ອົງການກາແດງລາວ

CROIX ROUGE LAO

ສະຫຼຸບຕີລາຄາການຈັດຕັ້ງປະຕິບັດການຟື້ນຟູວຽກງານໄພພິບັດທີ່ແຂວງອັດຕະປື

ໃນລະຫວ່າງວັນທີ 8-9 ກໍລະກົດ 2019 ນີ້ທີ່ແຂວງອັດຕະປື, ໄດ້ຈັດກອງປະຊຸມສະຫຼຸບລາຍງານການຊ່ວຍເຫຼືອໂຄງການຟື້ນພູໄພພິບັດທີ່ເມືອງສະໜາມ, ທີ່ຫ້ອງປະຊຸມອົງການກາແດງແຂວງອັດຕະປື ພາຍໃຕ້ການເປັນປະທານຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ມີບັນດາທ່ານຜູ້ຊຽວຊານຈາກສະຫະພັນກາແດງ ແລະ ຊີກວົງເດືອນແດງສາກົນ,ຫົວໜ້າໂຄງການ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ, ກອງປະຊຸມດັ່ງກ່າວໄດ້ໄດ້ຮັບການລາຍງານການຈັກຕັ້ງປະຕິບັດການຊ່ວຍເຫລືອປະຊາຊົນເມືອງສະຫມາມໄຊເຊີ່ງມີຫລາມຫນ້າວຽກໄດ້ປະຕິບັດສຳເລັດແລະບາງວຽງກໍ່ຍັງຊັກຊາຍ້ອນມີຫລາຍບັດໃຈເຊີ່ງທ່ານ ກາວີພອນ ສຸດທີ ຫົວຫນ້າໂຄງການຟື້ນຟູແລະຊ່ວຍເຫລືອປະຊາຊົນຜູ້ປະສົບໄພແຂວງອັດຕະປືໄດ້ຕີລາຄາວ່າ: ການຊ່ວຍເຫຼືອຂອງໂຄງການຟື້ນຟູໄພພິບັດໃຫ້ແກ່ພໍ່ແມ່ປະຊາຊົນ ໃນຈຳນວນ 10 ບ້ານເປົ້າໝາຍທີ່ໄດຮັບຜົນກະທົບຈາກເຫດການສັນເຂື່ອນເຊປຽນ-ເຊນ້ຳນ້ອຍແຕກໃນຄັ້ງວັນທີ 23 ກໍລະກົດ 2018 ທີ່ຜ່ານມາ ເຊິ່ງອົງການກາແດງລາວ ແລະ ສະຫະພັນກາແດງ ແລະ ຊີກວົງເດືອນແດງສາກົນໄດ້ເຂົ້າໃຫ້ການຊ່ວຍເຫຼືອເຊິ່ງແບ່ງອອກເປັນສອງໄລຍະຄື ໄລຍະການຊ່ວຍເຫຼືອສຸກເສີນເບື້ອງຕົ້ນ ແລະ ໄລຍະການຟື້ນຟູ ສຳລັບການຊ່ວຍເຫຼືອແມ່ນເນັ້ນໃສ່ການຊ່ວຍເຫຼືອຟື້ນຟູດ້ານທີ່ຢູ່ອາໄສ, ຊີວິດການເປັນຢູ່ ແລະ ຄວາມຕ້ອງການຂັ້ນຟື້ນຖານ, ສົ່ງເສີມວຽກງານສຸຂະພາບ, ນ້ຳ ແລະ ສຸຂາພິບານ, ການປົກປ້ອງ ແລະ ບົດບາດຍິງ-ຊາຍ, ການຫຼຸດຜ່ອນຄວາມສ່ຽງໄພພິບັດ ແລະ ການສ້າງຄວາມເຂັ້ມແຂງໃຫ້ແກ່ອົງການກາແດງລາວ.

ມາຮອດປັດຈຸບັນອົງການກາແດງລາວສາມາດໃຫ້ການຊ່ວຍເຫຼືອປະຊາຊົນ ແລະ ໝູ່ບ້ານທີ່ໄດ້ຮັບຜົນກະທົບ ຫຼາຍກິດຈະກຳ,ພ້ອມນັ້ນ,ການຈັດຕັ້ງປະຕິບັດກໍມີທັງຂໍ້ສະດວກ ແລະ ຂໍ້ຫຍຸ້ງຍາກຫຼາຍດ້ານໃນເດືອນມີນາ/2019-ເດືອນມີຖຸນາ2019 ເພື່ອສືບຕໍ່ຈັດຕັ້ງປະຕິບັດໂຄງການໃຫ້ການຊ່ວຍເຫຼືອປະຊາຊົນທີ່ໄດ້ຮັບຜົນກະທົບໃນ3ເດືອນຕໍ່ໜ້າຄື: ກິດຈະກຳການຝຶກອົບຮົມການສ້າງທີ່ຢູ່ອາໄສທີ່ປອດໄພໃຫ້ອາສາສະໝັກບ້ານ, ແຜນການຜະລິດສື່ສິ່ງພິມກ່ຽວກັບບ້ານທີ່ປອດໄພ, ຝຶກອົບຮົມສົ່ງເສີມຊີວິດການເປັນຢູ່(ປູກຝັງລ້ຽງສັດ)ໃຫ້ອາສາສະໝັກບ້ານ ແລະ ຊຸມຊົນບ້ານເປົ້າໝາຍໂຄງການ, ຝຶກອົບຮົມຈິດຕະສັງຄົມໃຫ້ພະນັກງານກາແດງແຂວງ,ເມືອງ ແລະ ອາສາສະໝັກບ້ານ; ແຜນຜະລິດສື່ສິ່ງພິມກ່ຽວກັບວຽກງານຈິດຕະສັງຄົມ; ຝຶກອົບຮົມວຽກງານປະຖົມພະຍາບານໃຫ້ອາສາສະໝັກ.


