ອົງການກາແດງລາວ

CROIX ROUGE LAO

ອົງການກາແດງແຫ່ງຊາດລາວປະກອບສ່ວນຊ່ວຍເຫຼືອ ປະຊາຊົນຜູ້ທຸກຍາກ.

ໃນຕອນບ່າຍຂອງວັນທີ 5 ກໍລະກົດ 2022 ນີ້, ຢູ່ທີ່ ສູນກາງຊາວໜຸ່ມປະຊາຊົນປະຕິວັດລາວ(ສຊປລ) ໄດ້ມີພິທີມອບ-ຮັບ ເຄື່ອງເພື່ອໄປຊ່ວຍເຫຼືອໃຫ້ແກ່ປະຊາຊົນຜູ້ທຸກຍາກຂາດເຂີນຂຶ້ນ, ໃນເຂດຊົນນະບົດພູດອຍ; ໂດຍການເຂົ້າຮ່ວມຂອງທ່ານ ຮສ. ດຣ. ສິງ ເມໂນລາດ ຮອງປະທານອົງການກາແດງແຫ່ງຊາດລາວ, ທ່ານ ທອງຈັນ ພູມີພັນ ຄະນະພັກ ຮອງເລຂາຄະນະບໍລິຫານງານ ສຊປລ ທັງເປັນປະທານຄະນະກຳມະການຕ້ານ, ສະກັດກັ້ນ ແລະ ຮັບມືກັບໄພພິບັດ (ສຊປລ), ມີບັນດາ ຫົວໜ້າກົມ, ຫົວໜ້າກອງ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ເຄື່ອງທີ່ນຳມາມອບໃນຄັ້ງນີ້ປະກອບມີ: ນໍ້າດື່ມ 50 ແກັດ, ປາກະປ໋ອງ 5 ແກັດ, ໝີ່ໄວໆ 30 ແພັກ, ເຂົ້າສານ 12 ກິໂລ 10 ເປົາ, ເກີບຜ້າໃບ 30 ແກັດ ແລະ ເຄື່ອງນຸ່ງຫົ່ມປະສົມຈຳນວນ 239 ຖົງ ລວມມູນຄ່າທັງໝົດ 80. 580. 000 ກີບ ເຊິ່ງໄດ້ຮັບການສະໜັບສະໜູນຈາກກາແດງ ສ.ເກົາຫຼີ, ສະຫະພັນກາແດງແລະຊີກວົງເດືອນແດງ, ເພື່ອນຳໄປມອບໃຫ້ບັນດາຄອບຄົວທຸກຍາກທີ່ສູນເສຍອົງຄະພິເສດ 790 ເມືອງໄຊທານີ ນະຄອນຫຼວງວຽງຈັນ ແລະ ປະຊາຊົນຜູ້ທີ່ທຸກຍາກພາຍໃນເມືອງນ້ຳບາກແຂວງ ຫຼວງພະບາງ. ເຊິ່ງໃນໄລຍະຜ່ານມາ ອົງການກາແດງແຫ່ງຊາດລາວ ແລະ ສູນກາງຊາວໜຸ່ມປະຊາຊົນປະຕິວັດລາວ(ສຊປລ) ໄດ້ມີການປະສານສົມທົບກັນໃນການເຄື່ອນໄຫວເຮັດກິດຈະກຳຊ່ວຍເຫລືອສັງຄົມຮ່ວມກັນເປັນປົກກະຕິ ອັນພົ້ນເດັ່ນແມ່ນການຮ່ວມມືຈັດກິດຈະກຳຮັບບໍລິຈາກເລືອດຊ່ວຍເຫຼືອສັງຄົມ.
ໃນພິທີດັ່ງກ່າວ, ທ່ານ ທອງຈັນ ພູມີພັນ ກໍ່ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ການຊ່ວຍເຫຼືອຂອງອົງການກາແດງແຫ່ງຊາດລາວ ທີ່ເຫັນໄດ້ເຖິງສຳຄັນ ແລະ ເອົາໃຈໃສ່ໃນການປະກອບສ່ວນຊ່ວຍເຫຼືອ ພໍ່ແມ່ປະຊາຊົນ ທີ່ທຸກຍາກຂາດເຂີນ ແລະ ຫ່າງໄກສອກຫຼີກ ທ່ານຍັງໃຫ້ຄຳໝັ້ນສັນຍາວ່າ ເຄື່ອງຈຳນວນດັ່ງກ່າວ ແມ່ນຈະໄດ້ນຳໄປມອບໃຫ້ເຖິງມືຂອງພໍ່ແມ່ປະຊາຊົນ.