ອົງການກາແດງລາວ

CROIX ROUGE LAO

ສະຖາບັນການທະນາຄານ ບໍລິຈາກເລືອດ

ສະ​ຖາ​ບັນ​ການ​ທະ​ນາ​ຄານ ​(ສ​ທ​ຄ) ໄດ້ຈັດຕັ້ງການບໍລິຈາກເລືອດ​ຈາກບັນ​ດາ​ຜູ້​ບໍ​ລິ​ຫານ, ພະ​ນັກ​ງານ, ອາ​ຈານ ແລະ ນັກ​ສຶກ​ສາໃຫ້ແກ່ສູນເລືອດແຫ່ງຊາດ ​ຂອງອົງການກາແດງລາວໃນວັນທີ 24 ມິຖຸນາ 2020 ທີ່ສະ​ໂມ​ສອນ ສ​ທ​ຄ ໂດຍການນໍາພາ​ຂອງທ່ານ ສັນ​ຕິ ພົນ​ເມືອງ​ລາວ ເລ​ຂາ​ຄະ​ນະ​ພັກ​ຮາກ​ຖານ-ຫົວ​ໜ້າ ສ​ທ​ຄ ໂດຍ​ການ​ສະ​ໜັບ​ສະ​ໜູນ​ຂອງ​ທະ​ນາ​ຄານ ​ໄຊ​ງ່ອນ​ເທືອງ​ຕິ່ນ ລາວ ຈຳ​ກັດ ໂດຍ​ແມ່ນ​ນາງ ອຸ​ໄລ​ພອນ ໂສ​ເງິນ ຮອງ​ຜູ້​ອຳ​ນວຍ​ການ​ທະ​ນາ​ຄານ​ດັ່ງ​ກ່າວ ແລະ ມີທ່ານ ດຣ. ຈັນທະລາ ສຸກສາຄອນ ຫົວ ໜ້າສູນເລືອດແຫ່ງຊາດ ພ້ອມດ້ວຍຄະນະແພດ ແລະ ອາ​ຈານ-ນັກ​ສຶກ​ສາ ເຂົ້າຮ່ວມ ທັງນີ້ກໍ່ເພື່ອເປັນການສ້າງຜົນງານຂໍ່ານັບຮັບຕ້ອນ ກອງປະຊຸມໃຫຍ່ຜູ້ແທນ ຄັ້ງທີ IV ຂອງອົງຄະນະພັກ ທຫລ ແລະ ກອງປະຊຸມໃຫຍ່ສະ​ມາ​ຊິກ​ພັກ​ຮາກ​ຖານ ຄັ້ງທີ IV ຂອງ ສ​ທ​ຄ ທີ່ຈະ ເປີດຂຶ້ນໃນມໍ່ໆນີ້.

ການບໍລິຈາກເລືອດຄັ້ງນີ້ ກໍ່ຢູ່ໃນທ່າມກາງທີ່ທົ່ວທັງໂລກ ພວມຢູ່ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ແລະ ຢູ່ໃນໄລຍະທີ່ ສປປ ລາວ ປອດເຊື້ອພະຍາດດັ່ງກ່າວ ທັງເປັນວັນຜູ້ບໍລິຈາກເລືອດໂລກ (ວັນທີ 14 ມິຖຸນາ) “World Blood Dono Day” ຊຶ່ງມີຄະນະນໍາ, ພະ​ນັກ​ງານ ແລະ ນັກ​ສຶກ​ສາເຂົ້າກວດເລືອດ 120 ຄົນ ຊຶ່ງ ມີຜູ້ທີ່ສາມາດບໍລິຈາກເລືອດຕົວຈິງທັງ ໝົດ  100 ຄົນ ຊຶ່ງເປັນການບໍລິຈາກທີ່ບໍລິສຸດ, ບໍ່ຫວັງຜົນຕອບແທນ ທັງເປັນການບໍລິຈາກເລືອດ ແລະ ຜະລິດຕະພັນເລືອດທີ່ປອດໄພ ເພື່ອເປັນການຊ່ວຍຊີ ວິດຂອງຄົນເຈັບໃຫ້ປອດໄພ ແລະ ເປັນການປູກຈິດສໍານຶກໃຫ້ສັງຄົມ ມີການປະກອບສ່ວນໃນການບໍລິຈາກ ເລືອດ ຫຼາຍຂຶ້ນ ເຮັດໃຫ້ສັງຄົມ ມີຄວາມສະຫງົບ ເປັນສັງຄົມທີ່ມີຈິດໃຈເອື້ອເຟື້ອເພື່ອແຜ່ ມີຄວາມສາມັກຄີ ແລະ ມີສຸຂະພາບທີ່ດີ.

