ອົງການກາແດງລາວ

CROIX ROUGE LAO

ສະຫະພັນແມ່ຍິງອົງການກາແດງແຫ່ງຊາດລາວສະເຫຼີມສະຫຼອງວັນແມ່ຍິງສາກົນ

ໃນວັນທີ 11 ມີນາ 2022 ນີ້ສະຫະພັນແມ່ຍິງອົງການກາແດງແຫ່ງຊາດລາວໄດ້ຈັດພິທີສະເຫຼີມສະຫຼອງວັນແມ່ຍິງສາກົນ 08/03/1910-08/03/2022 ຄົບຮອບ 112 ປີ, ພ້ອມທັງສະຫຼຸບວຽກງານປະຈຳປີ 2021ໂດຍການເປັນປະທານຂອງທ່ານຮສ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ນາງ ຈີລະພາ ແກ້ວຄຳຜຸຍ ປະທານສະຫະພັນແມ່ຍິງອົງການກາແດງແຫ່ງຊາດລາວ, ມີທ່ານຫົວໜ້າ,ຮອງຫົວໜ້າຫ້ອງການ, ຫົວໜ້າ,ຮອງຫົວໜ້າສະຖາບັນ ຕະຫຼອດຮອດບັນດາທ່ານແຂກຖືກເຊີນຈາກ3ອົງການຈັດຕັ້ງມະຫາຊົນ ຂອງອົງການກາແດງແຫ່ງຊາດລາວ ແລະ ສະມາຊິກສະຫະພັນແມ່ຍິງອົງການກາແດງແຫ່ງຊາດລາວເຂົ້າຮ່ວມ
ໃນພິທີທ່ານ ນາງ ຈີລະພາ ແກ້ວຄຳຜຸຍ ໄດ້ຂຶ້ນຫວນຄືນປະຫວັດຄວາມເປັນມາແລະ ຄວາມໝາຍຄວາມສຳຄັນຂອງວັນສ້າງຕັ້ງແມ່ຍິງສາກົນ ແລະ ໄດ້ຜ່ານບົດສະຫຼຸບການເຄື່ອນໄຫວວຽກງານປະຈຳປີ 2021 ເຊິ່ງສະຫະພັນແມ່ຍິງອົງການກາແດງແຫ່ງຊາດລາວປະກອບມີສະມາຊິກທັງໝົດ 59 ສະຫາຍ ປະກອບມີ 4 ໜ່ວຍຂຶ້ນກັບ; ຕະຫຼອດໄລຍະໜຶ່ງປີຜ່ານມາສະຫະພັນແມ່ຍິງອົງການກາແດງແຫ່ງຊາດລາວ ໄດ້ເອົາໃຈໃສ່ນຳພາແນວຄິດການເມືອງ,ສຶກສາອົບຮົມສະມາຊິກຂອງຕົນໃຫ້ມີແນວຄິດອຸ່ນອຽນທຸ່ນທ່ຽງ, ມີຄວາມເຊື້ອໝັ້ນຕໍ່ແນວທາງນະໂຍບາຍ ແລະ ການນຳພາຂອງພັກ-ລັດ, ເອົາໃຈໃສ່ປະຕິບັດໜ້າທີ່ການເມືອງ, ປະຕິບັດວຽກງານວິຊາສະເພາະໃຫ້ສຳເລັດຜົນ, ປະກອບສ່ວນໃນວຽກງານບັນເທົາທຸກ, ປຸກລະດົມຂົນຂວາຍບໍລິຈາກເລືອດ-ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາຂົນຂວາຍແຫຼ່ງທຶນ, ການສ້າງສະມາຊິກ ແລະອາສະໝັກກາແດງ, ການສືບທາວຫາຍາດພີ່ນ້ອງ ແລະ ການພົວພັນຮ່ວມມືສາກົນ ຕະຫຼອດໄລຍະຜ່ານມາຍັງໄດ້ເອົາໃຈໃສ່ໃນການສຶກສາອົບຮົມການເມືອງແນວຄິດ, ວຽກງານປັບປຸງການຈັດຕັ້ງ,ວຽກງານກໍ່ສ້າງພະນັກງານ,ວຽກງານນະໂຍບາຍ,ວຽກງານປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ, ວຽກງານພັດທະນາຊີວິດການເປັນຢູ່ຂອງແມ່ຍິງແລະ ຄອບຄົວເພື່ອແກ້ໄຂຄວາມທຸກຍາກ,ປະຕິບັດຂໍ້ແຂ່ງຂັນ3ດີ,ການປຸກລະດົມແມ່ຍິງເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ,ການພົວພັນຮ່ວມມືສາກົນ,ວຽກງານກວດກາ ແລະອື່ນໆ ຄຽງຄູ່ກັນນັ້ນຍັງມີບາງດ້ານທີ່ຍັງຈະຕ້ອງໄດ້ເອົາໃຈໃສ່ເປັນຕົ້ນແມ່ນ ຄະນະ ແລະ ສາມະຊິກສະຫະພັນແມ່ຍິງ ຕ້ອງໄດ້ພ້ອມກັນລົງເລິກດ້ານວິຊາການຫຼາຍຂຶ້ນຈື່ງເຮັດໃຫ້ການເຄື່ອນວຽກງານແມ່ຍິງພົ້ນເດັ່ນ,ຕ້ອງມີຄວາມຕື່ນຕົວຂອງສະມາຊິກເອື້ອຍນ້ອງຍິງໃນການຝຶກຝົນຫຼໍ່ຫຼອມຕົນເອງໃຫ້ດີຂຶ້ນ ແລະ ໃນຕໍ່ໜ້າຕ້ອງເພີ່ມທະວີວຽກງານສືກສາອົບຮົມການເມືອງ-ແນວຄິດໃຫ້ສະມາຊິກແມ່ຍິງ, ສູ້ຊົນໃຫ້ພະນັກງານ ເພດຍິງເຂົ້າໃນຄະນະຊີ້ນຳ, ສະມາຊິກພັກໃຫ້ຫຼາຍຂື້ນ.
ພ້ອມນັ້ນ, ໃນກອງປະຊຸມກໍໄດ້ພ້ອມກັນວາງທິດທາງແຜນການໃນປີ 2022 ເປັນຕົ້ນແມ່ນສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກສະຫະພັນແມ່ຍິງອົງການກາແດງແຫ່ງຊາດລາວ; ສືບຕໍ່ວຽກງານພັດທະນາຊີວິດການເປັນຢູ່ຂອງແມ່ຍິງ ແລະ ຄອບຄົວໂດຍເອົາໃຈໃສ່ສຶກສາອົບຮົມແນວຄິດໃຫ້ສະມາຊິກແມ່ຍິງ ປະຢັດມັດທະຍັດໃນການໃຊ້ຈ່າຍໃນຊີວິດປະຈຳວັນ ແລະ ຊູກຍູ້ໃຫ້ທຸກຄົນຫາລາຍໄດ້ເພີ່ມແບບຊອບທຳ; ສືບຕໍ່ວຽກງານປຸກລະດົມແມ່ຍິງເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໃຫ້ເອື້ອຍນ້ອງຍິງເປັນເຈົ້າການໃນການເປັນແບບຢ່າງໃນການປະກອບສ່ວນເວນຍາມ, ຮັກສາຄວາມສະຫງົບ, ຄວາມສະອາດຂອງສັງຄົມ; ສືບຕໍ່ພົວພັນຮ່ວມມືກັບຕ່າງປະເທດເພື່ອຂົນຂວາຍທຶນຮອນ ແລະ ເຄື່ອນໄຫວວຽກງານອື່ນໆ ກັບຕ່າງປະເທດໃຫ້ຫຼາຍຂື້ນ; ສືບຕໍ່ການຫາລາຍໄດ້ເຂົ້າຄັງເງິນຂອງສະຫະພັນແມ່ຍິງອົງການກາແດງແຫ່ງຊາດລາວ; ຊຸກຍູ້ສະມາຊິກແມ່ຍິງປະກອບສ່ວນຢ່າງຕັ້ງຫນ້າເຂົ້າໃນວຽກວິຊາສະເພາະຂອງຕົນ; ປະເມີນ ແລະ ສະຫລຸບ ການແຂ່ງຂັນຄຳຂວັນ 3 ດີ; ສະເຫລີມສະຫລອງວັນແມ່ຍິງສາກົນ ແລະ ເຜີຍແຜ່ມະຕິກອງປະຊຸມຜູ້ແທນແມ່ຍິງລາວ ປະຈຳປີ 2022; ສະເຫລີມສະຫລອງວັນສ້າງຕັ້ງອົງການຈັດຕັ້ງແມ່ຍິງລາວ ວັນທີ 20 ກໍລະກົດ; ເຄື່ອນໄຫວອື່ນໆ ຕາມແຈ້ງການຂອງສູນກາງສະຫະພັນແມ່ຍິງລາວ ແລະ ຂອງອົງການກາແດງແຫ່ງຊາດລາວ. ແລະ ໄດ້ພ້ອມກັນຈັບມືເພື່ອປະຕິບັດຂໍ້ແຂ່ງຂັນ 3 ດີຢ່າງເປັນຂະບວນຟົດຟື້ນ.ຈາກນັ້ນຄະນະຜູ້ແທນ ແລະແຂກຖືກເຊີນຍັງໄດ້ຮ່ວມຊົມ ແລະ ຊື້ສິງຂອງທີ່ທາງສະຫະພັນແມ່ຍິງວາງສະແດງ ແລະ ຂາຍເພື່ອລະດົມທຶນ.