ອົງການກາແດງລາວ

CROIX ROUGE LAO

ວຽກງານຕົ້ນຕໍ່

ການ​ຊ່ວຍ​ເຫຼືອ​ບັນ​ເທົາ​ທຸກ​ເບື້ອງ​ຕົ້ນ ແມ່ນ​ ການ​ຊ່ວຍ​ເຫຼືອ​ທາງ​ດ້ານ​ວັດ​ຖຸ ແລະ ຈິດ​ໃຈ​ຂັ້ນ​ພື້ນ​ຖານ, ລວມ​ທັງ​ ການ​ໃຫ້​ຄວາມ​ຮູ້​ພື້ນ​ຖານ ເພື່ອ​ສ້າງ​ຄວາມ​ເຂັ້ມ​ແຂງ​ໃຫ້​ຊຸມ​ຊົນ ກ່ຽວ​ກັບ​ວຽກ​ງານ​ປ້ອງ​ກັນ, ຫຼຸດ​ຜ່ອນ​ຄວາມ​ສ່ຽງ ແລະ ຮັບ​ມື​ກັບ​ໄພ​ພິ​ບັດ.

ເປົ້າ​ໝາຍ​ຂອງ​ການ​ຊ່ວຍ​ເຫຼືອ​ບັນ​ເທົາ​ທຸກ​ເບື້ອງ​ຕົ້ນ ແມ່ນ ຜູ້​ທີ່​ຖືກ​ຜົນ​ກະ​ທົບ​ຈາກ​ໄພ​ພິ​ບັດ, ຜູ້​ທຸກ​ຍາກ​ຂາດ​ເຂີນ, ປ່ຽວ​ພອຍ, ດ້ອຍ​ໂອ​ກາດ, ກຳ​ພ້າ, ກຳ​ພອຍ, ຄົນ​ພິ​ການ ແລະ ຜູ້​ຢູ່​ເຂດ​ຫ່າງ​ໄກ​ສອກ​ຫຼີກ.

ການ​ປຸກ​ລະ​ດົມ​ຂົນ​ຂວາຍ​ ບໍ​ລິ​ຈາກ​ເລືອດ ແລະ ການ​ສະ​ໜອງ​ເລືອດ​ທີ່​ປອດ​ໄພ ແມ່ນ ຂະ​ບວນ​ການ ຈັດ​ຫາ​ຜູ້​ບໍ​ລິ​ຈາກ​ເລືອດ​ແບບ​ສະ​ໝັກ​ໃຈ, ຮັບ​ການ​ບໍ​ລິ​ຈາກ​ເລືອດ, ກວດ​ກາ​ວິ​ເຄາະ​ເລືອດ, ເກັບ​ຮັກ​ສາ, ຄຸ້ມ​ຄອງ​ຄຸນ​ນະ​ພາບ ແລະ ການ​ສະ​ໜອງ​ເລືອດ​ໃຫ້​ພຽງ​ພໍ, ປອດ​ໄພ ແລະ ທັນ​ເວ​ລາ.

ການ​ສົ່ງ​ເສີມ​ສຸ​ຂະ​ພາບ​ຂັ້ນ​ພື້ນ​ຖານ ແມ່ນ ການ​ເຮັດ​ໃຫ້​ປະ​ຊາ​ຊົນ​ຜູ້​ດ້ອຍ​ໂອ​ກາດ, ຊຸມ​ຊົນ, ເຂດ​ຫ່າງ​ໄກ​ສອກ​ຫຼີກ ໄດ້​ເຂົ້າ​ເຖິງນ້ຳ​ສະ​ອາດ, ສຸ​ຂາ​ພິ​ບານ, ອະ​ນາ​ໄມ, ໂພ​ສະ​ນາ​ການ, ສຸ​ຂະ​ພາບ​ແມ່ ແລະ ເດັກ ດ້ວຍ​ການ​ໂຄ​ສະ​ນາ​ສຸ​ຂະ​ສຶກ​ສາ, ການ​ຝຶກ​ອົບ​ຮົມ​ການ​ປະ​ຖົມ​ພະ​ຍາ​ບານ ຕາມ​ນະ​ໂຍ​ບາຍ​ຂອງ​ກະ​ຊວງ​ສາ​ທາ​ລະ​ນະ​ສຸກ ເພື່ອ​ເຮັດ​ໃຫ້​ປະ​ຊາ​ຊົນ​ມີ​ສຸ​ຂະ​ພາບ ແລະ ຊີວ​ິດ​ການ​ເປັນ​ຢູ່​ທີ່​ດີ.