ໃນໂອກາດດັ່ງກ່າວ; ທ່ານ ສະ​ຫວັນ​ຈິດ ແສງ​ເດືອນ ​ຮອງ​ຫົວ​ໜ້າ ສ​ທ​ຄ ໄດ້​ສະ​ແດງ​ຄວາມ​ຮູ້​ສຶກ​ຂອງ​ຕົນ​ອອກ​ມາວ່າ: ການບໍລິຈາກເລືອດຄັ້ງນີ້ ເປັນ​ເທື່ອ​ທີ 18 ແລະ ​ກໍ່​ມີ​ຄວາມ​ພາກ​ພູມ​ໃຈ ແລະ ຍິນ​ດີ​ທີ່​ໄດ້​ໃຫ້​ເລືອດ ຄື​ໃຫ້​ຊີ​ວິດ ແລະ ໃຫ້​ອະ​ນາ​ຄົດ​ແກ່​ເພື່ອນ​ມະ​ນຸດ​ດ້ວຍ​ກັນ, ການບໍລິຈາກເລືອດ ເປັນ​ສິ່ງ​ທີ່​ດີ-ປອດ​ໄພ ແລະ ຄື​ການ​ໃຫ້​ທີ່​ແທ້​ຈິງ ເພາະເປັນການຊ່ວຍເຫຼືອເພື່ອນມະນຸດດ້ວຍ ກັນ ເນື່ອງຈາກປະຈຸບັນມີຄົນຈໍານວນບໍ່ໜ້ອຍທີ່ເຈັບປ່ວຍພວມລໍຖ້າຄວາມຊ່ວຍເຫຼືອຈາກພວກເຮົາ, ຖ້າບໍ່ມີໃຜສົນໃຈຕໍ່ວຽກງານນີ້ ບຸກ ຄົນເຫຼົ່ານັ້ນຍັງລໍຄອຍຂໍຄວາມຊ່ວຍເຫຼືອກໍ່ຈະບໍ່ມີຊີວິດຢູ່ຕໍ່ໄປໄດ້ ເພາະການໃຫ້ເລືອດຄືການໃຫ້ຊີວິດ ແລະ ພວກເຮົາໄດ້ພ້ອມກັນຈັດຕັ້ງ ປະຕິບັດໃນການບໍລິຈາກເລືອດມາເປັນເວ ລາຫຼາຍປີ ກາຍເປັນປະເພນີຂອງ ສ​ທ​ຄ ພວກເຮົາ.

ທ່ານ ດຣ. ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດ ໄດ້​ແຈ້ງ​ໃຫ້​ຮູ້​ວ່າ: ການບໍລິຈາກເລືອດ ເປັນ​ສິ່ງ​ທີ່​ຈຳ​ເປ​ັນ ເພືຶ່ອ​ເອົາ​ໄປ​ນຳ​ໃຊ້​ແກ່​ຄົນ​ເຈັບ​ທີ່​ມີ​ຄວາມ​ຕ້ອງ​ການ​ອັນ​ຮີບ​ດ່ວນ​ໃນ​ແຕ່​ລະ​ວັນ ໂດຍ​ສະ​ເພາະ​ປະ​ຈຸ​ບັນ​​ການ​ແຜ່​ລະ​ບາດ​ຂອງ​ພະ​ຍາດ​ໄຂ້​ຍູງ​ລາຍ​ໃນ​ບໍ​ລິ​ເວນ​ກ້​ວາງ ກໍ່​ຍິ່ງ​ມີ​ຄວາມ​ຕ້ອງ​ການ​ເລື​ອດຫຼາຍ​ຂຶ້ນ ຊຶ່ງ​ເງື່ອນ​ໄຂ​ຜູ້​ບໍ​ລິ​ຈາກ​ເລືອດ​ແມ່ນ​ອາ​ຍຸ 17 ປີ​ຂຶ້ນ​ໄປ​ທີ່​ມີ​ນ້ຳ​ໜັກ 45 ກິ​ໂລ​ຂຶ້ນ​ເມືອ, ມີ​ສຸ​ຂະ​ພາບ​ແຂງ​ແຮງ ສາ​ມາດ​ບໍ​ລິ​ຈາກ​ເລືອດ​ໄດ້ ແລະ ໃນ​ຜ່ານ​ມາ ສ​ທ​ຄ ​ໄດ້​ບໍ​ລິ​ຈາກ​ເລືອດ​ໃນ​ປີ 2017 ໄດ້ 161 ເທື່ອ​ຄົນ, 2018 ໄດ້ 254 ເທື່​ອ​ຄົນ, ປີ 2019 ໄດ້ 278 ຄົນ ແລະ ໃນວັນທີ 24 ມິຖຸນາ ​2020 ​ໄດ້​ມີ​ຜູ້​ເຂົ້າ​ຮ່ວມກວດ​ເລືອດ​ທັງ​ໝົດ 120 ເທື່ອ​ຄົນ ແລະ ສາ​ມາດກວດ​ຜ່ານ 100 ຄົນ ຊຶ່ງ​ເປັນ​ສະ​ຖາ​ບັນ​ການ​ສຶກ​ສາ​ທີ່​ດີ​ເດັ່ນ​ໃນ​ການ​ປະ​ກອບ​ສ່ວນບໍລິຈາກເລືອດ ​ກາຍ​ເປັນ​ຕົວ​ແບບ​ໃຫ້​ແກ່​ສະ​ຖາ​ບັນ​ອື່ນໆ; ສ​ທ​ຄ ໄດ້​ຮັບຫຼຽນ​ກາ​ແຮງ​ງານ​ຈາກ​ຂັ້ນ​ເທິງ 2 ຫຼຽນ ແລະ “ບໍລິຈາກເລືອດ​ຊ່ວຍ​ຊີ​ວິດ” – “ເລືອດ​ປອດ​ໄພ ຊ່ວຍ​ຊີ​ວິດ​ຄົນ​ເຈັບ​ປອດ​ໄພ”

ຂ່າວ-ພາບ: ຣັດສະໝີ ດວງສັດຈະ