ອົງການກາແດງລາວ

CROIX ROUGE LAO

ອົງການກາແດງລາວ ຈະຊ່ວຍເຫຼືອອາຫານໃຫ້ແກ່ໂຮງໝໍພາກສະໜາມ 3 ແຫ່ງ.

ອົງການກາແດງລາວ ຈະຊ່ວຍເຫຼືອອາຫານໃຫ້ແກ່ໂຮງໝໍພາກສະໜາມ 3 ແຫ່ງ.
ໃນວັນທີ 09 ຕຸລາ 2021 ທ່ານ ຮສ.ດຮ. ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ລົງຢ້ຽມຢາມ ການຈັດຕັ້ງປະຕິດບັດອາສາສະຫມັກ ແລະ ແພດຫມໍທີ່ກຳລັງປະຕິບັດຫນ້າທີ່ໂຮງຫມໍພາກສະຫນາມ 3 ແຫ່ງຢູ່ເມືອງນາຊາຍທອງ, ນະຄອນຫລວງວຽງຈັນທີ່ກຳລັງປ້ອງກັນ ແລະ ຄວບຄຸມພະຍາດໂຄວິດ-19, ໂດຍມີທ່ານ ພູວອນ ພົງລາດແກ້ວ ຮອງເຈົ້າເມືອງ ເມືອງ ນາຊາຍທອງ, ເລຂາຄະນະສະເພາະກິດເມືອງ ທັງເປັນຫົວໜ້າໂຮງໝໍພາກສະໜາມ ພ້ອມດ້ວຍຄະນະສະເພາະກິດນະຄອນຫຼວງວຽງຈັນ, ແລະ ພາກສ່ວນທີ່ກ່ຽວຂ້ອງເຂົ້າຮ່ວມ, ທີ່ຫ້ອງການປົກຄອງເມືອງ ນາຊາຍທອງ.
ການລົງຢ້ຽມຢາມໃນຄັ້ງນີ້, ແມ່ນເພື່ອຕິດຕາມຊຸກຍູ້ ສະພາບການ, ຈຸດພິດເສດ ແລະ ເງື່ອນໄຂໃນການຊ່ວຍເຫຼືອເປັນຕົ້ນແມ່ນ:ສະບຽງອາຫານ, ນ້ຳດື່ມ ແລະ ເຄື່ອງສຸຂະອະນາໄມທີ່ຈຳເປັນໃນຊີວິດປະຈຳວັນ ທີ່ສາມາດໃຊ້ໄດ້ກຸ້ມ 14 ມື້ ໃຫ້ແກ່ປະຊາຊົນຜູ້ທຸກຍາກ, ດ້ອຍໂອກາດ ທີ່ຕິດເຊື້ອພະຍາດໂຄວິດ-19 ທີ່ເຂົ້າປິ່ນປົວຢູ່ໃນໂຮງໝໍພາກສະໜາມທັງ 3 ແຫ່ງ ຂອງເມືອງນາຊາຍທອງຄື: ມັດທະຍົມຕອນຕົ້ນສີເກີດ, ມັດທະຍົມສຶກສາສົມບູນຜາງແຫ້ງ ແລະ ຫໍພັກໂຮງງານທີໂອ; ເພື່ອເປັນການປະກອບສ່ວນແບ່ງເບົາພາລະທາງສັງຄົມ ແລະ ຊຸກຍູ້ການຊ່ວຍເຫຼືອດ້ານມະນຸດສະທຳ ຕາມນະໂຍບາຍຂອງອົງການກາແດງລາວ ເຊິ່ງໄດ້ຮັບການຊ່ວຍເຫຼືອດ້ານທຶນຮອນຈາກຄູ່ຮ່ວມມື ແລະ ກາແດງເພື່ອນມິດ, ໃນໄລຍະຜ່ານມາ ອົງການກາແດງລາວກໍ່ໄດ້ໃຫ້ການຊ່ວຍເຫຼືອໃນຮູບແບບດຽວກັນນີ້ໃນທົ່ວປະເທດ, ໃນນັ້ນ, ຢູ່ນະຄອນຫຼວງວຽງຈັນ ກໍ່ໄດ້ໃຫ້ການຊ່ວຍເຫຼືອຢູ່ສູນຈຳກັດບໍລິເວນຢູ່ເມືອງປາກງື່ມ, ສູນຫຼັກ 27, ສູນດົງໂດກ ແລະ ໂຮງໝໍພາກສະໜາມຈຳນວນໜຶ່ງ ພ້ອມທັງຍັງຈະໄດ້ສືບຕໍ່ຂະຫຍາຍໃຫ້ການຊ່ວຍເຫຼືອຕື່ມອີກ, ທາງອົງການກາແດງລາວໄດ້ສະເໜີຄະນະສະເພາະກິດເມືອງ ກໍ່ຄືພາກສ່ວນທີ່ຮັບຜິດຊອບໃຫ້ການຮ່ວມມືປະສານສົມທົບສະໜອງດ້ານຂໍ້ມູນໂຕເລກ ຈຳນວນຜູ້ຕິດເຊື້ອທີ່ເຂົ້າປິ່ນປົວ ຢູ່ໃນໂຮງໝໍພາກສະໜາມຢ່າງລະອຽດໃນແຕ່ລະວັນ, ເພື່ອສ້າງຄວາມສະດວກໃນການຈັດສັນອາຫານ ທີ່ຈະສົ່ງໃຫ້ໄດ້ຢ່າງພຽງພໍກັບຄວາມຕ້ອງການຕົວຈິງ, ໃນໂອກາດດັ່ງກ່າວນີ້, ທາງພາກສ່ວນທີ່ຮັບຜິດຊອບເມືອງນາຊາຍທອງກໍ່ໄດ້ລາຍງານຫຍໍ້ເຖິງສະພາບ ແລະ ການຈັດຕັ້ງປະຕິບັດວຽກງານຕົວຈິງ ໃນການປ້ອງກັນ ແລະ ຄວບຄຸມຕ້ານເຊື້ອພະຍາດໂຄວິດ-19 ທີ່ມີການລະບາດຢູ່ພາຍໃນເມືອງໃນໄລຍະຜ່ານມາຈົນເຖິງປັດຈຸບັນ, ຫຼັງຈາກນັ້ນ; ທາງຄະນະກໍ່ລົງຕິດຕາມສະພາບການຕົວຈິງຢູ່ທີ່ໂຮງໝໍພາກສະໜາມ ມັດທະຍົມຕອນຕົ້ນສີເກີດ ເພື່ອເກັບຂໍ້ມູນ ແລະ ສະພາບການຕົວຈິງ.
อาจเป็นรูปภาพของ 2 คน, ผู้คนกำลังยืน, กลางแจ้ง และ ต้นไม้