ອົງການກາແດງລາວ

CROIX ROUGE LAO

ສະຖານທູດການາດາ ປະຈຳ ສປປ ລາວໄດ້ໃຫ້ການຊ່ວຍເຫລືອຕ້ານການແຜ່ລະບາດພະຍາດໂຄວິດ

ໃນວັນທີ 15 ທັນວາ 2021 ນີ້, ຢູ່ທີ່ສູນເລືອດແຫ່ງຊາດອົງການກາແດງລາວ ໄດ້ພິທີລົງນາມເຊັນບົດບັນທຶກຄວາມເຂົ້າໃຈ ລະຫວ່າງອົງການກາແດງລາວ ແລະ ຫ້ອງການສະຖານທູດການາດາ ປະຈຳ ສປປ ລາວ , ເພື່ອໃຫ້ການສະຫນັບສະຫນູນທຶນຊ່ວຍເຫລືອຕ້ານກັບການແຜ່ລະບາດພະຍາດໂຄວິດ-19, ໂດຍການເປັນກຽດເຂົ້າຮ່ວມຂອງທ່ານ ຮສ.ດຣ. ພູທອນ ເມືອງປາກ ປະທານອົງການກາແດງລາວ, ທ່ານ ບ໋ອບ ປາແຄັນ (Bob Paquin) ອຸປະທູດ ແລະ ຫົວໜ້າຫ້ອງການສະຖານທູດການາດາ ປະຈຳ ສປປ ລາວ, ມີຜູ້ຕາງໜ້າຈາກກະຊວງການຕ່າງປະເທດ ແລະ ພະແນກການທີ່ກ່ຽວຂ້ອງເຂົ້າຮ່ວມ, ການຊ່ວຍເຫລືອຈາກສະຖານທູດການາດາ ແມ່ນແນໃສ່ ເພື່ອໃຫ້ການສະໜັບສະໜູນ ອົງການກາແດງລາວ ໃນການຊ່ວຍເຫຼືອ ເພື່ອຕ້ານແລະສະກັດກັ້ນການແຜ່ລະບາດພະຍາດໂຄວິດ-19 ໂດຍສະເພາະແມ່ນຜູ້ແຍກປ່ຽວ ຢູ່ສູນຈຳກັດບໍລິເວນ ແລະ ໂຮງໝໍສະໝາມໃນການປິ່ນປົວພະຍາດໂຄວິດ-19 ໃນນະຄອນຫຼວງວຽງຈັນ ທີ່ອົງການກາແດງລາວໄດ້ໃຫ້ການຊ່ວຍເຫຼືອຢູ່ໃນປັດຈຸບັນ, ໂດຍສຸມໃສ່ ການໂຄສະນາປ້ອງກັນການລະບາດຂອງພະຍາດໂຄວິດ-19, ການສະໜອງອາຫານ, ນ້ຳດື່ມ ແລະ ເຄື່ອງສຸຂະອະນາໄມ.ໂຄງການດັ່ງກ່າວ ຈະໄດ້ຈັດຕັ້ງປະຕິບັດນັບແຕ່ກອງປະຊຸມເຊັນບົດບັນທຶກຮ່ວມມືເປັນຕົ້ນໄປ ແລະ ໂຄງການຈະສິ້ນສຸດໃນວັນທີ 30 ເມສາ 2022. ໂດຍແມ່ນສະຖານທູດການາດາປະຈຳບາງກອກເປັນຜູ້ໃຫ້ທຶນຊ່ວຍເຫຼືອ ໃນມູນຄ່າ 27,000 CAD (ຊາວເຈັດພັນ ໂດລາການາດາ).
ໃນໂອກາດດຽວກັນນີ້, ທ່ານ ບ໋ອບ ປາແຄັນ (Bob Paquin) ອຸປະທູດ ແລະ ຫົວໜ້າຫ້ອງການສະຖານທູດການາດາ ປະຈຳ ສປປ ລາວ ກໍ່ໄດ້ກ່າວວ່າ: ການລະບາດຂອງພະຍາດໂຄວິດ-19 ໃນຄັ້ງນີ້ ໄດ້ສະແດງໃຫ້ເຫັນເຖິງ ຄວາມຈຳເປັນ ທີ່ປະຊາຄົມໂລກຈະຕ້ອງ ເພິ່ມທະວີ ແລະ ຈັດຕັ້ງປະຕິບັດ ຄຳໝັ້ນສັນຍາຮ່ວມກັນ ເພື່ອສ້າງຄວາມເຂັ້ມແຂງໃຫ້ແກ່ ລະບົບສາທາລະນະສຸກ, ແລະ ເພິ່ມທະວີຄວາມອາດສາມາດ ດ້ານການປ້ອງກັນ, ກວດຫາເຊື້ອ, ການວາງແຜນສຸກເສີນ ແລະ ການກະກຽມຄວາມພ້ອມໃນທົ່ວໂລກ, ນັບຕັ້ງແຕ່ເດືອນກຸມພາ 2020 ເປັນຕົ້ນມາ, ປະເທດການາດາ ໄດ້ປະກອບສ່ວນການຊ່ວຍເຫຼືອສາກົນ ຈຳນວນ 2.5 ຕື້ ໂດລາສະຫາລັດ ເຂົ້າໃນການຕອບໂຕ້ພະຍາດໂຄວິດ-19. ຊຶ່ງໃນນີ້ ລວມເຖິງການສະໜັບສະໜູນ ແຜນງານການເຂົ້າເຖິງເຄື່ອງມືໂຄວິດ-19 ACT (COVID-19 Tools Accelerator), ພ້ອມທັງ ການຊ່ວຍເຫຼືອໂດຍກົງ ດ້ານວຽກງານມະນຸດສະທຳ ແລະ ການພັດທະນາ ເພື່ອຕອບສະໜອງຕໍ່ຄວາມຕ້ອງການອັນຮີບດ່ວນ ທີ່ເກີດຈາກບັນຫາການລະບາດຂອງພະຍາດດັ່ງກ່າວ, ໃນນີ້, ຍັງລວມເຖິງ ການສະໜັບສະໜູນວັກຊີນກັນພະຍາດ ຊຶ່ງໄດ້ນຳສົ່ງໃຫ້ ສປປ ລາວ ແລ້ວ, ພາຍໃຕ້ໂຄງການ Covax Facility. ບົດບັນທຶກການຮ່ວມມືໃນຄັ້ງນີ້ໄດ້ຮັບການລົງນາມໂດຍ ທ່ານ ບ໋ອບ ປາແຄັນ (Bob Paquin) ອຸປະທູດ ແລະ ຫົວໜ້າຫ້ອງການສະຖານທູດການາດາ ປະຈຳ ສປປ ລາວ ແລະ ທ່ານ ຮສ.ດຣ ສິງ ເມໂນລາດ ຮອງປະທານອົງການກາແດງລາວ.ນອກຈາກນີ້ຍັງມີຄະນະນຳ ພ້ອມດ້ວຍຄະນະ ແລະ ພະນັກງານທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພະຍານ.