ອົງການກາແດງລາວ

CROIX ROUGE LAO

ສະຫະພັນກາແດງ ແລະ ຊີກວົງເດືອນແດງສາກົນ ຊ່ວຍເຫລືອໃຫ້ແກ່ອົງການກາແດງລາວ

ໃນຕອນແລງຂອງວັນທີ 17 ທັນວາ 2021 ທີ່ອົງການກາແດງລາວ ໄດ້ມີພິທີມອບ-ຮັບ ລົດບັນທຸກ ຈາກການຊ່ວຍເຫລືອຈາກສະຫະພັນກາແດງແລະຊີກວົງເດືອນແດງສາກົນຂື້ນ, ໂດຍການເຂົ້າຮ່ວມຂອງທ່ານ ຮສ.ດຣ ພູທອນ ເມືອງປາກ ປະທານອົງການກາແດງລາວ, ພ້ອມດ້ວຍຫົວໜ້າກອງ, ຫົວໜ້າພະແນກ ພ້ອມດ້ວຍ ພະນັກງານເຂົ້າຮ່ວມ. ກ່າວມອບໂດຍທ່ານ ນາງ ແຄັດທຣີນ ຄລາຄ໌ສັນ ຫົວໜ້າຄະນະຜູ້ແທນກຸ່ມບັນດາປະເທດລຸ່ມແມ່ນໍ້າຂອງ ປະເທດໄທ, ກໍາປູເຈຍ, ລາວ ແລະ ຫວຽດນາມ ປະຈຳຫ້ອງການສະຫະພັນກາແດງ ແລະ ຊີກວົງເດືອນແດງ ປະຈຳບາງກອກ( Kathryn ClarksonHead of Delegation, Country Cluster for Thailand, Cambodia, Laos, and Viet Nam ), ກ່າວຮັບໂດຍທ່ານ ທ່ານ ຮສ.ດຣ ພູທອນ ເມືອງປາກ ປະທານອົງການກາແດງລາວ, ຈຸດປະສົງ ເພື່ອໃຫ້ແກ່ອົງການກາແດງລາວໃນໂຄງການ ກະກຽມຄວາມພ້ອມ ແລະ ຕອບໂຕ້ໃນພາວະສຸກເສີນ ຈາກສະຫະພັນກາແດງ ແລະ ຊີກວົງເດືອນແດງສາກົນ, ເພື່ອນຳໃຊ້ເຂົ້າໃນວຽກງານຂົນສົ່ງພາລາທິການ ຂອງອົງການກາແດງລາວ ໃຫ້ມີຄວາມກຽມພ້ອມຮັບມື ແລະ ຂົນສົ່ງເຄື່ອງຊ່ວຍເຫຼືອບັນເທົາທຸກໄປຮອດມືຂອງປະຊາຊົນທັນການ ແລະ ວ່ອງໄວ.ລົດຄັນດັງກ່າວ; ແມ່ນປະເພດລົດບັນທຸກຂະໜາດ 06 ລໍ້, ຍີ່ຫໍ້ ອີຊຸຊຸ(IZUZU) ລຸ້ນ NPRK 71 K, ແຮງຈັກ 4.750cc, 121 ແຮງມ້າ, ສາມາດບັນຈຸໄດ້ 4.3 ໂຕນ, ລວມມູນຄ່າ 39,000 ໂດຣາ.
