ອົງການກາແດງລາວ

CROIX ROUGE LAO

ອົງການກາແດງລາວ ຊ່ວຍເຫຼືອປະຊາຊົນ ຜູ້ປະສົບໄພພິບັດ ໃນ 4 ເມືອງ ແຂວງ ໄຊຍະບູລີ.

ໃນວັນທີ 21 ພະຈິກ 2021 ທ່ານ ຮສ.ດຮ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມເຮັດວຽກທີ່ ແຂວງ ໄຊຍະບູລີ ເພື່ອຕິດຕາມການເຄື່ອນໄຫວວຽກງານແລະຊຸກຍູ້ວຽກງານຕ່າງໆທີ່ກຳລັງຈັດຕັ້ງປະຕິບັດ,ທີ່ໃຫ້ການຊ່ວຍປະຊາຊົນຜູ້ທຸກຍາກພາຍໃນແຂວງທີ່ມີຫລາຍວຽກສຳຄັນເປັນຕົ້ນການຊ່ວຍເຫລືອຜູ້ໄດ້ຮັບຜົນກະທົບພະຍາດໂຄວິດ19, ຈາກນັ້ນ,ກໍ່ໄດ້ໃຫ້ການຊ່ວຍເຫລືອໃຫ້ແກ່ຜູ້ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ໃນເດືອນ ມິຖຸນາ 2021 ທີ່ຜ່ານມາ ຢູ່ໃນ 4 ເມືອງຂອງແຂວງໄຊຍະບູລີໄດ້ແກ່: ເມືອງ ໄຊຍະບູລີ, ເມືອງ ເງິນ, ເມືອງໄຊສະຖານ ແລະ ເມືອງ ຊຽງຮ່ອນ ຈຳນວນ 40 ບ້ານ ເປົ້າໝາຍ 2,094 ຄົນ; 10,091 ຄົນ, ການຊ່ວຍເຫຼືອໃນຄັ້ງນີ້ແມ່ນໄດ້ຮັບການຮ່ວມມືລະຫວ່າງ ອົງການກາແດງລາວ, ກະຊວງ ແຮງງານ ແລະ ສະຫວັດດີການສັງຄົມ ແລະ ອົງການອາຫານໂລກ ແມ່ນຈະໄດ້ເລີ່ມຈັດຕັ້ງວັນທີ 22 ພະຈິກ ຫາ 4 ທັນວາ 2021 ແມ່ນໃຫ້ສຳເລັດພາຍໃນແຂວງ ໄຊຍະບູລີ ຫຼັງຈາກນັ້ນ, ແມ່ນຈະໄດ້ສືບຕໍ່ມອບໃຫ້ແກ່ແຂວງ ສະຫວັນນະເຂດ ໃນໄລຍະຕໍ່ໄປໃຫ້ສຳເລັດໃນທ້າຍເດືອນ ທັນວາ 2021ນີ້, ເຄື່ອງທີ່ນຳມາມອບໃຫ້ປະຊາຊົນໃນຄັ້ງນີ້ ປະກອບມີ: ເຂົ້າສານຈຳນວນ 266,20 ໂຕນ ແລະ ນ້ຳມັນພືດ 20,39 ໂຕນ ລວມມູນຄ່າ: 305,304,97 ໂດຣາ ຫຼື ເທົ່າກັບ 3,273,175,000 ກີບ ເຊິ່ງໄດ້ຮັບການສະໜັບສະໜູນຈາກອົງການອາຫານໂລກ; ໃຫ້ກຽດກ່າວມອບໂດຍ ທ່ານ ຮສ.ດຮ ພູທອນ ເມືອງປາກ ປະທານອົງການກາແດງລາວ ແລະ ກ່າວຮັບໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງ ແຂວງ ໄຊຍະບູລີ ຫົວໜ້າຄະນະສະເພາະກິດໄພພິພັດຂັ້ນແຂວງ.
ທ່ານ ເພັດພິໄຊ ສູນວິໄລ ຮອງເຈົ້າແຂວງ ແຂວງ ໄຊຍະບູລີ ຫົວໜ້າຄະນະສະເພາະກິດໄພພິພັດຂັ້ນແຂວງ ກໍ່ໄດ້ກ່າວສະແດງຄວາມຂອບໃຈຕໍ່ທາງ ປະທານອົງການກາແດງລາວ ທີ່ໄດ້ປະກອບສ່ວນຍາດແຍ່ງເອົາທຶນຮອນ ການຊ່ວຍເຫຼືອຈາກອົງການຈັດຕັ້ງສາກົນ ເພື່ອໃຫ້ການຊ່ວຍເຫຼືອພໍ່ແມ່ປະຊາຊົນຊາວແຂວງ ໄຊຍະບູລີ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ໃນຄັ້ງນີ້, ເຄື່ອງຈຳນວນດັ່ງກ່າວ ແມ່ນຈະໄດ້ນຳໄປມອບໃຫ້ເຖິງມືປະຊາຊົນຢ່າງແນ່ນອນ ຕາມເງື່ອນໄຂຫຼັກການ ພ້ອມທັງຮັບປະກັນ ການແຈກຢາຍໃຫ້ວ່ອງໄວ ທັນເຫດການ, ເພື່ອໃຫ້ມີປະສິດທິພາບ ປະສິດທິຜົນ ຕາມທີ່ໄດ້ປຶກສາຫາລືກັນ, ນອກຈາກວຽກງານຊ່ວຍເຫຼືອບັນເທົາທຸກແລ້ວ, ທ່ານຍັງໄດ້ສະເໜີມາຍັງທ່ານປະທານອົງການກາແດງລາວ ໃນການຊອກຫາແຫຼ່ງທຶນມາຊ່ວຍໃນວຽກງານຕ້ານພະຍາດໂຄວິດ-19 ທີ່ພວມລະບາດເປັນບໍລິເວນກ້ວາງ ພາຍໃນແຂວງໄຊຍະບູລີ ໂດຍສະເພາະຄ່າໃຊ່ຈ່າຍຄ່າອາຫານ ໃຫ້ແກ່ໂຮງຫມໍພາກສະໜາມ ແລະ ສູນຈຳກັດບໍລິເວນ ໃນປັດຈຸບັນແມ່ນມີຄວາມຕ້ອງການທຶນຮອນເຂົ້າໃນວຽກງານນີ້ຢ່າງຮີບດ່ວນ.