ອົງການກາແດງລາວ

CROIX ROUGE LAO

ອົງການກາແດງລາວຊ່ວຍເຫລືອຜູ້ຕິດເຊື້ອໂຄວິດ ພາຍໃນນະຄອນຫຼວງວຽງຈັນ

ໃນຕອນບ່າຍຂອງວັນທີ 15 ມີນາ 2022 ທີ່ຫ້ອງວ່າການປົກຄອງນະຄອນຫຼວງວຽງຈັນໄດ້ມີພິທີມອບຮັບເຄື່ອງສຸຂະອະນາໄມໃນວຽກງານໂຄວິດ-19 ຂຶ້ນ, ໂດຍການເປັນກຽດເຂົ້າຮ່ວມຂອງທ່ານ ຮສ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ຫົວຫນ້າຄະນະສະເພາະກິດຕ້ານແລະສະກັດກັ້ນເຊື້ອພະຍາດໂຄວິດ-19ຂັ້ນ ນະຄອນຫລວງວຽງຈັນ, ມີບັນດາເຈົ້າເມືອງ ຮອງເຈົ້າເມືອງ ພາຍໃນນະຄອນຫຼວງວຽງຈັນ ແລະ ພະແນກການທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານປະທານອົງການກາແດງແຫ່ງຊາດລາວ ໄດ້ກ່າວວ່າ: ເຄື່ອງດັ່ງກ່າວແມ່ນເຄື່ອງສຸຂະອະນະໄມປະກອບມີ: ຜ້າອັດປາກ-ດັງ, ເຈວລ້າງມື, ຢາຖູແຂ້ວ, ສະບູ, ຢາສະຜົມ, ເຫຼົ້າ90 ແລະ ອື່ນໆ, ຈຳນວນ 903 ຊຸດ, ລວມມູນຄ່າ 76.755.000 ກີບ. ແມ່ນໄດ້ຮັບການຊ່ວຍເຫຼືອງົບປະມານຈາກຫ້ອງການສະຖານທູດການາດາປະຈຳລາວ ແລະ ໃນໄລຍະຜ່ານມາກໍ່ໄດ້ຮັບການຊ່ວຍເຫຼືອຈາກອົງການກາແດງເພື່ອນມິດ ແລະ ສາກົນ ເພື່ອຍາດແຍ່ງເອົາທຶນຮອນ ເພື່ອໜູນໃຊ້ເປັນເຄື່ອງຊ່ວຍເຫຼືອດ້ານອາຫານ, ນ້ຳດື່ມ ແລະ ອື່ນໆ. ມາມອບໃຫ້ແກ່ສູນຈຳກັດບໍລິເວນ ແລະ ສູນແຍກປ່ຽວຢູ່ເມືອງຫາດຊາຍຟອງ, ນາຊາຍທອງ, ເມືອງ ໄຊທານີ ນະຄອນຫຼວງວຽງຈັນ, ນອກຈາກນີ້;ຍັງໄດ້ໃຫ້ການຊ່ວຍເຫຼືອຢູ່ບັນດາແຂວງອື່ນໆນຳອີກຈຳນວນໜຶ່ງ.
ໂອກາດນີ້; ທ່ານຮອງເຈົ້າຄອງນະຄອນຫລວງວຽງຈັນ ກໍ່ໄດ້ກ່າວສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ການຊ່ວຍເຫຼືອຂອງອົງການກາແດງແຫ່ງຊາດລາວ ທີ່ເຫັນໄດ້ເຖິງຄວາມສຳຄັນ ແລະ ເອົາໃຈໃສ່ໃນການມີສ່ວນຮ່ວມ ເພື່ອຕ້ານ ແລະ ສະກັດກັ້ນເຊື້ອພະຍາດໂຄວິດ-19 ເຊິ່ງມາຮອດປັດຈຸບັນ ຄະນະສະເພາະກິດນະຄອນຫຼວງວຽງຈັນ ໄດ້ມີການປັບປຸງ ແລະ ທ້ອນໂຮມເອົາພາກສ່ວນຕ່າງໆເຂົ້າເປັນອັນດຽວກັນ ເພື່ອເຮັດໃຫ້ການບໍລິຫານວຽກງານເປັນສູນລວມ, ສ່ວນຕົວເລກຜູ້ຕິດເຊື້ອພະຍາດໂຄວິດ-19 ຢູ່ພາຍໃນນະຄອນຫຼວງວຽງຈັນ ປັດຈຸບັນເຫັນວ່າມີຕົວເລກທີ່ເພີ່ມຂຶ້ນສູງພໍສົມຄວນ ສຳລັບເຄື່ອງຈຳນວນດັ່ງກ່າວ ທາງຫ້ອງການປົກຄອງນະຄອນຫຼວງວຽງຈັນ ຈະໄດ້ນຳມອບຕໍ່ໃຫ້ແກ່ບັນດາເມືອງ ທີ່ລົງເກັບກຳຈຳນວນບັນຊີລາຍຊື່ ຜູ້ຕິດເຊື້ອພະຍາດໂຄວິດ-19 ຢູ່ແຕ່ລະບ້ານ ແລະ ຄອບຄົວທີ່ມີຄວາມຫຍຸ້ງຍາກຂາດເຂີນເພື່ອຊ່ວຍເຫຼືອໃຫ້ເຂົາເຈົ້າມີຊີວິດການເປັນຢູ່ທີ່ດີຂຶ້ນກວ່າເກົ່າ.