ອົງການກາແດງລາວ

CROIX ROUGE LAO

ສະຫາຍປອຄຳແພງໄຊສົມແພງຢ້ຽມຢາມພົບປະໂອ້ລົມອ້າຍນ້ອງພະນັກງານກາແດງລາວ

 

ໃນຕອນເຊົ້າວັນທີ 6 ສິງຫາ 2019 ນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ກຽດເຂົ້າພົບປະໂອ້ລົມອ້າຍນ້ອງພະນັກງານອົງການກາແດງລາວ ໂດຍການຕ້ອນຮັບຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ທ່ານ ຮອງປະທານ, ຫົວໜ້າກອງ, ຮອງກອງ ແລະ ຫົວໜ້າພະແນກ, ຮອງພະແນກ ເຂົ້າຮ່ວມຢ່າງຫຼວງຫຼາຍ.


ໃນໂອກາດດັ່ງກ່າວທ່ານ ຮສຈ. ດຣ. ສິງ ເມໂນລາດ ຮອງປະທານອົງການກາແດງລາວໄດ້ຂຶ້ນລາຍງານການຈັດຕັ້ງປະຕິບັດແຜນການ 6 ເດືອນ ຕົ້ນປີ 2019 ແລະ ທິດທາງແຜນການ 6 ເດືອນ ທ້າຍປີ 2019 ນີ້ ໂຄງປະກອບການຈັດຕັ້ງອົງການກາແດງລາວ 5 ສະຫາຍ, ຄະນະພັກຮາກຖານປະກອບດ້ວຍ 4 ໜ່ວຍພັກ ແລະ ມີຈຳນວນທັງໝົດ 42 ສະຫາຍ, ຍິງ 13 ສະຫາຍ; ອົງການກາແດງລາວປະກອບດ້ວຍ ຫ້ອງການ, ສູນເລືອດແຫ່ງຊາດ, ກອງຊ່ວຍເຫຼືອບັນເທົາທຸກ,ກອງສົ່ງເສີມສຸຂະພາບຊຸມຊົນ ແລະ ກອງໂຄສະນາ ແລະ ຂົນຂວາຍການກຸສົນ; ທາງດ້ານບຸກຄະລາກອນປະກອບດ້ວຍ ປະທານ1 ທ່ານ, ຮອງປະທານ 2 ທ່ານ, ຫົວໜ້າ,ຮອງຫົວໜ້າຫ້ອງການ; ຫົວໜ້າກອງ,ຮອງກອງ; ຫົວໜ້າສູນ, ຮອງສູນ ມີພະນັກງານທັງໝົດ 105 ທ່ານ, ຍິງ 52 ທ່ານ.

6 ເດືອນຜ່ານມາແມ່ນໄດ້ຮັບຜົນສຳເລັດຫຼາຍດ້ານເປັນຕົ້ນແມ່ນການເມືອງແນວຄິດ ໄດ້ເອົາໃຈໃສ່ອົບຮົມການເມືອງແນວຄິດພະນັກງານ, ຂະຫຍາຍສະມາຊິກພັກ ສົມບູນໄດ້ 5 ສະຫາຍ, ຍິງ 5 ສະຫາຍ, ສະມາຊິກພັກສຳຮອງ 4 ສະຫາຍ, ຍິງ 3 ສະຫາຍ ແລະ ເປີດຮຽນເອກາສານສະໜັບສະໜູນພັກ 5 ສະຫາຍ, ຍິງ 2 ສະຫາຍ. ນອກນັ້ນຍັງໄດ້ສົ່ງສະມາຊິກພັກ 1 ສະຫາຍເຂົ້າຮຽນທິດສະດີຊັ້ນສູງລະບົບ 5 ເດືອນທີ່ສະຖາບັນການເມືອງ-ການປົກຄອງ; ມີເງິນກອງທຶນໝູນວຽນ 70 ກວ່າລ້ານກີບ. ວຽກງານວິຊາສະເພາະມີ 9 ໜ້າວຽກຫຼັກຂອງອົງການກາແດງລາວ ເຊັ່ນ: ການຊ່ວຍເຫຼືອບັນເທົາທຸກ, ການບໍລິຈາກເລືອດ-ສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການກູ້ໄພສຸກເສີນ, ການໂຄສະນາຂົນຂວາຍແຫຼ່ງທຶນ, ການສ້າງອາສາສະໝັກກາແດງ, ການສືບທາວຫາຍາດພີ່ນ້ອງ, ການພົວພັນ ແລະ ຮ່ວມມືສາກົນ. ໃນ 6 ເດືອນຕົ້ນປີ ສາມາດໄດ້ຮັບເລືອດທັງໝົດ 25,346 ຖົງ ທຽບໃສ່ແຜນການປີທີ່ວາງໄວ້ 55.000 ຖົງ ແມ່ນໄດ້ 48% ແລະ ໄດ້ສືບຕໍ່ການຈັດຕັ້ງປະຕິບັດຟື້ນຟູໄພພິບັດທີ່ເມືອງສະໜາມໄຊ ແຂວງອັດຕະປື.