ໃນໂອກາດດັ່ງກ່າວ, ທ່ານ ນາງ. ແຄັດທຣີນ ຄລາຄ໌ສັນ ຫົວໜ້າຄະນະຜູ້ແທນກຸ່ມບັນດາປະເທດລຸ່ມແມ່ນໍ້າຂອງ ປະເທດໄທ, ຫົວຫນ້າຫ້ອງການສະຫະພັນກາແດງ ແລະ ຊີກວົງເດືອນແດງ ປະຈຳບາງກອກ ໄດ້ກ່າວສະແດງຄວາມດີອົກດີໃຈທີ່ໄດ້ໃຫ້ການຊ່ວຍເຫຼືອໃນຄັ້ງນີ້ເຊີ່ງເປັນການສືບເນື່ອງຈາການປຶກສາຫາລືກັນທີ່ກອງປະຊຸມທາງໄກແລະຂ້າພະເຈົ້າເຊື່ອວ່າການມອບລົດໃນຄັ້ງນີ້ ແມ່ນເປັນການເພີ່ມຄວາມພ້ອມໃນການຕອບໂຕ້ຢ່າງມີປະສິດທິພາບ , ພ້ອມດຽວກັນນັ້ນ, ຍັງໄດ້ຈັດຊື້ເຄື່ອງໃຊ້ຄົວເຮືອນ ຈໍານວນ 764 ຊຸດ, ເຄື່ອງສຸຂະອະນາໄມ 860 ຊຸດ, ສ້ອມແປງສາງກາແດງ ພາກໃຕ້ຢູ່ແຂວງຈໍາປາສັກ, ລວມມູນຄ່າ ມູນຄ່າ 671,750,650 ກີບ ( 61,700 CHF). ນອກນັ້ນ, ຍັງມີການເສີມສ້າງຄວາມສາມາດໃຫ້ກັບບຸກຄະລາກອນ ເຊັ່ນ: ສ້າງທີມງານຕອບໂຕ້ໄພພິບັດໃນພາວະສຸກເສີນ ໃນລະດັບສູນກາງ ແລະ ແຂວງ; ການສະໜັບສະໜູນ ໃນການຮັບມື ແລະ ຕອບໂຕ້, ໄພພິບັດແມ່ນ ດຳເນີນງານຫຼັກໃນດ້ານວຽກງານມະນຸດສະທຳທີ່ເຂັ້ມແຂງຂຶ້ນໃນ ສປປ ລາວ.
ທ່ານ ຮສ.ດຣ ພູທອນ ເມືອງປາກ ປະທານອົງການກາແດງລາວ ກໍ່ໄດ້ກ່າວສະແດງຄວາມຮູ້ບຸນຄຸນຢ່າງສູງສະຫະພັນກາແດງ ແລະ ຊີກວົງເດືອນແດງ ທີ່ໄດ້ປະກອບສ່ວນໃນການຊ່ວຍເຫຼືອພາຫະນະ ໃຫ້ແກ່ອົງການກາແດງລາວໃນຄັ້ງນີ້, ທ່ານຍັງໄດ້ໃຫ້ຮູ້ຕື່ມອີກວ່າ: ໃນໄລຍະຜ່ານມາທາງອົງການກາແດງລາວແມ່ນຂາດເຂີນລົດປະເພດບັນທຸກ ເພາະວ່າລົດບັນທຸກທີ່ມີຢູ່ໃນອົງການກາແດງລາວ ແມ່ນມີລັກສະນະເກົ່າບໍ່ຮັບປະກັນຄວາມປອດໄພ, ສາມາດນຳໃຊ້ຂົນສົ່ງໄດ້ພຽງແຕ່ຄັນດຽວ ຈຶ່ງບໍ່ສາມາດຕອບສະໜອງກັບຄວາມຕ້ອງການ ໃນການຂົນສົ່ງ ເຄື່ອງຊ່ວຍເຫຼືອບັນເທົາທຸກລົງສູ່ທ້ອງຖິ່ນໃຫ້ທັນກັບສະພາບການ, ສຳລັບພາຫະທີ່ໄດ້ເພີ່ມຕື່ມອີກ 1 ຄັນນີ້, ແມ່ນມີຄຸນຄ່າຢ່າງຍິ່ງຕໍ່ອົງການກາແດງລາວ ເພາະວ່າຈະໄດ້ນຳໃຊ້ເຂົ້າໃນວຽກກງານຂົນສົ່ງພາລາທິການຂອງອົງການກາແດງລາວ ໃຫ້ມີຄວາມວ່ອງໄວ, ທັນເຫດການຂຶ້ນກວ່າເກົ່າ ໃນເວລາເກີດເຫດການສຸກເສີນ.