ອົງການກາແດງລາວ

CROIX ROUGE LAO

ອົງການກາແດງລາວຊ່ວຍສ້ອມແປງໂຮງຮຽນປະຖົມສົມບູນຫນອງບົວທອງ100ກວ່າລ້ານກີບ

ອົງການກາແດງລາວຊ່ວຍສ້ອມແປງໂຮງຮຽນປະຖົມສົມບູນຫນອງບົວທອງ100ກວ່າລ້ານກີບ.
ໃນລະຫວ່າງວັນທີ 22 – 29 ມັງກອນ 2019 ທີ່ ຢູ່ທີ່ໂຮງຮຽນປະຖົມສົມບູນ ບ້ານ ໜອງບົວທອງ ເມືອງປາກງື່ມ ແຂວງ ນະຄອນຫຼວງວຽງຈັນ, ອົງ ກາແດງລາວ ແລະ ສ.ເກົາຫລີ ໄດ້ພ້ອມກັນສ້ອມແປງໂຮງຮຽນປະຖົມຫນອງບົວທອງເມືອງປາກງື່ມນະຄອນຫລວງວຽງຈັນຂື້ນ. ໂດຍການເຂົ້າຮ່ວມຂອງທ່ານນາງ ໄອ່ຄຳ ສໍອິນໄຊ ຮອງຫົວໜ້າການກອງໂຄສະນາ ແລະ ຂົນຂວາຍການກຸສົນ, ທ່ານ ຮາ ຊັງຢອງ ຫົວໜ້າສູນບໍລິການຊຸມຊົນ ພາກຕາເວັນຕົກ ກາແດງແຂວງ ຈ໋ອງນາມ ສ.ເກົາຫລີ ພ້ອມດ້ວຍສອງຝ່າຍ, ມີ ກຸ່ມບ້ານ, ຜູ້ຕາງໜ້າຈາກສຶກສາ ແລະ ກິລາເມືອງ, ຊາວໜຸ່ມເມືອງ ,ອຳນາດການປົກຄອງບ້ານ, ຄູ ອາຈານ, ນ້ອງນັກຮຽນ ແລະ ພາກສ່ວນກ່ຽວຂ້ອງເຂົ້າຮ່ວມ. ກິດຈະກຳແລກປ່ຽນ ຊາວໜຸ່ມ ອາສາສະໝັກ ຄັ້ງນີ້ຊາວໜຸ່ມອົງການກາແດງລາວ ແລະ ອາສາສະໝັກ ສ.ເກົາຫຼີ ໄດ້ຊ່ວຍສ້ອມແປງ, ປັບປຸງ ອາຄານຮຽນຊັ້ນອະນຸບານ ແລະ ຊັ້ນປະຖົມ ບ້ານໜອງບົວທອງ ແລະ ບ້ານ ດອນໄຮ່ ເມືອງປາກງື່ມ ແຂວງ ນະຄອນຫຼວງວຽງຈັນ; ຍ້ອນວ່າ ອາຄານຮຽນບໍ່ສົມບູນ ສ້າງຄວາມຫຍຸ້ງຍາກໃຫ້ແກ່ການຮຽນ – ການສອນ ຂອງຄູ ອາຈານ ແລະ ນ້ອງນັກຮຽນ; ຫລັງຈາກນັ້ນ ກໍ່ໄດ້ມອບອຸປະກອນການຮຽນ, ການສອນ ໃຫ້ຄວາມຮູ້ດ້ານການປະຖົມພະຍາບານ, ຮຽນຮູ້ວັດທະນະທຳລາວເຊັ່ນ: ການໃສ່ບາດ,ການນຸ່ງຖື,ບາສີສູ່ຂວັນ,ແລກ ການສະແດງສິລະປະຮ່ວມກັນ; ນອກຈາກນັ້ນ ກໍ່ໄດ້ເຂົ້າຢ້ຽມຢາມໂຮງຮຽນ ມສ ມິດຕະພາບລາວ – ຫວຽດນາມ ແລະ ມະຫາວິທະຍາໄລແຫ່ງຊາດ.
ງົບປະມານການເຄື່ອນໄຫວກິດຈະກຳ ແລະ ໃຫ້ການຊ່ວຍເຫຼືອຄັ້ງນີ້ ແມ່ນໄດ້ມາຈາກການການລະດົມທຶນ ຈາກແຂວງ ຈອງນຳ ສ.ເກົາຫຼີ ລວມມູນຄ່າທັງໝົດ 102.600.000 ກີບ.
ຂ່າວຍັງໃຫ້ຮູ້ອີກວ່າ ກິດຈະກຳລັກສະນະດັ່ງກ່າວຈະຍັງໄດ້ສືບຕໍ່ປະຕິບັດຢູ່ ສ.ປ.ປ ລາວ ໃນເດືອນກຸມພາ 2019 ທີ່ຈະມາເຖິງນີ້.