ອົງການກາແດງລາວ

CROIX ROUGE LAO

ສະເຫຼີມສະຫຼອງວັນສ້າງຕັ້ງອົງການກາແດງ ແລະ ຊີກວົງເດືອນແດງສາກົນຄົບຮອບ 156 ປີ.

ໃນວັນທີ 11 ພຶດສະພາ ທີ່ຜ່ານມານີ້ ອົງການກາແດງລາວ ຮ່ວມກັບ ສະຫະພັນກິລາລົດຖີບແຫ່ງຊາດໄດ້ຈັດກິດຈະກຳຂີ່ລົດຖີບເພື່ອສຸຂະພາບ ເພື່ອລະນຶກວັນສ້າງຕັ້ງອົງການກາແດງ ແລະ ຊີກວົງເດືອນແດງສາກົນ ຄົບຮອບ 156 ປີ ພາຍໃຕ້ຄຳຂວັນ “ ແບ່ງປັນຄວາມຮັກ ແລະ ນ້ຳໃຈເຊິ່ງກັນ ແລະ ກັນ” ຂຶ້ນທີ່ປະຕູໄຊ ໄປຫາຫໍຄຳ ແລະ ດອນໜູນເປັນໄລຍະທາງ 25 ກິໂລແມັດ, ໂດຍການເຂົ້າຮ່ວມຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ແລະ ທ່ານ ນໍລະກັນ ຕັນເສລີ ຮອງປະທານສະຫະພັນກິລາ ລົດຖີບແຫ່ງຊາດ ພ້ອມມວນຊົນເຂົ້າຮ່ວມເປັນຈຳນວນຫຼວງຫລາຍ.


ອົງການກາແດງລາວເປັນອົງການຈັດຕັ້ງທາງສັງຄົມແຫ່ງ ສ ປປ ລາວ ໂດຍປະຕິບັດຕາມພາລະບົດບາດ ແລະ ໜ້າທີ່ຂອງຕົນເອງໃນການຈັດຕັ້ງປະຕິບັດວຽກງານມະນຸດສະທຳ ພາຍໃຕ້ ກົດໝາຍ ແລະ ລັດຖະທຳມະນູນ ແລະ 7 ຫຼັກການຂອງຂະບວນການກາແດງສາກົນຄື: ຊ່ວຍເຫຼືອບັນເທົາທຸກເບື້ອງຕົ້ນໃຫ້ປະຊາຊົນທີ່ປະສົບໄພພິບັດທາງທຳມະຊາດ ແລະ ມະນຸດສ້າງຂຶ້ນ, ຈັດຫາ ແລະ ສະໜອງເລືອດທີ່ປອດໄພ, ສົ່ງເສີມສຸຂະພາບຂັ້ນພື້ນຖານແກ່ປະຊາຊົນບັນດາເຜົ່າ, ການປະຖົມພະຍາບານ, ການກູ້ໄພສຸກເສີນ, ໂຄສະນາຊອກຫາແຫຼ່ງທຶນ, ສ້າງສະມາຊິກ ແລະ ອາສາສະໝັກ, ສືບທາວຫາຍາດພີ່ນ້ອງທີ່ພັດພາກຈາກກັນ ແລະ ພົວພັນຮ່ວມມືກັບສາກົນ. ຕະຫຼອດ 156 ປີ ທີ່ຜ່ານມາ ກາແດງສາກົນນັບມື້ນັບເຕີບໃຫຍ່ ຂະຫຍາຍຕົວເຂັ້ມແຂງ ໃນການຈັດຕັ້ງປະຕິບັດ ແລະ ຜັນຂະຫຍາຍໜ້າທີ່ພາລະບົດບາດ ວຽກງານດ້ານມະນຸດສະທຳຢ່າວກ້ວາງຂວາງ, ປະກອບສ່ວນອັນໃຫຍ່ຫຼວງໃນການຊ່ວຍເຫຼືອປະຊາກອນຜູ້ທຸກຍາກ ໃນທຸກແຫ່ງຫົນຂອງທົ່ວທຸກມຸມໂລກໄດ້ຢ່າງຫຼວງຫຼາຍ, ເຖິງວ່າຈະມີຂໍ້ຫຍຸ້ງຍາກສັບສົນ ແລະ ສິ່ງທ້າຍນາໆປະການ ແຕ່ກໍ່ມີຕວາມຕັດສິນໃຈສູງ ກ້າວໄປພ້ອມກັບອາສາສະໝັກກາແດງທີ່ປະຕິບັດໜ້າທີ່ຊ່ວຍເຫຼືອປະຊາຊົນ ທີ່ທຸກຍາກຂາດເຂີນຕາມສະຖານທີ່ຕ່າງໆເຫຼົ່ານັ້ນໄດ້ຢ່າງກ້ວາງຂວາງ ແລະ ທົ່ວເຖິງ.


ໃນໜຶ່ງປີຜ່ານມາອົງການກາແດງລາວ ໄດ້ອອກເຫື່ອເທແຮງໃຫ້ການຊ່ວຍເຫຼືອ ປະຊາຊົນທີ່ໄດ້ຮັບຜົນກະທົບຈາກໄພພິບັດຕ່າງໆຄື: ນ້ຳຖ້ວມ, ໄຟໄໝ້ ແລະ ອຸປະຕິເຫດຕ່າງໆຢູ່ໃນ 17ແຂວງ ແລະ ນະຄອນຫຼວງວຽງຈັນ, ສາມາດຮັບບໍລິຈາກເລືອດໄດ້ຫຼາຍກວ່າ 50 ພັນຖົງ ພ້ອມທັງໄດ້ເອົາໃຈໃສ່ວຽກງານສຸຂະພາບຂັ້ນພື້ນຖານ, ບໍລິການປະຖົມພະຍາບານໃນວັນສຳຄັນຕ່າງໆ ໄດ້ເປັນຈຳນວນຫຼາຍ, ພ້ອມເອົາໃສ່ສະໜອງນ້ຳສະອາດໃຫ້ປະຊາຊົນຜູ້ປະສົບໄພຢູ່ເມືອງ ສະໜາມໄຊ ແຂວງ ອັດຕະປື ແລະ ແຂວງ ຄຳມ່ວນ ໄດ້ຢ່າງທົ່ວເຖິງ.