ອົງການກາແດງລາວ

CROIX ROUGE LAO

ອົງ​ການ​ກາ​ແດງ​ລາວ ອາ​ສາ​ສະ​ໝັກ​ເກົາຫຼີ ສ້ອມ​ແປງ​ໂຮງ​ຮຽນ

 

ອົງ​ການ​ກາ​ແດງ​ລາວ ອາ​ສາ​ສະ​ໝັກ​ເກົາຫຼີ ສ້ອມ​ແປງ​ໂຮງ​ຮຽນ. ໃນລະຫວ່າງວັນທີ 20 – 26 ທັນວາ 2018 ທີ່ຜ່ານມາ ຢູ່ທີ່ໂຮງຮຽນປະຖົມສົມບູນ ບ້ານ ປ່າໄລ່ ເມືອງທ່າພະບາດ ແຂວງ ບໍຄຳໄຊ ໄດ້ຈັດພິທີເປີດກິດຈະກຳແລກປ່ຽນຊາວໜຸ່ມອາສາສະໝັກ ກາແດງລາວ ແລະ ສ.ເກົາຫລີ ໂດຍການເຂົ້າຮ່ວມຂອງທ່ານນາງ ໄອ່ຄຳ ສໍອິນໄຊ ຮອງຫົວໜ້າການກອງໂຄສະນາ ແລະ ຂົນຂວາຍການກຸສົນ, ທ່ານ ບົວສອນ ບຸດຊາວດອນ ຮອງເຈົ້າເມືອງ ເມືອງ ທ່າພະບາດ, ທ່ານ ອານ ອິນໂຣ ຫົວໜ້າກົມຊາວໜຸ່ມອາສາສະໝັກກາແດງແຂວງ ຈ໋ອງນາມ ສ.ເກົາຫລີ ພ້ອມດ້ວຍທີມງານທັງສອງຝ່າຍ, ມີ ຮອງຫົວໜ້າຫ້ອງວ່າການເມືອງ, ຮອງຫົວໜ້າສຶກສາ ແລະ ກິລາເມືອງ ,ອຳນາດການປົກຄອງບ້ານ, ຄູ ອາຈານ, ນ້ອງນັກຮຽນແລະ ພາກສ່ວນກ່ຽວຂ້ອງເຂົ້າຮ່ວມ. ກິດຈະກຳແລກປ່ຽນ ຊາວໜຸ່ມ ອາສາສະໝັກ ຄັ້ງນີ້ຊາວໜຸ່ມອົງການກາແດງລາວ ແລະ ອາສາສະໝັກ ສ.ເກົາຫຼີ ໄດ້ຊ່ວຍສ້ອມແປງ, ປັບປຸງ ອາຄານຮຽນຊັ້ນອະນຸບານ ແລະ ຊັ້ນປະຖົມ ພ້ອມດຽວກັນນັ້ນ ກໍ່ຍັງໄດ້ສະໜອງອຸປະກອນການກໍ່ສ້າງຈຳນວນໜຶ່ງເພື່ອສົມທົບການກໍ່ສ້າງໂຮງຮຽນປະຖົມສົມບູນບ້ານ ປ່າໄລ່, ໂຮງຮຽນປະຖົມສົມບູນບ້ານທວາຍແບ່ງ ແລະ ໂຮງຮຽນປະຖົມສົມບູນ ອຸດົມໄຊ ເມືອງ ທ່າພະບາດ ແຂວງ ບໍລິຄຳໄຊ ແລະ ປັບປຸງ ອາຄານຮຽນ ອະນຸບານບ້ານໜອງບົວທອງ ເມືອງປາກງື່ມ ນະຄອນຫລວງວຽງຈັນ ຍ້ອນວ່າ ອາຄານຮຽນບໍ່ສົມບູນ ສ້າງຄວາມຫຍຸ້ງຍາກໃຫ້ແກ່ການຮຽນ – ການສອນ ຂອງຄູ ອາຈານ ແລະ ນ້ອງນັກຮຽນ; ຫລັງຈາກນັ້ນ ກໍ່ໄດ້ມອບອຸປະກອນການຮຽນ, ການສອນ ໃຫ້ຄວາມຮູ້ດ້ານການປະຖົມພະຍາບານ, ຮຽນຮູ້ວັດທະນະທຳລາວເຊັ່ນ: ການໃສ່ບາດ,ການນຸ່ງຖື,ການແຕ່ງອາຫານ,ບາສີສູ່ຂວັນ ແລະ ການສະແດງສິລະປະຮ່ວມກັນ.
ງົບປະມານການເຄື່ອນໄຫວກິດຈະກຳ ແລະ ໃຫ້ການຊ່ວຍເຫຼືອຄັ້ງນີ້ ແມ່ນໄດ້ມາຈາກການການລະດົມທຶນ ຈາກແຂວງ ຈອງນຳ ສ.ເກົາຫຼີ ລວມມູນຄ່າທັງໝົດ ກວ່າ 27.000 ໂດຮາ.