ອົງການກາແດງລາວ

CROIX ROUGE LAO

ອົງການກາແດງແຫ່ງຊາດລາວປະກາດການຈັດຕັ້ງ

ໃນວັນທີ 25 ກຸມພາ 2022 ນີ້,ຢູ່ທີ່ຫ້ອງປະຊຸມສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ໄດ້ຈັດພິທີປະກາດການຈັດຕັ້ງຫົວໜ້າຫ້ອງການອົງການກາແດງແຫ່ງຊາດລາວ, ໂດຍເປັນກຽດເຂົ້າຮ່ວມຂອງທ່ານ ຮສ.ດຣ.ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ຮສ.ດຣ. ສິງ ເມໂນລາດ ເລຂາຄະນະພັກຮາກຖານອົງການກາແດງລາວ ຮອງປະທານອົງການກາແດງແຫ່ງຊາດລາວ ພ້ອມດ້ວຍພະນັກງານຫຼັກແຫຼ່ງຕະຫຼອດຮອດພະນັກງານວິຊາການເຂົ້າຮ່ວມ.
ໃນພິທີ ທ່ານ ເຂັມເພັດ ສີວໍຣະວົງ ຮອງຫົວໜ້າຫ້ອງການອົງການກາແດງແຫ່ງຊາດລາວ ໄດ້ຂຶ້ນຜ່ານດຳລັດ ວ່າດ້ວຍການແຕ່ງຕັ້ງ ຫົວໜ້າຫ້ອງການອົງການກາແດງແຫ່ງຊາດລາວ ສະບັບ ເລກທີ 11/ນຍ ລົງວັນທີ 26 ມັງກອນ 2022 ນາຍົກລັດຖະມົນຕີອອກດຳລັດ ມາດຕາ1 ແຕ່ງຕັ້ງທ່ານ.ກາວິພອນ ສຸດທິ ເປັນຫົວໜ້າຫ້ອງການອົງການກາແດງແຫ່ງຊາດລາວ ແລະ ມະຕິຕົກລົງວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກຫ້ອງການອົງການກາແດງແຫ່ງຊາດລາວ ສະບັບເລກທີ 0029/ຄພ.ຮສສ ລົງວັນທີ 14 ກຸມພາ 2022 ເລຂາຄະນະພັກກະຊວງແຮງງານ ແລະ ສະຫວັດດີການສັງຄົມຕົກລົງ ມາດຕາ1ບົ່ງຕົວແຕ່ງຕັ້ງ ສະຫາຍ ກາວິພອນ ສຸດທິ ເປັນເລຂາໜ່ວຍພັກ ຫ້ອງການອົງການກາແດງແຫ່ງຊາດລາວ
ຈາກນັ້ນ,ທ່ານ ຮສ.ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ຂຶ້ນມອບໃບດຳລັດວ່າດ້ວຍການແຕ່ງຕັ້ງຫົວໜ້າຫ້ອງການອົງການກາແດງແຫ່ງຊາດລາວ ແລະ ທ່ານ ຮສ.ດຣ. ສິງ ເມໂນລາດ ເລຂາຄະນະພັກຮາກຖານອົງການກາແດງລາວ, ຮອງປະທານອົງການກາແດງແຫ່ງຊາດລາວ ໄດ້ຂຶ້ນມອບໃບມະມະຕິຕົກລົງວ່າດ້ວຍການບົ່ງຕົວແຕ່ງຕັ້ງເລຂາໜ່ວຍພັກຫ້ອງການອົງການກາແດງແຫ່ງຊາດລາວ.