ແຜນ 6 ເດືອນທ້າຍປີໂດຍໄດ້ກຳນົດເອົາແຜນຈຸດສຸມ ໂດຍສືບປັບປຸງກົດໝາຍວ່າດ້ວຍວຽກງານກາແດງລາວ, ຟື້ນຟູການຈັດຕັ້ງປະຕິບັດການຊ່ວຍເຫຼືອຜູ້ປະສົບໄພທີ່ເມືອງສະໜາມໄຊ ແຂວງອັດຕະປື, ວຽກງານຊ່ວຍເຫຼືອຜູ້ປະສົບໄພຕາມທ້ອງຖະໜົນ, ວຽກງານເອສ໌, ວຽກງານນ້ຳ-ສຸຂະພິບານ, ການຊ່ວຍເຫຼືອບັນເທົາທຸກ, ການໂຄສະນາ ແລະ ວຽກງານອື່ນໆ.


ຈາກນັ້ນ, ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ກໍໄດ້ສະເໜີສະພາບການຈັດຕັ້ງທັງສູນກາງ ແລະ ທ້ອງຖິ່ນຍັງມີຄວາມຫຍຸ້ງຍາກບາງອັນຕໍ່ທ່ານລັດຖະມົນຕີ ຕໍ່ຄວາມບໍ່ເຂົ້າໃຈໃນການເຄື່ອນໄຫວວຽກງານໃນຂັ້ນທ້ອງຖິ່ນເຊິ່ງເຫັນວ່າໄລຍະຜ່ານມາຍັງມີຄວາມສັບສົນ. 


ໃນຕອນທ້າຍ ທ່ານ ລັດຖະມົນຕີ ປອ ຄຳແພງ ໄຊສົມແພງ ໄດ້ຕີລາຄາສູງຕໍ່ຜົນງານການຈັດຕັ້ງປະຕິບັດຂອງອົງການກາແດງລາວໃນໄລຍະຜ່ານມາໂດຍທ່ານໄດ້ຍ້ອງຍໍຊົມເຊີຍ ຍັງໄດ້ເນັ້ນໃຫ້ພະນັກງານອົງການກາແດງເອົາໃຈໃສ່ ມີສະຕິລະວັງຕົວໃນການຫັນປ່ຽນຂອງສັດຕູ, ໃຫ້ເອົາໃຈໃສຊີ້ນຳຍົກລະດັບສຶກສາອົບຮົມແນວຄິດການເມືອງໃຫ້ຕີຖອຍແນວຄິດທ້ອງຖິ່ນ ເປັນຕົ້ນແມ່ນຕ້ອງຕີຖອຍດ້ານແນວຄິດຕ່າງໆ, ຈິນຕະນາການຮີດຄອງເດີມ, ອາຍາສິດ, ການຈົ່ງຈຽມ ແລະ ແບບແຜນວິທີເຮັດວຽກ; ເອົາໃຈໃສສ້າງໜ່ວຍພັກປອດໃສເຂັ້ມແຂງໜັກແໜ້ນ; ເອົາໃຈໃສ່ປະຕິບັດກອງປະຊຸມສາມຂັ້ນຂອງຕົນເປັນຕົ້ນແມ່ນການກະກຽມບຸກຄະລາກອນ, ຮ່າງບົດລາຍງານການເມືອງ, ມະຕິກອງປະຊຸມ, ແຜນ ແລະ ທາບທາມບຸກຄະລາກອນຕ່າງໆ; ການປັບປຸງກົງຈັກການຈັດຕັ້ງ ສ່ວນວຽກງານວິຊາສະເພາະແມ່ນໃຫ້ເອົາໃຈໃສ່ໃນການຈັດຕັ້ງປະຕິບັດຕາມແບບແຜນວິທີເຮັດວຽກ ໂດຍມີການປະຊຸມສ່ອງແສງລາຍງານກັນຢ່າງເປັນປະຈຳ.