືອດໃຫ້ແກ່ຄົນເຈັບທີ່ນອນປິ່ນປົວຢູ່ໃນໂຮງໝໍແຫ່ງຕ່າງໆ ເປັນຕົ້ນແມ່ນພະນັກງານ ແລະ ອາສາສະໝັກຊາວໜຸ່ມ, ໃນໂອກາດດັ່ງກ່າວຍັງໄດ້ເຊັນບົດບັນທຶກຮ່ວມມືປີ 2022 – 2025 ລະຫວ່າງສູນກາງຊາວໜຸ່ມປະຊາຊົນປະຕິວັດລາວ ແລະ ອົງການກາແດງລາວ ໂດຍການລົງນາມເຊັນບົດບັນທຶກຂອງ ທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກ, ເລຂາຄະນະບໍລິຫານຊາວໜຸ່ມປະຊາຊົນປະຕິວັດລາວ ແລະ ທ່ານ ຮສ.ດຮ. ພູທອນ ເມືອງປາກ ປະທານອົງການກາແດງລາວ ໂດຍມີພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ, ນອກຈາກນັ້ນ, ທ່ານປະທານອົງການກາແດງລາວ ກໍ່ໄດ້ປະດັບຫຼຽນໄຊແຮງງານຊັ້ນ I ໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວ ໂດຍອີງຕາມລັດຖະດຳລັດຂອງປະທານປະເທດ ລົງວັນທີ 15 ທັນວາ 2020, ເລກທີ 238/ປປທ ວ່າດ້ວຍມອບຫຼຽນໄຊແຮງງານຊັ້ນ I ໃຫ້ສູນກາງຊາວໜຸ່ມປະຊາຊົນປະຕິວັດລາວ ທີ່ມີຜົນງານໂດດເດັ່ນປະກອບສ່ວນ ຂົນຂວາຍຊາວໜຸ່ມຂັ້ນຕ່າງໆໃນຂອບເຂດທົ່ວປະເທດ ບໍລິຈາກເລືອດແບບສະໝັກໃຈ ໂດຍບໍ່ຫວັງສິ່ງຕອບແທນ ສະໜອງເລືອດປອດໄພໃຫ້ແກ່ຄົນເຈັບ ຕະຫຼອດໄລຍະ 5 ປີ (2015-2019, ເຊິ່ງຜົນງານດັ່ງກ່າວທີ່ເປັນຜົນງານລວມຍອດຂອງຊາວໜຸ່ມລາວທົ່ວປະເທດ ທີ່ໄດ້ອຸທິດເຫື່ອແຮງ ແລະ ຈິດໃຈ ໃນວຽກງານບໍລິຈາກເລືອດ ແລະ ກິດຈະກຳຕ່າງໆຢ່າງໃຫຍ່ຫຼວງ ມີຂະບວນການຟົດຟື້ນ ໂດຍສະເພາະແມ່ນ ການສ້າງຂະບວນການບໍລິຈາກເລືອດແບບສະໝັກໃຈບໍ່ຮຽກຮ້ອງສິ່ງຕອບແທນ ເຊິ່ງການບໍລິຈາກເລືອດໃນໄລຍະ 3 ປີຜ່ານມາ ມີຜູ້ບໍລິຈາກເລືອດທັງໝົດ 164.836ຄົນ ແລະ ເປັນກຸ່ມຊາວໜຸ່ມປະກອບສ່ວນ 138.462 ເທື່ອຄົນຫຼືເທົາກັບ 86% ຂອງຜູ້ບໍລິຈາກເລືອດທັງໝົດ, ໄດ້ສ້າງຄວາມເຂັ້ມແຂງໃຫ້ທີມງານ, ຊຸມຊົນກຽມພ້ອມຮັບມື ແລະ ຕອບໂຕ້ກັບໄພພິບັດ ຈາກທຳມະຊາດ ແລະ ມະນຸດສ້າງຂຶ້ນ ໂດຍສະເພາະການມອບເຄື່ອງຊ່ວຍເຫຼືອບັນເທົາທຸກໃຫ້ແກ່ຜູ້ປະສົບໄພພິບັດໃນໄລຍະສັນເກັບນ້ຳຂອງເຂື່ອນເຊປຽນ-ເຊນຳນ້ອຍແຕກ ແລະ ກິດຈະກຳອື່ນໆ ທີ່ທາງອົງການກາແດງລາວໄດ້ຈັດຕັ້ງປະຕິບັດ.
ໃນພິທີທີ່ມີຄວາມໝາຍຄວາມສຳຄັນໃນຄັ້ງນີ້ ທ່ານ ອາລຸນໄຊ ສູນນະລາດ ກໍ່ໄດ້ເຂົ້າຮ່ວມພິທີບໍລິຈາກເລືອດເພື່ອເປັນແບບຢ່າງໃຫ້ຊາວໜຸ່ມ ທີ່ມີຈິດໃຈອາສາ ຈົ່ງພ້ອມໃຈອອກມາບໍລິຈາກເລືອດ ເພື່ອຊ່ວຍເຫຼືອສັງຄົມດ້ວຍກັນ ພາຍໃຕ້ມາດຕະການໃນການປ້ອງກັນເຊື້ອພະຍາດໂຄວິດ-19 ແລະ ນອກຈາກນັ້ນ, ຍັງມີພະນັກງານສູນກາງຊາວໜຸ່ມ ພ້ອມດ້ວຍພະນັກງານທີ່ເຂົ້າຮ່ວມໃນພິທີໃນຄັ້ງນີ້ ຮ່ວມໃຈບໍລິຈາກເລືອດໄດ້ທັງໝົດ 23 ທ່ານ ໄດ້ເລືອດ 23 ຖົງ.