ການ​ປະ​ຖົມ​ພະ​ຍາ​ບານ ແມ່ນ ການ​ຊ່ວຍ​ເຫຼືອ​ເບື້ອງ​ຕົ້ນ ແກ່​ຜູ້​ຖືກ​ເຄາະ​ຮ້າຍ​ທີ່​ໄດ້​ຮັບ​ບາດ​ເຈັບ ທາງ​ດ້ານ​ຮ່າງ​ກາຍ ແລະ/ຫຼື ຈິດ​ໃຈ ໂດຍ​ນຳ​ໃຊ້​ວັດ​ຖຸ​ປະ​ກອນ​ທີ່​ມີ​ຢູ່​ອ້ອມ​ຂ້າງ ຢ່າງ​ຖືກວິ​ທີ ຈົນ​ກ່​ວາ​ຈະ​ນຳ​ສົ່ງ​ເຖິງ​ສະ​ຖານ​ທີ່​ບໍ​ລິ​ການ​ດ້ານ​ການ​ແພດ.

ຜູ້​ທີ່​ຈະ​ໃຫ້​ການ​ຊ່ວຍ​ເຫຼືອ​ປະ​ຖົມ​ພະ​ຍາ​ບານ ຕ້ອງ​ໄດ້​ຮັບ​ການ​ຝຶກ​ອົບ​ຮົມ​ທາງ​ດ້ານ​ປະ​ຖົມ​ພະ​ຍາ​ບານ.

ການ​ກູ້​ໄພ​ສຸກ​ເສີນ ແມ່ນ ການ​ຊ່ວຍ​ເຫຼືອ​ຮີບ​ດ່ວນ
ເພື່ອກອບ​ກູ້​ຜູ້​ຖືກ​ເຄາະ​ຮ້າຍ ຈາກ​ໄພ​ທຳ​ມະ​ຊາດ ຫຼື ມະ​ນຸດ​ສ້າງ​ຂື້ນ ເຊັ່ນ ​ອຸບ​ປະ​ຕິ​ເຫດ​ທາງ​ທ້ອງ​ຖະ​ໜົນ,
ທາງ​ອາ​ກາດ, ທາງ​ນ້ຳ, ອຸ​ທົກ​ກະ​ໄພ, ອັກ​ຄີ​ໄພ, ວາ​ຕະ​ໄພ, ດິນ​ເຈື່ອນ, ຕຶກ​ຖະ​ຫຼົ່ມ,
ແຜ່ນ​ດິນ​ໄຫວ, ພະ​ຍາດ​ລະ​ບາດ.

ການ​ໂຄ​ສະ​ນາ​ຂົນ​ຂວາຍ​ແຫຼ່ງ​ທຶນ ແມ່ນ ການ​ເຮັດ​ໃຫ້​ສັງ​ຄົມ​ຮູ້, ເຂົ້າ​ໃຈ​ພາ​ລະ​ບົດ​ບາດ, ຄວາມ​ສຳ​ຄັນ, ຜົນ​ງານ​ການ​ເຄື່ອນ​ໄຫວ​ວຽກ​ງານ​ກາ​ແດງ​ລາວ​ໃນ​ແຕ່​ລະ​ໄລ​ຍະ​ໂດຍ​ຜ່ານ​ສື່ ແລະ ກິດ​ຈະ​ກຳ​ຕ່າງໆ ເພື່ອ​ໃຫ້​ມີ​ຄວາມ​ສະ​ໝັກ​ໃຈ​ປະ​ກອບ​ສ່ວນ​ທຶນ​ຮອນ​ເຂົ້າ​ໃນ​ວຽກ​ງານ​ກາ​ແດງ​ລາວ.

ການ​ສ້າງ​ສະ​ມາ​ຊິກ ແລະ ອາ​ສາ​ສະ​ໝັກ​ກາ​ແດງ ແມ່ນ​ການ​ປຸກ​ລະ​ດົມ​ຂົນ​ຂວາຍ, ສຶກ​ສາ​ອົບ​ຮົມ, ຝຶກ​ອົບ​ຮົມ ບຸກ​ຄົນ, ນິ​ຕິ​ບຸກ​ຄົນ ແລະ ການ​ຈັດ​ຕັ້ງ​ເຂົ້າ​ເປັນ​ສະ​ມາ​ຊິກ ແລະ ອາ​ສາ​ສະ​ໝັກ​ກາ​ແດງ ເພື່ອ​ປະ​ກອບ​ສ່ວນ​ເຂົ້າ​ໃນ​ການ​ເຄື່ອນ​ໄຫວ​ວຽກ​ງານ​ກາ​ແດງ​ລາວ.

