ອົງການກາແດງລາວ

CROIX ROUGE LAO

ສ້າງຂະບວນການບໍລິຈາກເລືອດຕ້ອນຮັບວັນສຳຄັນຂອງຊາດ

ສ້າງຂະບວນການບໍລິຈາກເລືອດຕ້ອນຮັບວັນສຳຄັນຂອງຊາດ. ໃນວັນທີ 23 ພະຈິກ 2018 ອົງກາ ນກາແດງລາວ ແລະພາກສ່ວນຕ່າງໆອົງການຈັດຕັ້ງການຮັບບໍລິຈາກເລືອດຂຶ້ນ ທີ່ສູນການຄ້າວຽງຈັນເຊັນເຕີ ພາຍໃຕ້ຄຳຂວັນ: 43 ປີ ມີໄຊ ໃຫ້ເລືອດ ໃຫ້ຊີວິດ,ເພື່ອເປັນການສະເຫຼີມສະຫຼອງ ວັນສ້າງຕັ້ງ ສ ປປ ລາວ ຄົບຮອບ 43 ປີ (2 ທັນວາ 1975 – 2 ທັນວາ 2018 ) ທີ່ຈະໝູນວຽນມາຄົບຮອບອີກຄັ້ງໜຶ່ງ, ໂດຍການເຂົ້າຮ່ວມ ຂອງທ່ານ ດຮ. ສິງ ເມໂນລາດ ຮອງປະທານອົງການກາແດງລາວ, ມີທ່ານ ດຮ. ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດອົງການກາແດງລາວ, ມີຄະນະນຳຈາກພາກສ່ວນຕ່າງໆອ້ອມຂ້າງ ນະຄອນຫຼວງວຽງຈັນ ພ້ອມດ້ວຍ ນັກຮຽນ – ນັກສຶກສາ, ຄູ – ອາຈານ ທະຫານ, ຕຳຫຼວດ ເຂົ້າຮ່ວມທັງໝົດ 1200 ຄົນ, ໃນພິທີທ່ານ ດຮ. ສິງ ເມໂນລາດ ຮອງປະທານອົງການກາແດງລາວ ກໍ່ໄດ້ຍົກໃຫ້ເຫັນຄວາມໝາຍຄວາມສຳຄັນຂອງວັນຊາດທີ 2 ທັນວາ ຄົບຮອບ 43 ປີ ຊຶ່ງເປັນໄລຍະເວລາທີ່ຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ ກໍ່ຄື ໃນໄລຍະສ້າງສາພັດທະນາປະເທດຊາດ; ວຽກງານການບໍລິຈາກເລືອດກໍ່ເປັນວຽກງານໜຶ່ງ ທີ່ມີຄວາມຈຳເປັນຕໍ່ມະນຸດເຮົາ ຊຶ່ງໃນແຕ່ລະມື້ ມີຜູ້ທີ່ນອນຮັກສາຢູ່ຕາມໂຮງໝໍແຫ່ງຕ່າງໆ ມີຄວາມຕ້ອງການເລືອດແມ່ນສູງພໍສົມຄວນ ໃນແຕ່ລະມື້ສູນເລືອດແຫ່ງຊາດ ແລະ ບັນດາສູນແຂວງທົ່ວປະເທດ ຕ້ອງໄດ້ຈັດຫາ ແລະ ສະໜອງເລືອດໃຫ້ແກ່ຄົນເຈັບ ຢ່າງໜ້ອຍມື້ລະ 100- 200 ຖົງ ຢ່າງເປັນປະຈຳ ຊຶ່ງມີທັງຜູ້ປ່ວຍສຸກເສີນ ແລະ ຜູ້ທີ່ຕ້ອງການປິ່ນປົວດ້ວຍເລືອດໃນໄລຍະຍາວ, ດັ່ງນັ້ນ ຈຶ່ງຂໍເຊີນຊວນມາຍັງທຸກອົງການຈັດຕັ້ງ, ບຸກຄົນ – ນິຕິບຸກຄົນ ພໍ່ຄ້າຊາວຂາຍ, ນັກຮຽນ-ນັກສຶກສາ ຈົ່ງຮ່ວມໃຈກັນປະກອບສ່ວນ ບໍລິຈາກເລືອດ ເພື່ອໃຫ້ເລືອດຕອບສະໜອງໄດ້ຢ່າງພຽງພໍ, ສຳລັບການບໍລິຈາກເລືອດໃນຄັ້ງນີ້ໄດ້ຮັບເລືອດທັງຫມົດ 660 ຖົງ.