ໃນຕອນທ້າຍ ທ່ານ ອຸ່ນຫຼ້າ ໄຊຍະສິດ ໄດ້ໃຫ້ຂໍ້ຄິດເຫັນ ແລະ ໃຫ້ທັດສະນະຕໍ່ກອງປະຊຸມໂດຍກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ການຈັດຕັ້ງປະຕິບັດໂຄງການຟື້ນຟູໄພພິບັດເພື່ອຊ່ວຍເຫຼືອຜູ້ໄດ້ຮັບຜົນກະທົບຈາກໄພນ້ຳຖ້ວມໃນໄລຍະຜ່ານມາ ເຊິ່ງເຫັນວ່າອົງການກາແດງລາວ, ສະຫະພັນກາແດງ ແລະ ຊີກວົງເດືອນແດງສາກົນ ໄດ້ໃຫ້ການຊ່ວຍເຫຼືອຫຼາຍໆດ້ານຕໍ່ກັບຜູ້ໄດ້ຮັບຜົນກະທົບ ແລະ ເນັ້ນໃຫ້ຜູ້ຮັບຜິດຊອບໂຄງການຟື້ນຟູໄພພິບັດໃນຄັ້ງນີ້ໃຫ້ພ້ອມກັນເອົາໃຈໃສ່ໃນການຊ່ວຍເຫຼືອປະຊາຊົນໃຫ້ເກີດປະໂຫຍດສູງສຸດ, ພ້ອມກັນສຸມໃສ່ໃນການຈັດຕັ້ງປະຕິບັດກິດຈະກຳຕ່າງໆໃຫ້ເກີດດອກອອກຜົນ ແລະ ຄຽງຄູ່ກັບຄວາມສາມັກຄີ.

ຈາກນັ້ນ, ທ່ານ ປະທານອົງການກາແດງລາວກໍໄດ້ເນັ້ນບາງບັນຫາຕົ້ນຕໍໃຫ້ກັບຄະນະຮັບຜິດຊອບໂຄງການຄື:ຄະນະຮັບຜິດຊອບໂຄງການຈົ່ງພ້ອມກັນຄົ້ນຄ້ວາກຳແໜ້ນແຜນການທີ່ກຳນົດໄວ້(ແຜນຄົນ,ແຜນວຽກ,ແຜນເງິນ)ພ້ອມທັງປະເມີນວຽກເປັນປະຈຳ;ຈົ່ງພ້ອມກັນເອົາໃຈໃສ່ດຳເນີນການຈັດຊື້ຈັດຈ້າງອຸປະກອນເພື່ອມາສະໜ້ອງໃຫ້ແກ່ກິດຈະກຳໃຫ້ແກ່ຜູ້ປະສົບໄພໃຫ້ຖືຕ້ອງຕາມລະບຽບການ,ມາດຖານ,ຄຸນນະພາບ ແລະ ຂຸ້ນຂ້ຽວຈັດຕັ້ງປະຕິບັດໃຫ້ສຳເລັດໂດຍໄວ;ຈົ່ງພ້ອມກັນປັບປຸງແບບແຜນວິທີເຮັດວຽກໃນຂົງເຂດຂອງໂຄງການ;ເອົາໃຈໃສປະຕິບັດລະບຽບການຄຸ້ມຄອງທາງດ້ານການເງິນໂດຍສະເພາະໃບບົງ-ໃບບິນ ເພື່ອໃຫ້ຖືກຕ້ອງໂປ່ງໃສສາມາດກວດສອບໄດ້;ເອົາໃຈໃສ່ໃນການພົວພັນຮ່ວມມືກັບຄູ່ຮ່ວມງານໃນການນຳພາທາງດ້ານແນວຄິດການເມືອງ “ເຮັດແນວຄິດການເມືອງໄປກ່ອນບາດກ້າວໜຶ່ງ”;ຮຽກຮ້ອງມາຍັງການນຳແຂວງເພີ່ມທະວີໃນການຕິດຕາມແລະອຳນວຍຄວາມສະດວກແກ່ການດຳເນີນໂຄງການແລະໃຫ້ທິດຊີ້ນຳແກ່ຄະນະຮັບຜິດຊອບໂຄງການ.