ສຳ​ລັບ​ເງື່ອນ​ໄຂ ແລະ ມາດ​ຕະ​ຖານ ຂອງ​ສະ​ມາ​ຊິກ ແລະ ອາ​ສາ​ສະ​ໝັກ​ກາ​ແດງ ໄດ້​ກຳ​ນົດ​ໄວ້​ໃນ​ລະ​ບຽບ​ການ​ຕ່າງ​ຫາກ.

ການ​ສືບ​ທາວ​ຫາ​ຍາດ​ພີ່​ນ້ອງ ແມ່ນ ການ​ເປັນ​ສື່​ກາງ​ໃນ​ການ​ຕິດ​ຕໍ່​ພົວ​ພັນ​ຫາ ບຸກ​ຄົນ, ​ກຸ່ມ​ຄົນ ທີ່ບໍ່​ສາ​ມາດ​ຕິດ​ຕໍ່​ພົວ​ພັນ​ກັນ​ໄດ້ ເນື່ອງ​ຈາກ​ໄພ​ພິ​ບັດ, ການ​ຍົກ​ຍ້າຍ​ຖິ່ນ​ຖານ, ​ການ​ອົບ​ພະ​ຍົກ, ສົງ​ຄາມ ແລະ ອື່ນໆ ໃຫ້​ຮູ້​ຂ່າວ​ຄາວ ຫຼື ກັບ​ມາ​ຢູ່​ຮ່ວມ​ກັນ​ອີກ.

ອົງ​ການ​ກາ​ແດງ​ລາວ ພົວ​ພັນ ແລະ ຮ່ວມ​ມື​ສາ​ກົນ ກ່ຽວ​ກັບ​ວຽກ​ງານ​ກາ​ແດງ ດ້ວຍ​ການ​ອອກ​ແຮງ​ຊອກ​ຮູ້​ບົດ​ຮຽນ​ທີ່​ເປັນ​ປະ​ໂຫຍດ, ຂົນ​ຂວາຍ​ແຫຼ່ງ​ທຶນ, ວັດ​ຖຸ​ປະ​ກອນ, ເຕັກ​ນິກ ແລະ ການ​ພັດ​ທະ​ນາ​ບຸກ​ຄະ​ລະ​ກອນ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ຂອງ​ຕົນ ໃຫ້​ມີ​ປະ​ສິດ​ທິ​ພາບ ລວ​ມ​ທັງ​ການ​ປະ​ຕິ​ບັດ​ພັນ​ທະ​ຂອງ​ຕົນ​ຕໍ່​ສາ​ກົນ.

ອົງ​ການ​ຈັດ​ຕັ້ງ​ສາ​ກົນ, ອົງ​ການ​ກາ​ແດງ​ຂອງ​ຕ່າງ​ປະ​ເທດ ແລະ ຄົນ​ຕ່າງ​ປະ​ເທດ ຈະ​ສາ​ມາດ​ເຄື່ອນ​ໄຫວ​ວຽກ​ງານ​ກາ​ແດງ ຢູ່ ສ​ປ​ປ ລາວ ໄດ້​ກໍ​ຕໍ່​ເມື່ອ​ໄດ້​ຮັບ​ອະ​ນຸ​ຍາດ​ຈາກ​ລັດ​ຖະ​ບານ​ຂອງ ສ​ປ​ປ ລາວ ແລະ ຕ້ອງ​ປະ​ຕິ​ບັດ​ຕາມ​ກົດ​ໝາຍ ແລະ ຮີດ​ຄອງ​ປະ​ເພ​ນີ​ຂອງ​ ສ​ປ​ປ ລາວ.

ລັດ​ຖະ​ບານ ແຫ່ງ ສ​ປ​ປ ລາວ ສະ​ໜັບ​ສະ​ໜູນ ແລະ ອຳ​ນວຍ​ຄວາມ​ສະ​ດວກ​ໃຫ້​ອົງ​ການ​ກາ​ແດງ​ລາວ ເຂົ້າ​ຮ່ວມ​ການ​ຊ່ວຍ​ເຫຼືອ​ກູ້​ໄພ ໃນ​ລະ​ດັບ​ພາກ​ພື້ນ ແລະ ສາ​ກົນ ບົນ​ພື້ນ​ຖານ​ຂະ​ບວນ​ການ​ກາ​ແດງ ແລະ ຊີກວົງ​ເດືອນ​ແດງສາ​ກົນ, ກົດ​ໝາຍ ແລະ ຮີດ​ຄອງ​ປະ​ເພ​ນີ​ຂອງ​ປະ​ເທດ​ທີ່​ກ່ຽວ​ຂ້ອງ.