ອົງການກາແດງລາວ

CROIX ROUGE LAO

#ຮອງເຈົ້າແຂວງຊຽງຂວາງຕ້ອນຮັບປະທານອົງການກາແດງລາວ

ຕອນວັນທີ 20 ສິງຫາ 2021, ທ່ານ ໜໍບີຫາ ຕົ່ງປາວ ຄະນະປະຈຳພັກແຂວງຮອງເລຂາພັກແຂວງຊຽງຂວາງໄດ້ຕ້ອນຮັບທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວເຂົ້າພົບປະລາຍງານການເຄື່ອນໄຫວວຽກງານກາແດງແລະຂໍທິດຊີ້ນຳ ແລະປຶກສາຫາລືແລະພັດທະນາວຽກງານກາແດງໃນຕໍ່ຫນ້າ.
ໃນໂອກາດນີ້ ທ່ານປະທານອົງການກາແດງລາວ ໄດ້ສະແດງຄວາມຊົມເຊີຍດີອົກດີໃຈຕໍ່ການຮັບຕ້ອນຈາກທ່ານຮອງເຈົ້າແຂວງຢ່າງອົບອຸ່ນເຊິ່ງຢູ່ໃນທາມກາງແຂວງຊຽງຂວາງກຳລັງພັດທະນາແລະປັບປຸງຊັບຊ້ອນບຸກຄະລະກອນຢ່າງເປັນລະບົບຕາມທິດຂອງພັກແລະລັດຖະບານແລະແຜນພັດຖະນາເສດຖະສັງຄົມທີ່ກຳນົດໄວ້,ພ້ອມນັ້ນ ໄດ້ແຈ້ງໃຫ້ທ່ານຮອງເຈົ້າແຂວງຊາບໃນການເຄື່ອນໄຫວວຽກງານກາແດງໃນໄລຍະຜ່ານມາມີທັງຂໍ້ສະດວກແລະຂໍຫຍຸ້ງຍາກເຊິ່ງອົງການກາແດງໄດ້ເຮັດຫນ້າທີ່ຊ່ວຍເຫລືອບັນເທົາທຸກໃຫ້ພໍ່ແມ່ປະຊາຊົນຜູ້ທຸກຍາກໃນເຂດຫ່າງໄກສອກຫຼີກພູດອຍຕາມສິດແລະຫນ້າທີຂອງກາແດງ 9 ໜ້າວຽກຕົ້ນຕໍຕາມທີ່ໄດ້ກຳນົດໄວ້ໃນກົດໝາຍ, ໃນໄລຍະຜ່ານມາ ອົງການກາແດງແຂວງຊຽງຂວາງ ສາມາດປະຕິບັດວຽກງານສຳເລັດຫລາຍດ້ານແລະ ຄຽງຄູກັນນັ້ນຍັງມີບາງວຽກງານທີ່ຈະຕ້ອງໄດ້ເອົາໃຈໃສ່ເປັນຕົ້ນ:ການປຸກລະດົມຂົນຂວາຍແຫຼ່ງທຶນ, ການປຸກລະດົມຂົນຂວາຍການບໍລິຈາກເລືອດ, ການສ້າງອາສາສະໝັກກາແດງ ແລະ ການປະສານງານກັບອົງການປະສານສົມທົບວຽກງານກາແດງແລະອື່ນໆ,ພິເສດທ່ານປະທານອົງການກາແດງລາວໄດ້
ສະເຫນີໃຫ້ທ່ານເຈົ້າແຂວງເປັນປະທານກິດຕິມະສັັກຂອງອົງການກາແດງແຂວງ ເພື່ອຊ່ວຍຊີ້ນຳນຳພາວຽກກາແດງໃຫ້ບັນລຸຕາມຄາດໝາຍຈາກນັ້ນທ່ານ ຮອງເລຂາພັກແຂວງກໍໄດ້ກ່າວສະແດງການຕ້ອນຮັບຢ່າງອົບອຸ່ນຕໍ່ການເຄື່ອນໄຫວຢ້ຽມຢາມແລະເຮັດວຽກໃນຄັ້ງນີ້ ແລະ ຈະໄດ້ເອົາໃຈໃສ່ຢ່າງໄກ້ສິດຕິດແທດ,ເຂົ້າຮ່ວມຊຸກຍູ້ໃນການປຸກລະດົມຂົນຂວາຍຈາກສັງຄົມໃຫ້ເຂົ້າຮ່ວມຂະບວນການບໍລິຈາກເລືອດ, ການລະດົມຂົນຂວາຍແຫຼ່ງທຶນ ແລະ ເອົາໃຈໃສ່ຊ່ວຍໃນການປະສານງານກັບບັນດາພະແນກການທີ່ກ່ຽວຂ້ອງ ເພື່ອພ້ອມກັນປະກອບສ່ວນຊ່ວຍເຫລືອປະຊາຊົນຜູ້ທຸກຍາກໃຫ້ໄດ້ແລະທົ່ວເຖິງໃນວຽກງານກາແດງ
ພ້ອມນັ້ນ, ປະທານອົງການກາແດງລາວ ໄດ້ມອບເຄື່ອງຮັກສາສຸຂະນາໄມ ເພື່ອປ້ອງກັນພະຍາດໂຄວິດ-19ໃຫ້ແກ່ອົງການກາແດງແຂວງ ໂດຍຊ້ອງໜ້າ ຄະນະນຳຂອງແຂວງ ເພື່ອນຳໄປມອບໃຫ້ ບັນດານັກຮຽນທີ່ທຸກຍາກຂາດເຂີນ ໄດ້ນຳໃຊ້ເຂົ້າໃນການປ້ອງກັນ ເຊື້ອພະຍາດໂຄວິດ-19.
ຈາກນັ້ນປະທານອົງການກາແດງລາວພ້ອມດ້ວຍຄະນະກໍໄດ້ສືບຕໍ່ພົບປະໂອ້ລົມອ້າຍນ້ອງພະນັກງານກາແດງແຂວງ.