ອົງການກາແດງລາວ

CROIX ROUGE LAO

ອົງການກາແດງລາວ ຊ່ວຍເຫຼືອນ້ອງນັກຮຽນໃນການປ້ອງກັນພະຍາດໂຄວິດ-19

ໃນລະຫວ່າງວັນທີ 06-17 ທັນວາ 2021 ອົງການກາແດງລາວ ໄດ້ລົງແຈກຢາຍເຄື່ອງສຸຂະອານະໄມປ້ອງກັນພະຍາດໂຄວິດ-19 ຈຳນວນ 1.150 ຊຸດ, ໃຫ້ແກ່ນ້ອງນັກຮຽນປະຖົມຢູ່ໃນນະຄອນຫລວງວຽງຈັນ ແລະ ແຂວງວຽງຈັນ ຈຳນວນ 11 ໂຮງຮຽນ, 1.102 ຄົນ; ຍິງ 610 ຄົນ, ໄດ້ແກ່ ໂຮງຮຽນປະຖົມບ້ານໜອງບົວທອງ, ນາຝາຍ, ໂຄກສາ, ດອນໄຮ່, ເວີນກະເບົາ, ຊຽງແລນາ, ບ້ານໂນນ ຂອງເມືອງປາກງື່ມ ແລະ ໂຮງຮຽງປະຖົມສົມບູນ ບ້ານທ່ານາສາ ແລະ ບ້ານ ຫ້ວຍຫຼ້າ ເມືອງສັງທອງ ນະຄອນຫຼວງວຽງຈັນ, ສຳລັບເມືອງ ທຸລະຄົມ ແຂວງ ວຽງຈັນ ໄດ້ແກ່ໂຮງຮຽນປະຖົມສົມບູນບ້ານ ສຸກສາລາ ແລະ ບ້ານນາຍາງ, ລວມມູນຄ່າການຊ່ວຍເຫຼືອ 219.000.000 ລ້ານກີບ(ສອງຮ້ອຍສິບເກົ້າລ້ານກີບ) ເຊິ່ງໄດ້ຮັບການສະໜັບສະໜູນຈາກກາແດງ ສ.ເກົາຫຼີ. ໃຫ້ກຽດກ່າວມອບໂດຍ ທ່ານ ນາງ. ໄອ່ຄຳ ສໍອິນໄຊ ຮອງຫົວໜ້າກອງໂຄສະນາ ແລະ ຂົນຂວາຍການກຸສົນ ອົງການກາແດງລາວ ແລະ ໃຫ້ກຽດກ່າວຮັບໂດຍຜູ້ອຳນວຍການໂຮງຮຽນດັ່ງກ່າວ.
ໃນໂອກາດດັ່ງກ່າວ, ຜູ້ຕາງໜ້າໂຮງຮຽນທີ່ໄດ້ຮັບການຊ່ວຍເຫຼືອໃນຄັ້ງນີ້, ກໍ່ໄດ້ກ່າວສະແດງຄວາມຮູ້ບຸນຄຸນຢ່າງສູງ ຕໍ່ອົງການກາແດງລາວກໍ່ຄື ຄະນະນຳອົງການກາແດງລາວ ທີ່ໄດ້ໃຫ້ຄວາມສຳຄັນໃນວຽກງານຕ້ານ ແລະ ສະກັດກັ້ນເຊື້ອພະຍາດໂຄວິດ-19, ສຳລັບເຄື່ອງສຸຂະອານະໄມທີ່ໄດ້ຮັບການຊ່ວຍເຫຼືອໃນຄັ້ງນິ້ ແມ່ນມີຄວາມສຳຄັນຕໍ່ນ້ອງນັກຮຽນ ເພາະອີງຕາມສະພາບການແຜ່ລະບາດຢູ່ໃນປັດຈຸບັນ ແມ່ນມີຄວາມສ່ຽງສູງທີ່ຈະໄດ້ຮັບເຊື້ອພະຍາດດັ່ງກ່າວ, ແລະ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອຈາກອົງການກາແດງລາວໃນຕໍ່ໜ້າຕື່ມອີກ.