ອົງການກາແດງລາວ

CROIX ROUGE LAO

ອົງການກາແດງລາວຊ່ວຍສ້ອມແປງໂຮງຮຽນປະຖົມ ທ່ານາສາ

ໃນວັນທີ 20 – 26 ກຸມພາ 2019 ຢູ່ທີ່ໂຮງຮຽນປະຖົມບ້ານທ່ານາສາ ເມືອງ ສັງທອງ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານນາງ ໄອ່ຄຳ ສໍອິນໄຊ ຮອງຫົວໜ້າກອງໂຄສະນາ ແລະ ຂົນຂວາຍການກຸສົນ ອົງການກາແດງລາວ, ທ່ານ ບົວຄຳ ສີສົງຄາມ ເຈົ້າເມືອງ ເມືອງສັງທອງ, ທ່ານ ຊໍ ຈອງແຮ ຫົວໜ້າອົງການກາແດງ ແຂວງອຸນຊານ ສ.ເກົາຫຼີ ພ້ອມດ້ວຍຄະນະຈາກທັງສອງໂດຍແມ່ນການຮ່ວມມືລະຫວ່າງອາສາສະຫມັກອົງການກາແດງລາວແລະອາສາສະມັກກາແດງສເກົາຫລີ ທີ່ເດີນທາງມາຢ້ຽມຢາມແລະຊ່ວຍເຫລືອສ້ອມແປງໂຮງຮຽນໃນຄັ້ງນີ້ຢ່າງເປັນຂະບວນຟົດຟຶ້ນແລະມີຄະນະບ້ານ, ຜູ້ຕາງຫນ້າຈາກສຶກສາ ແລະ ກິລາເມືອງ, ອຳນາດການປົກຄອງ, ຄູ-ອາຈານ, ນ້ອງນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ວຽກຕົ້ນຕໍແມ່ນສ້ອມແປງ ອາຄານຮຽນ2ແຫ່ງຄື: ປະຖົມ ແລະ ອະນຸບານບ້ານທ່ານາສາຄື: ທາສີອາຄານຮຽນທັງສອງຫລັງ, ປ່ຽນສັງກະສີ, ຕິດຕັ້ງເພດານ ແລະ ປັບປຸງຝາອາຄານຊັ້ນອະນຸບານ; ປ່ຽນສັງກະສີ ແລະ ສ້ອມແປງບໍ່ນໍ້າບາດານຂອງໂຮງຮຽນອະນຸບານ ບ້ານຫ້ວຍຫຼ້າ ເມືອງສັງທອງນະຄອນຫລວງວຽງຈັນ.

ເນື່ອງຈາກວ່າ ອາຄານດັ່ງກ່າວມີຄວາມເກົ່າແກ່, ຊຸດໂຊມ ແລະ ເປ່ເພ ທັງສ້າງຄວາມຫຍຸ້ງຍາກໃຫ້ແກ່ການຮຽນ-ການສອນຂອງຄູອາຈານ ແລະ ນ້ອງນັກຮຽນ, ພ້ອມດຽວກັນນີ້ ກໍ່ຍັງໄດ້ ມອບອຸປະກອນການຮຽນ-ການສຶກສາ ໃຫ້ຄວາມຮູ້ດ້ານສຸຂະອະນະໄມ, ຮຽນຮູ້ວັດທະນະທຳລາວ ເປັນຕົ້ນ ການໃສ່ບາດ, ການນຸ່ງຖື, ການເຮັດອາຫານ, ບາສີສູ່ຂວັນ ແລະ ສະແດງສິລະປະຮ່ວມກັນ.ການເຄື່ອນໄຫວກິດຈະກຳລະຫວ່າງຊາວໜຸ່ມອາສາສະໝັກກາແດງລາວ-ກາແດງສເກົາຫຼີໄດ້ເລີ່ມແຕ່ປີ2012ເປັນຕົ້ນມາ ແລະປີນີ້ເປັນປີທີ9.ສຳລັບງົບປະມານ ໃນການເຄື່ອນໄຫວກິດຈະກຳ ແລະ ໃຫ້ການຊ່ວຍ ໃນຄັ້ງນີ້ແມ່ນການສະໜັບສະໜູນຈາກ ກາແດງແຂວງ ອຸນຊານ ສ.ເກົາຫລີ. ລວມມູນຄ່າທັງໝົດ 197.800.000ກີບ.
ນອນນັ້ນ, ຍັງມີເຄື່ອງບໍລິຈາກໃຫ້ນັກຮຽນລວມມູນຄ່າກວ່າ6ລ້ານກີບ.